42
Iosep Titina Mur Tela Nge Ekipto
1 Iok, Iakop longe nge te teke ngaunga halang kou nge Ekipto. Ol pe hele lange tutuna mur ke teke, “Pomere nenge a are manmana pe a nau tele hel manmana nge imo ke pomam?”
2 E longe nge te teke ngaunga halang kou nge Ekipto. A sio la ke aol ara. Ta uri ke ta mete mana heueu i.
3 Ol pe Iosep titina mur nge iri analoch te sio ke la te ol aria ngaunga nge Ekipto.
4 Pe Pensamin i Iosep tina toto pe Iakop kulosia i ke la luluch nge titina mur ero iange matau nge lape ute lohot nge i.
5 Pe uringa lohot nga ich nenge Kenan pule. Ke nga etue nenge hana tela ke teol ngaunga nge Ekipto, Iakop tutuna mur tela luluch nge iri.
6 Nga etue neu Iosep lohot ke i non soke nenge nauele ich nenge Ekipto pe i non nenge hehei pe hana teolol ngaunga nge i. Pe nga etue nenge Iosep titina mur te sauhot te tualou sio pe te au sio tote iri la nga ich.
7 Pe nga etue nenge Iosep naue titina mur, es urume iri pe hele salia iri ke pomanga eteia iri ero pe hele ke teke, “A at la ngai?”
Pe iri te hele, “Mo at nga ich nenge Kenan ke mo ol ngaunga.”
8 Iosep nau urume titina mur pe titina mur te nau urume i ero.
9 Ol pe letena metene maopene ngana mur nenge esia titina mur nge te tualou sio lange i pe hele ke teke, “A pallaka iam! Lape a i at ke a nauling nga lemem kileng ke a nau urume makuk ngana mur iam.”
10 Pe iri te hele, “Ero non soke. Iong lem ume ana hana mur imem. Mo at ke mo ol mana ngaunga.
11 Imem mo hele ke manmanna pe mo pallaka ero. Non elle mana hoe imem pe mo at ke mo nauling nga kileng nei ero koi.”
12 Pe Iosep hele, “Ero! Imo a at ke a nauling ia lemem kileng ke a nau urume makuk ngana iam.”
13 Pe iri te hele, “Non soke, imem analoch pe nai pe titimem mur hel iange non elle mana hoe imem. Ana non kou tu nga ich nenge Kenan pe timem nenge lomele toto ngana kou tu luluch nge i. Pe timem e kou erue lo.”
14 Pe Iosep hele lange iri ke teke, “E hele lange imo ke ulolo: Imo toloinga ana hana mur laka!
15 Pe nenge teke a hele ke manmanna lape e totoi ia imo ke pomai koi. E hele ke kerkereng toto nga Parao ene ke, nenge teke a mene timo nenge kino at lamai ero, lape ala mule nga lemo kileng ero.
16 A kulosia timo e ke la taua timo nenge kino ke at pe imo lochloch ngana nemur ama teu nga tuele au ngana mukam. Pe ta nauala lape lemo helenga nem manmanna ma ero. Nenge teke lemo helenga nem manmanna ero, e hele ke kerkereng toto nga Parao ene ke imo toloinga ana hana mur!”
17 Ol pe Iosep tal teua iri nga tuele au ngana pe te tu ke etue mol.
18 Iok nga etue mol ngana Iosep hekulo titina mur aria pe hele lange iri ke teke, “Iau non nenge e tal haka totote NeHalang pe e nanas tau tote lemene ngana: Nenge teke a nanasia lek helenga lape atu ke a maulul.
19 Pe nenge teke imo hana nenge a hele ke manmanna, a longala hote timo e ke tu nga tuele au ngana mukam pe imo lochloch a takisia ngaunga nenge a olia pe ala mule ia nge lemo kileng ngana mur. Iri kou te uri mana.
20 Pe timo nenge kino nem a mene i at nge iau laka e eteia ke imo a hele ke manmanna, pe lape te hune imo ero.” Pe iri leteria urana mana nga Iosep na helenga neu.
21 Ol pe te hele, “Manmanna toto. Ure meena ngana nei lohot nge ita iange ta poi poreke tira. Ta esia i nge tang atat nge ita ke teke ta halaua i pe ero. Ta longo lange i ero.”
22 Pe Rupen hele, “Ia iau mai e hele ke mere lange imo? E hele ke e teke a poia poinga nem lange kol nem ero. Pe imo a longo taua iau ero. Ke heueu lape ta takisia ara melmelenga ke ta tuacholia eina.”
23 Iri te helele nga helenga Hipru pe te teke ma Iosep eteia ero. Iange Iosep hele lala nge iri nga Ekipto mur reria helenga pe non e hulia lala nge iri.
24 Iosep longe iri nge te hele ke mau pe i hot kel aria pe tang. Ke het pe la mule ke hele luluch nge iri. Pe hele ke na hana mur ke te kele Simeon penna nga titina mur mataria.
25 Pe Iosep hele ke na hana mur te hemute titina mur reria kole mur nga ngaunga pe te tal teu mule reria umtutuna mur nga iri elle pe elle reria kole mur pe te tunge aria ngaunga nenge kue ana pule. Ke het pe
26 Iosep titina mur te tal heke reria kole mur nga reria tongki mur pe te i sapele.
27 Tela pe miliko taua iri nga kileng e pe tema. Pe elle nge iri teke mene hote tongki ana ngaunga pe esia nena umtutuna nge ma nga nena kole hanna.
28 Pe hele lange titina mur ke teke, “Lek umtutuna pai koi at mule. Ngana i ma teu nga lek kole mai.”
Te longe ke mau pe te rura toto pe te nau tele hel mana nge iri pe te hele, “NeHalang mai poia ita ke mere mai?”
29 Nga etue nenge tela ke te lohot mule nge temeria Iakop nga ich nenge Kenan, te heleia ure lochloch ngana nenge lohot nge iri lange i. Pe te hele ke te teke,
30 “Non soke nenge ume nge Parao ke nauele kileng neu, hele salia imem pe poia imem ke pomalaka nga imem toloinga ana hana mur.
31 Pe mo hele lange i ke mo teke, ‘Imem mo hele ke manmanna ke imem toloinga ana hana mur ero koi.
32 Imem analoch pe nai pe titimem mur hel iange non elle mana hoe imem. Ana non kou tu nga ich nenge Kenan pe timem nenge lomele toto ngana kou tu luluch nge i. Pe timem e kou erue.’
33 “Ol pe non soke nenge ume nge ne Parao ke nauele kileng neu hele at nge imem ke teke, ‘Nenge teke a hele ke manmanna lape e totoia imo ke pomai koi: A longele timo e ke tu luluch nge iau pe a lochloch ia lemo kileng ngana mur aria ngaunga pe ala. Ngaria kou te uri mana.
34 Pe a mene timo lomele ngana nem at nge iau. Pomalam e eteia ke a hele ke manmanna pe imo toloinga ana hana mur ero. Pe lape e tung mule timo lange imo pe a i rara ke a poia lemo ume mur pe a poi tetele mana nga ich nei ol.’ ”
35 Iok te eu hot mulmule ngaunga mur nga reria kole mur pe iri elle pe elle te nau mule reria umtutuna mur nge te mateu mule nga reria kole mur! Pe iri ul temeria te esia ke mau pe te matau toto.
36 Pe temeria Iakop hele lange iri ke teke, “Imo a poia iau ke tutuk mur iri ero hatalia iau. Iosep kou erue ke la lo pe Simeon koi i ero pullo pe ngana iam a teke a mene Pensamin lala pullo. Pomere nenge ure meena ngana tu hit mene iau mai?”
37 Ol pe Rupen hele lange temene ke teke, “Letem here iau ke e nauele i pe lape e mene mule i at nge iong. Pe nenge teke e mene Pensamin ke at mule nge iong ero, o hune tutuk mur tatamanna nai nem.”
38 Pe Iakop hele, “Tuk nei lape sio la luluch nge imo ero; tina kou mete lo pe i toro mana koi tu ol. Iau e tuauna lo pe nenge teke ute hune i nga lemo inga nem, lape a poia letek ke kolkol toto pe e mete sapele.”