41
Ne Parao Maopene Ngana
1 Iok, hesinga nai la ke ulo pe Parao maopene ke: Mesmes nga ech ilina nge Nael
2 pe kolok iri rahtele nai nge te lum toto pe nakuria urana toto, te lohaka nga ech neu ke la te ngaungau heilil nga ech ilina.
3 Ke het pe kolok rahtele nai mule nge kiria he mana pe nakuria poreke toto, te lohaka nga ech neu pe la temes luluch nga nenge te lohot tala nga ech ilina.
4 Ol pe kolok nenge kiria he pe nakuria poreke neu, te ton rorolia kolok rahtele nai nenge te lum pe nakuria urana neu. Ol pe Parao memete haka sapele.
5 Iok mamani mule pe maopene henai ngana ke mai: Uit nganangana iri rahtele nai nge te lum toto pe nakuria urana, te heon nga uit tana elle.
6 Ke het pe uit nganangana rahtele nai te heon hot pule. Nakuria pomanga tuttula milang ngana nenga ich sana lomona hue iri ke te lum ero pe nakuria poreke mana.
7 Pe uit nganangana nenge te lum ero neu, te ton taua rahtele nai nenge te lum pe nakuria urana neu ke te het. Ol pe Parao memete haka pe eteia ke, “Iau nge e maopek kai?.”
8 Uach sio ol pe Parao letena meena toto. Ol pe hekulo hana nenge te popoi ure paluna pe nenge leteria matana toto nge Ekipto aria ke te lange i, pe heleia maopene ngana neu lange iri. Pe e nge iri henin hote luna lange i ero.
9 Ol pe non soke nenge nauelele Parao ana uain hele lange Parao ke teke, “Ak soke, ure nei helete metene iau nga lek poinga e nge pengpeng ero.
10 Nga etue nenge letem inin taua imem hekuleileinga ana hana mur, o tal teua non soke nenga peret mak ngana pe iau nga tuele au ngana - nga non soke nenge i mukmukia palingahel ana hana mur nena pele.
11 Pe nga miliko e imem nai ape ke mo maopemem. Iau e maopek ngak luna altoto nga i maopene ngana.
12 Pe kol Hipru lomele ngana e tu lamau pule. Ana non umume nge non nenge i mukmuka ia palinga hel ana hana mur. Mo nene mo maopemem ngamem lange i pe hele hot pengpeng ia luna mur atat nge imem.
13 Pe ure mur te lohot ke pengpeng toto ke pomanga hele nganaia at nge imem: Ke iau e mene mule mulik nga lek ume pe non neu te heon heke i.”
14 Ol pe Parao hekulo Iosep ana pe te mene hote i ke ueiuei mana nga tuele au ngana ke lak sue i pe hetaua nena hengeron. Ke het pe la ke mes nga ne Parao matana.
15 Pe Parao hele lange Iosep ke teke, “Iau e maopek pe mele e nge henin hote luna at nge iau ero. Pe e longe nge te heleia iong. Nga etue nenge mele nene maopene ngana lange iong, o hele hote luna lange i.”
16 Pe Iosep hele lange Parao ke teke, “Non soke, iong lemem toto ke o teke o eteia o maopem ngam luna mur. Pe NeHalang isipona lape hemallaha hote lange iong. Iau nakuk nge e poia ume nem ero.”
17 Ol pe Parao nene maopene ngana lange Iosep ke teke, “Iau e mesmes nga ech ilina nge Nael,
18 pe kolok iri rahtele nai nge te lum toto pe nakuria urana toto, te lohaka nga ech neu ke la te ngaungau heilil nga ech ilina.
19 Ke het pe kolok rahtele nai mule nge kiria he mana pe nakuria poreke toto, te lohaka pule. Iau e kokol toto kolok hel nge pomau nga ich lochloch ngana nge Ekipto.
20 Ol pe kolok nenge kiria he pe nakuria poreke neu, te ton rorolia kolok rahtele nai nenge te lum pe nakuria urana - nenge te lohot tala.
21 Iok te ngau taua iri ke het pe nakuria pomalaka nga te ngaua ute e ero. Nakuria poreke ulu ngana neu, ngana kou tu mana kura. Ol pe e memete haka sapele.
22 “Iok, e mamani mule pe e maopek ke e naue uit nganangana iri rahtele nai nge te lum toto pe nakuria urana nge te heon nga uit tana elle.
23 Ke het pe uit nganangana rahtele nai nge te lum ero pe nakuria poreke, te heon hot pule pe nakuria pomalaka nga tuttula milang ngana nenga ich sana lomona hue iri.
24 Pe uit nganangana nenge te lum ero neu, te ton taua rahtele nai nenge te lum pe nakuria urana neu ke te het. E nene e maopek ngak nei lange hana nenge te popoi ure paluna pe e nge iri henin hote luna at nge iau ero.”
25 Ol pe Iosep hele lange Parao ke teke, “Non soke, o maopem ngam iri nai pe luria elle mana. NeHalang teke hemallaha hote utar nenge teke popoia lange iong.
26 Kolok rahtele nai nenge nakuria urana nem, luria laka hesinga iri rahtele nai. Pe uit nganangana nenge nakuria urana nem, luria laka hesinga iri rahtele nai. O maopem ngam nem luria elle mana.
27 Pe kolok rahtele nai nenge kiria he pe nakuria poreke nenge te lohot nge hoena nem, luria laka hesinga iri rahtele nai. Pe uit nganangana rahtele nai nenge te lum ero pe nakuria poreke pe te lohot nga hoena nem, nakuria pomanga tuttula milang ngana nenga ich sana lomona hue iri. Pe luria laka uringa nge lape lohot pe lape tu ke hesinga iri rahtele nai.
28 “Non soke, pomanga e hele ngak ia lange iong lo: NeHalang teke hemallaha hote utar nenge teke popoia ke lohot lange iong.
29 Hesinga iri rahtele nai lape ngaunga kila parai nga ich lochloch ngana nge Ekipto.
30 Pe iuringa ana hesinga iri rahtele nai lape te nanas. Pe ngaunga kila parai ngana nge Ekipto lape het pe uringa song ke purpure ich lochloch.
31 Hehei pe hana lape leteria metene hesinga nemur nenge ngaunga kila parai ia ero ol, iange uringa nenge lape lohot nem poreke toto.
32 Ke NeHalang I sipona tunge o maopem ngam nem lange iong. Pe tunge ke ana lala iri nai iange teke poia ure nem ke lohot ke manmanna.
33 “Ke pomalam non soke, heueu nei o henonou hote non e nge letena matana toto pe letena tuanin ngana urana toto ke nauele tuele kina nenge Ekipto.
34 Nga hesinga rahtele nai nenge ngaunga halang, hehei pe hana lape te lulu pe te takirau ke ngaunga huna iri lime. Pe o henonou hote hana papalauna hel pule ke te mene ngaunga huna ellechle nge hehei pe hana lochloch.
35 Iri lape te longo la mana nge iong ke te loloch ia ngaunga mur, nga hesinga urana ngana mur nenge atat pe te takirau teua nga ngaunga ana pele mur, nga tuele tana mur pe te nauele iri.
36 Iange naunga nem lape nauele hehei pe hana lochloch nga tuele kina nenge Ekipto, ke te uri ero nga uringa ana etue, nenge lape tu ke hesinga iri rahtele nai.”
Parao Talue Iosep Ke Nauele Kileng Nenge Ekipto
37 Ne Parao pe nena hana papalauna mur te longe Iosep nena helenga pe leteria urana ia.
38 Ol pe Parao hele lange iri ke teke, “NeHalang opene tu luluch nge Iosep pe lape ta mene itei ol ke nauele ume nei?”
39 Ol pe hele lange Iosep ke teke, “Mele pele nge letetena matana ngana pe etei ngana nga ure nemur pomange iong ero. Iange NeHalang isipona henonoua ure nemur lange iong ke iong toro mana o etei tote.
40 Pomalam lape e talue iong ke iong muka nge hana papalauna mur nga lek pele pe hehei pe hana lochloch lape te longo la mana nge iong. Iau naunga-ala ana non pe iau toro mana iau palaungana nge iong.”
41 Iok laol, ne Parao hele lange Iosep ke teke, “Lape e talue iong ke o nauele tuele kina mur lochloch nge Ekipto.”
42 Ol pe Parao poi hote naunga-ala ana hana mur reria uto nga penna kukana pe poi teua nga Iosep penna kukana. Pe heronia Iosep nga hengeron urana ngana mur pe heon heke nananga chalemlem ngana nga kanna.
43 Pe tunge nena kares nei ngana nenge oriong mur te tak rungrunge ke Iosep song rara ia ke pomanga i naunga-ala ana non nei ngana ia. Pe hana nenge te umume nge Parao te song ke iri muka pe te alngaria ke te teke, “A allele nga kue, non soke koi atat.” Nga poinga nei Parao poia Iosep ke i palaungana toto pe nauele tuele kina lochloch ngana nge Ekipto.
44 Ol pe Parao hele lange Iosep ke teke, “Iau Parao pe lek helenga koi. Mele pele nga tuele kina nenge Ekipto poi pulut mene ute nga lemene ngana ero. Te longo mana lange iong.”
45 Pe Parao tunge Iosep ene nenge Sapenat-Panea pe tunge heie pule lange Iosep. Hei neu ene laka Asenat pe temene ene laka Potipera. Potipera i tunginga ana non ia nga tuele tana nenge Heliopolis. Iok laol, Iosep i ke nau rara nga kileng lochloch nga tuele kina mur nge Ekipto.
46 Parao i naunga-ala ana non nge Ekipto. Pe Iosep ana hesinga iri ana non kina pe analoch nga etue nenge teu ke talune ume nenge Parao tunge lange i. Iok Parao tu nga nena pele pe Iosep song ke la nau toto nga kileng lochloch ngana nge Ekipto.
47 Pe nga Hesinga iri rahtele nai, ngaunga te haka nge Ekipto ke urana mana pe nganagaria halang toto.
48 Ke nga hesinga nemur, Iosep hele lange ume ana hana mur ke te takiraua ngaunga nge halang toto nga ume mur, nga tuele tana elle pe elle nge Ekipto pe te tal teua iri la nga ngaunga ana pele mur nga tuele tana nemur.
49 Pe Iosep lemene ero ol nge sis ele ngaunga nemur nenge te takirau teua iri neu, iange te lohot ke iri halang nge halang toto ke pomanga peipei nga ruach ilina.
50 Iok hesinga nemur nenge uringa ana te lohot ero kura pe Iosep nehei Asenat hoho ke tutuna mur nai nge iri tatamanna. Asenat i Potipera tuna ia pe Potipera i tunginga ana non ia nga tuele tana nenge Heliopolis.
51 Pe Iosep hele, “NeHalang poia iau ke letek lilil ele alok mur pe ak melmelenga mur.” Pomalam hetue tuna tengene ana ke ene Manase.
52 Pe Iosep hele pule ke teke, “NeHalang poia iau ke e hoe tutuk mur nga kileng nenge e takisia ak melmelenga ia.” Pomalam hetue tuna neingana ke ene Epraim.
53 Iok laol hesinga rahtele nai nenge ngaunga halang ia het,
54 pe hesinga rahtele nai nenge uringa ana lohot sapele ke pomanga Iosep hele ngana. Uringa lohot nga tuele tana mur hel pe nga kileng lochloch ngana nge Ekipto ngaunga halang kura.
55 Pe nga etue nenge uringa lohot nga kileng lochloch ngana nge Ekipto, hehei pe hana te tang lange ne Parao nga ngaunga. Pe Parao hele lange hehei pe hana lochloch ngana nge Ekipto ke teke, “A la ke a naue Iosep pe a nanas mene nena helenga.”
56 Iok, nga etue nenge uringa lohot ke poreke toto nga kileng lochloch ngana nge Ekipto, Iosep loe pele mur nenge te talteu ngaunga ia pe hehei pe hana nenge Ekipto te at ke te ol ngaunga.
57 Pe hehei pe hana hel pule nga ich lochloch te lange Ekipto ke la te ol ngaunga nge Iosep, iange uringa neu lohot ke poreke toto nga kileng lochloch ngana nga ich.