45
Iosep Hemallaha Hote I Lange Titina Mur
1 Iosep longe ke mau pe teke tang ia titina mur pe alngana lange nena ume ana hana mur ke teke, “Imo lochloch ala nge hot mukam!” Te lange hot pe Iosep iri ul titina mur mana tetu ol. Ol pe Iosep hemallaha hot sapele i lange titina mur.
2 Pe Iosep tang hot ke soke toto pe Ekipto mur te longe pe tela ke te heleia lange iri lochloch ngana nenge te tu nga ne Paraoh nena pele.
3 Pe hele lange titina mur ke teke, “Iau Iosep koi! Pe temek kau maulul kura mau?” Pe titina mur te tuacholia nena helenga ero iange te matau toto nge te mes nga Iosep matana.
4 Ol pe Iosep hele lange titina mur ke teke, “A hele rochroi at nge iau.” Iok, te la rochroi nge i pe hele, “Iau timo Iosep koi, nenge a hekule iau pe hana te olia iau pe te mene iau at nge Ekipto!
5 Pe heueu nei letemo inin tau hel ero ol nga poinga nenge a hekule iau at lamai. Iange NeHalang isipona kulosia iau ke iau muka at lamai ke e halaua imo pe hehei pe hana lochloch ke a maulul.
6 Uringa palaungana lohot nga ich nei pe tu ke ana hesinga nai la ke ulolo. Pe hesinga iri lime te maloch kura. Pe hehei pe hana lape te tua ngaunga ero pe te lulu ngaunga ero pule.
7 NeHalang kulosia iau ke iau muka nge imo ke e halaua imo ke a mete hot ero, iange teke mene mule imo ke atu ke a maulul nga kue urana ngana nei.
8 “Ke pomalam imo a kulosia iau at lamai ero, NeHalang isipona kulosia iau at lamai. Pe poia iau ke e lohot ke iau non soke nenge e nauele hehei pe hana lochloch nga ne Parao nena pele, pe e nau ele kileng lochloch ngana nge Ekipto. Pe ne Parao nau haka mule temene nge iau.
9 Iok ol, ala mule ke ueiuei mana nge temek pe a hele lange i ke a teke, ‘Tum Iosep hele ke teke: NeHalang poia iau ke iau non soke nenge e nauele kileng lochloch ngana nge Ekipto. Ke pomalam o sio at nge iau ke ueiuei mana pe o poi ulul ero.
10 Lape o tu ke rochroi mana nge iau ol nga tuele kina nenge Kosen. Iong pe tutum mur pe lem tete mur pe lemo sipsip pe pulumakau mur pe lemo urelu lochloch.
11 O at ke o tu pe iau lape e nauele iong nga ngaunga, iange uringa ana hesinga iri lime kou maloch kura. Pe lemek ero nge iong pe tutum mur pe lem tete mur pe lem huros mur, a uri.’ ”
12 Pe Iosep hele lange titina mur ke teke, “E teke imo lochloch a eteia ke iau Iosep koi e hele lala nge imo nei. Pe Pensamin iong, o eteia iau ke nek iange tik toto laka iong.
13 Ala mule pe a hele lange temek ke a teke heueu nei, e lohot ke iau non soke nga kileng nenge Ekipto. Pe a hele lange i pule nga ure nemur nenge a naue iri ke ulolo. Pe a mene temek ke sio at ke ueiuei.”
14 Ol pe Iosep lau hite tina Pensamin pe tang pe Pensamin pule lau hite i pe tang.
15 Pe lau haka nge titina mur lochloch pe tangia iri. Nga etue neu ol Iosep titina mur te amneia ke singiria urana nge te hele luluch nge i.
16 Iok naunga-ala ana non nenge Ekipto pe nena hana papalaunga mur te iech mana nga etue nenge helenga song ke te teke Iosep titina mur kou te at ke tetu luluch nge i.
17 Ol pe ne Paraoh hele lange Iosep ke teke, “O hele lange titim mur ke o teke, ‘A tatach heke lemo ure mur nga lemo tongki mur pe ala mule nga ich nenge Kenan.’
18 Pe te mene temereia pe reria hehei mur pe tuturia mur pe te iat mule nge iau. Pe lape e tunge hote ich e nge Ekipto lange iri ke te kilia. Ich nenge urana toto pe ngaunga haka ia ke halang ke te ngau ia.
19 “Pe o hele lange iri pule ke o teke, ‘A mene ure ana tangakis hel nge Ekipto ke ala taua tutumo mur pe lemo hehei mur pe tememo ke imo ul ke a at mule.
20 Letemo una ia urelu nemur nenge a hile sue nga ich nenge Kenan ero, iange urelu urana ngana mur nga kileng nenge Ekipto lape a mene iri ke lemo ia.’ ”
21 Iok, Iakop tutuna mur te nanas mene ne Parao nena helenga pe Iosep tunge ure ana tangakis hel lange iri ke pomanga Parao hele ngana pe tunge aria ngaunga nenge kue ana pule.
22 Pe tunge iri elle pe elle reria hengeron mur. Pe Iosep tung ke Pensamin nena hengeron iri lime pe umtutuna iri ana non kina iri analoch pe lime (300).
23 Pe hekule ure urana ngana mur nge Ekipto lange temene pe tal heke iri nga tongki tatamanna mur nge iri analoch. Pe pule hekule uit pe ngaunga mur hel pule nenge aria kue ana pe tal heke nga tongki heheina mur nge iri analoch (10).
24 Ke het pe kulosia titina mur ke te la pe hele lange iri ke teke, “A la pe a hele inin tau hel nga kue ero!”
25 Iok te lohaka nge Ekipto pe la te lohot nge temeria Iakop nga ich nenge Kenan.
26 Pe te hele lange temeria ke te teke, “Iosep mete ero! I kou tu ke maulul kura. Pe heueu nei nauele kileng lochloch ngana nga tuele tana nenge Ekipto.” Iakop longe helenga neu pe letena umum ala pe letena manmanna ia ero.
27 Ol pe te heleia ure lochloch ngana nenge Iosep heleia lange iri. Pe esia ure ana tangakis mur nenge Iosep hekule at takisia i ke lange Ekipto pe letena urana mule.
28 Ol pe Iakop hele, “E manmanna lo! Heueu nei e eteia ke kolek Iosep kou tu ke maulul kura. Ke e lohaka pe e sio ke la e nau toto i mukam ke het laka pe e mete ol.”