44
Iosep Ana Eulinga Sinaha Ngana Erue
1 Iok, Iosep hele lange nena non nenge umume nga nena pele ke teke, “O hemuta heke hana nemur reria kole mur nga ngaunga ke muta. Pe o tal teu mule iri elle pe elle reria umtutuna mur nga reria kole hanna.
2 Pe o tal teua ak heulinga sinaha ngana nga kol lomele neu nena kole hanna luluch nga nena umtutuna nenge ol ngaunga ia.” Pe non neu poia ke pomanga Iosep hele ngana.
3 Iok, nga uach uruna Iosep nena hana mur te kulosia titina mur ke tela luluch nga reria tongki mur.
4 Iok te hile tuele tana ke la nga tau ero kura pe Iosep kulosia nena non nenge nau elele nena pele ke teke, “O nanasia hana nemur ke ueiuei mana. O la ke o apen teu nge iri pe o hele lange iri ke pomai, ‘Pomerei nenge mo poi ke urana lange imo pe a poia poinga poreke ngana nei at nge imem?
5 Ak soke ana eulinga nenge inin ech ia laka a mene nem. Pe pule eulinga nem hemallaha hotote ure talkomkome ngana mur lala nge i. Lemo poinga nem poreke toto.’ ”
6 Nga etue nenge Iosep nena non neu saol teu nge iri, henanas mule helenga neu lange iri.
7 Pe iri te hele ke te teke, “Non soke pomerei nenge o poia helenga nenge pomam at nge imem? Imem mo matau toto nge mo poia poinga nem iam!
8 O nau at! Nga lia mo at ke mo ol ngaunga pe nga etue nenge mo la mule nge Kenan mo hottaua umtutuna mur nge te mateu nga lemem kole mur. Pe umtutuna nemur mo mene mule iri at lo. Pe pomere nenge o teke mo kemeia ure chalemlem pe koikoi ngana nenge pomanga lauta nga am soke nena pele mam?
9 Non soke nenge teke emem e nge imem mene, lape a hune i ke mete pe imem lochloch lape mo ume mana nge iong ol.”
10 Pe non neu hele, “Urana nga lem helenga nem. Pe itei nenge e hottaua nge mene eulinga nem, i mana lape lohot ke lek hekuleileinga ana non ia pe imo lochloch ngana ero.”
11 Ueiuei mana pe iri elle pe elle te tal sue reria kole mur nga ich pe te ulele iri.
12 Pe Iosep nena non neu chanrara nga kole lochloch. Talune nge tiria nenge soke ke la nga nenge kino. Pe hottaua eulinga neu nga Pensamin nena kole.
13 Pe Pensamin titina mur te esia ke mau pe te chach ule reria hengeron mur iange leteria poreke ia tiria. Pe te tal heke mule reria ure mur nga tongki pe te la mule nge Ekipto.
14 Te la mule ke te lohot pe Iosep tu nga pele kura. Pe Iuta pe titina mur te teu la pe te tamal sue iri la nga ich nga Iosep matana.
15 Pe Iosep hele lange iri ke teke, “Pomerei nenge a poi ke pomai? Iau nakuk nge e hele hote ure nemur nenge te talkome. A eteia ero kai?”
16 Pe Iuta hele ke teke, “Non soke lape mo tuacholia lem helenga ke merei? Mo hele ala emem ero ol iange NeHalang hemallaha hote lemem poinga poreke ngana ke ulolo. Pe mele nenge mene am heulinga nem, i toro mana ume nge iong ero. Imem lochloch nei pule.”
17 Pe Iosep hele, “Iau lape e poi ke pomam ero toto! Mele nenge mene ak heulinga, i toro mana lape tu ke ume nge iau. Pe imo lochloch ngana letemo elle mana pe ala mule nge tememo.”
Iuta Teke Mene Pensamin Munna.
18 Ol pe Iuta i lange Iosep pe hele ke teke, “Non soke iong o purpur toto ke mange ne Parao. Letem inin taua iau ero pe o longo at nge iau mukam.
19 Non soke nga lia nenge mo at lamai o onteia imem ke o teke, ‘Tememo kau tutu kura mau? Pe timo e pule kau tutu mau?’
20 Pe imem mo tuacholia ke mo teke, ‘Oe, tememem kou tutu kura pe i tuauna toto lo. Pe timem loina ngana kou tu pule. Tamem neu hoe iri ke iri nai mana pe tina kou mete lo. Pe tememem mutena tau tote i iange ha nga eteue nenge tuauna toto lo.’
21 “Ke het pe non soke, o hele at nge imem ke o teke, ‘A mene timo at nge iau ke e nau nge i.’
22 Pe non soke, mo hele lange iong ke mo teke, ‘Kol neu hile temene ero toto. Nenge teke ua temene ana, temene lape mete sapele.’
23 Pe non soke, o hele pule ke o teke, ‘Nenge teke a mene timo lomele ngana nem at ero, a at ke a lohot nga matak ero toto.’
24 Ke non soke, nga etue nenge mo la mule nge tememem, mo heleia lem helenga lochloch lange i.
25 “Ol pe hele at nge imem ke teke, ‘Ala ke aol mule ara ngaunga.’
26 Pe imem mo hele lange i ke mo teke, ‘Nenge teke timem nenge kino koko nge imem ero, mo sio la ero. Iange non neu lemene ero toto nge nau mule imem nga lamau. Pe nenge teke koko nge imem, nem lape mo sio la.’
27 “Pe non soke, temek hele at nge imem ke mai koi, ‘Imo a eteia ke lek hei hoe tutuk mur tatamanna nge nai.
28 Elle erue, pe iau e hele, “Ngana kou huros inolo e hune i ke mete lo.” Pe e nau mule i ero ol ke at heueu nei.
29 Pe nenge teke amene hote nei nge iau pe ute hune i, lape a poia iau ke letek kokol toto pe e mete sapele.’
30 “Ke o naue lo, kol nei ana mute nge temek palaungana toto. Pe nenge teke koko nge imem ke mola mule ero,
31 pe temek naue nakuna ero, i lape eingana uch pe mete sapele.
32 Pe pule iau laka nenge e nauele i. Pe e hele lange temek ke e teke, ‘Nenge teke e mene mule i at nge iong ero, lape e kulala mana ak helenga nge iong ol; nge lape o hele menmene iau nga etue lochloch ngana nenge e tu nga ich nei!’
33 “Ke pomalam non soke, e teke o longele kol nei ke la luluch nge titina mur pe iau e mene munna ke e tu lamai pe ume nge iong.
34 Nenge teke kol nei la mule nge temek ero iau lape e la mule ero pule. Iange lemek ero toto nge e esia ure meena ngana nenge lape lohot nge temek.”