8
Ech Hakarung
1 Pe NeHalang letena metene Noa pe huros mur lochloch nenge marana pe inolo nenge tetu luluch nge i nga mono. Pomalam kulosia tuttula ke hiurus ia ich pe ech hakarung sio sapele.
2 Ech nga ich letena pach haka ero ol pe pitte uch iange tapa sana ulala ero ol.
3 Pe ech hakarung hatalia ich ke nek mana. Ke etue ana non kina rahtele nai pe analoch (150) nem het ngana ech hakarung sio toto lo.
4 Ke nga etue analoch pe rahtele nai (17) nga teio paele nge muka ech soso hatalia mono nga hengene e nge Ararat.
5 Ech hakarung sisio ke lala pe nga etue elle ngana (1) nga metmete ana talinga lou hengene mokonkona mur te hota sapele.
6 Pe etue iri ana non kina nai het pe Noa lohe piunga sune nge umeia nga mono,
7 pe kulos hote ngie chochoang. Pe ngie neu lehe rara ke lala pe atat ke la ech soso hatalia ich.
8 Ol pe kulos hote ngie chaulum ke la nau tote kileng. Ech soso hatalia ich lo ma ero kura.
9 Pe chaulum neu la pe tango rara munna nge are iange ech salala hite ich kura pomalam la mule nge Noa nga mono. Pe Noa tul hote penna ke mene chaulum neu ke teu la mule nga mono.
10 Pe Noa kulala ke etue iri rahtele nai mule het pe kulos hot mule ngie chaulum neu nga mono.
11 Pe chaulum neu at mule nge i nga ulei pe koke ae Oliua ina nga hanna pe Noa hetei sapele ke ech soso hatalia ich lo.
12 Iok kulala ke etue iri rahtele nai het pe kulos hot mule chaulum neu. Pe neu ol ngie neu at mule nge i ero ol.
13 Noa ana hesinga lohot ke iri ana non kina iri ana non kina pe analoch pe elle (601) pe nga etue elle ngana nga hesinga neu ech soso tototo lo. Pe Noa al hatalia mono ona ke nau hot pe esia ich nge ona haka ke halal.
14 Pe nga etue iri ana non kina elle pe rahtele nai (27) ngana nga teio nai ngana, ich hal toto sapele.
15 Pe NeHalang hele lange Noa,
16 “Iok laol, iong pe lem hei pe tutum mur pe lem tete mur a lohot nga mono ol.
17 Pe o mene ure maulul ngana lochloch ngana nenge te tu luluch nge iong ke te hot tah. Ngie mur pe huros mur pe ure lochloch ngana nenge te amamo nga ich ke te hala lele ke iri halang toto nga ich.”
18 Ke pomalam Noa i hot luluch nge nehei pe tutuna mur pe reria hehei mur.
19 Pe huros mur pe ure maulul ngana mur nenge te amamo nga ich tei hot ke te nanas tau hel ia aria mata mur.
Noa Poi Tunginga Lange NeHalang
20 Iok laol Noa lung heke tunginga ana hatanga ke poi tunginga mur ia lange Non Soke. Pe mene huros lemlem ngana mur pe ngie lemlem ngana mur ke mak heke ke poi tunginga ia.
21 Pe Non Soke seke tunginga nemur inangaria pe hele, “Hehei pe hana te poia poinga poreke ngana pe e poia poinga nei ke tuacholia reria poinga poreke ngana mur. Pe lape e heporeke mule nge hehei pe hana nga ich ero ol. Nga etue nenge iri lolomele leteria tu mana nga poinga poreke ngana pe e tunge aria melenga lo. Pe nei ol lape e heporeke ure lochloch ngana nenge te maulul ero ol.
22 “Nga etue nenge ich nei tu,
ure nemur lape te lohotot;
ngaunga tua ngana pe ngaunga lulu ngana,
kileng lololo ngana pe kileng milang ngana,
chaia ana etue pe pitte ana etue,
kileng mesehe ngana pe kileng au ngana.”