4
Kaen Pe Apel
Antam ma luluch nge nehei Eua ke sana pe hoe tuna Kaen. Pe Eua hele, “Nga Non Soke nena halaunga e hoe tuk nei.” Iok nga hoena Eua hoho mule Kaen tina e pe hetue ke ene Apel.
Pe Apel lohot ke i non nenge nauelele sipsip pe kolok mur pe Kaen i non nenge umume nga ume. Mala pol pe Kaen lule nena ngaunga hel nga ume ke poi nena tunginga ia lange Non Soke. Pe Apel mene nena sipsip tengene ana mur hel nge urana toto ke poi tunginga ia pule. Pe Non Soke mutena taua Apel nena tunginga. Pe Kaen nena tunginga Non Soke mutena taua ero. Pomalam Kaen letena inin pe iech ero toto.
Pe Non Soke onteia Kaen ke teke, “Iong mam letem inin pe o iech ero ia utar?” Nenge teke o poia poinga nge pengpeng lape e longele lem tunginga. Pe nenge teke o poia poinga nge pengpeng ero, lape poinga poreke ngana heporeke tote iong. Ke poinga poreke ngana mutena tau tote iong pe iong o mes ke kerkereng ke o hekousue.
Iok nga hoena Kaen hele lange tina Apel ke teke, “Ita nai tala ke ta i rara nga ich nenge ana heilil mana!” Iok iri nai tela ke te i rara nga lamau pe Kaen ngira taua tina Apel pe hune i ke mete.
Pe Non Soke onteia Kaen ke teke, “Kaen! Tim Apel ngai?”
Pe Kaen hele, “E eteia i ero. Ia iau mam ak ume ma nenge e nauelele i mam?”
10 Pe Non Soke NeHalang hele, “Pomere nenge o poia poinga poreke ngana nem mam?” O longo la, tim eina kou lele nga ich pe tang atat nge Iau. 11 Pe ich kou hanna pangpanga ke tontone tim eina nenge perim poia. Ke heueu nei, lape lek keke iong ke o i rara mana nga ich. 12 Pe nga etue nenge o umume am nga ich, ute pele nge lape haka ke nek ero. Pe lape mulim e nge o tu ia ero. Lape o i rara manmana nga ich.
13 Pe Kaen hele lange Non Soke ke teke, “Melmelenga nenge o tunge at nge iau nem, palaungana toto pe lape heporeke tote iau iam. 14 O nau at, heueu nei o lope hote iau lamai pe lape e la ke e talkome toto nga matam ol. Lape e i rara mana nga ich iange mulik e nge e tuia ero. Pe nenge teke mele saolia iau lape hune iau ke e mete.”
15 Pe Non Soke hele lange i ke teke, “O matau ero! Nenge teke mele hune iong, mele nem lape ameia ana melmelenga nge palaungna toto.” Ol pe Non Soke tal heke lala e lange i ke mele nenge saolia i hune i ero. 16 Iok Kaen ua hot nga Non Soke matana pe la ke tu nga ich nenge ene “Irara.” Ana ich tu nga kilenge ilina hele nenga lut nga ume nenge Paratiso.
17 Iok Kaen maluluch nge nehei ke sana pe hoe tuna tamane ngana e pe hetue ke ene Enok. Pe Kaen talun ke hemes heke tuele tana e pe heto heke nge tuna Enok. 18 Pe Enok tuna laka Irat pe Irat tuna laka Mehusael pe Mehusael tuna laka Metusael pe Metusael tuna laka Lamek.
19 Lamek lei ke hehei nai. Elle ene Atah pe e ene Sila. 20 Pe Ata sana ke hoe tuna tamane ngana e nge ene Iapal. Pe iri nenge te mama nga pelpele pe te nauele reria sipsip mur pe kolok mur reette laka Iapal. 21 Pe Iapal tina laka Iupal. Pe iri lochloch nenge te palpal hario pe milollo pe te iuiua iu reette laka Iupal. 22 Pe Lamek nehei Sila hoe tuna tamane ngana e nge ene Tupal-Kaen, pe liuna ene laka Nama. Tupal-Kaen i non nenge ume hotot urelu kuenkuena ngana mur nga ure nenge ene bras pe aen.
23 Pe nga etuene Lamek hele lange nehei mur ke teke,
“He Ata pe he Sila a longo at nge iau;
Ne Lamek nehei mur, a longo at nga lek helenga.
Non e pal poreke tote iau pe e hune i ke mete,
pe non lomele ngana e nosia iau pe e hune i ke mete.
24 Ke nenge teke mele hune Kaen lape takisia melmelenga nge palaungana toto.
Pe nenge teke mele hune iau lape takisia ana melmelenga nge palaungana toto ol.”
25 Pe Antam maluluch mule nge nehei pe hoho mule tuna tamane ngana e pe hetue ene ke Set pe nehei hele, “Ne Halang tung mule tuk nei ke mene Apel munna nenge Kaen hune.” 26 Pe Set hoe tuna tamane ngana e pe hetue ke ene Enos. Nga etue neu hehei pe hana te talun ke te heto heke Non Soke ene ke te teke, “Ta heto heke NeHalang.”