7
Ech Taua Kileng
Ol pe NeHalang hele lange Noa ke teke, “Iong pe lem hei pe tutum mur pe reria hehei mur ateu langa mono iange iong toro mana o nanasia poinga nge pengpeng nga ich nei pe hulua lochloch ngana ero. O mene huros kuenkuena urana ngana mur - rahtele nai nge tatamanna pe rahtele nai nge heheina ke tela luluch nge iong. Nenge urana nge tuninga ana ia pule. Pe huros nenge urana ero o mene ke tamane ngana elle pe heina elle. Pe pule o mene ngie kuenkuena ngana mur - rahtele nai nge tatamanna pe rahtele nai nge heheina. Pomalam lape ngie ana mata elle pe elle tetu ke te maulul nga kileng lochloch ngana nga ich. Etue iri rahtele nai koi tu ol pe lape e hekule pitte ke sio nga ich. Pe pitte nem lape molmol ke etue iri ana non kina nai (40) pe miliko iri ana non kina nai (40). Pe lape e hemete ure maulul ngana lochloch ngana nenge e alahote iri ke tetu nga ich.”
Pe Noa poia ure lochloch ngana nenge Non Soke heleia lange i.
Ke ech taua kileng lochloch ngana nga ich nga etue nenge Noa ana hesinga iri ana non kina iri ana non kina elle pe ana non kina iri analoch (600). Pe Noa pe nehei pe tutuna mur nenge iri tatamanna pe reria hehei mur te tamu nga mono neu ke te eleis maul ngaria nga ech taungana ia kileng. Pe huros tamane nga e pe heina e nga nenge te lemlem nga NeHalang matana pe nenge te lemlem ero pe tamane nga e pe heina e nga ngie kuenkuena ngana mur pe ure lochloch ngana nenge te amamo nga ich, nachnai nge iri lochloch te teu la pule nga mono ke pomanga NeHalang hele ngana ia lange Noa. 10 Pe etue iri rahtele nai nga hoena ech talhun ke tau sapele kileng.
11 Ich hanna ulala pe ech pach haka pe tapa sana ulala pe ech pasiling sio. Ure nei lohot nga etue analoch pe rahtele nai ngana nga teio nai ngana nga etue nenge Noa ana hesinga lohot ke iri ana non kina iri ana non kina elle pe ana non kina analoch (600). 12 Pe pitte sisio nga ich ke etue iri ananon kina nai pe miliko iri ananon kina nai.
13 Nga etue nem pengpeng nenge pitte hesio Noa pe nehei pe tutuna mur, Shem pe Ham pe Iapet pe reria hehei mol neu te teu langa mono letena lo. 14 Luluch nga huros kuenkuena ngana mur nenge hinolo pe marana pe ure kuenkuena ngana mur nenge te amamo nga ich pe ngie kuenkuena ngana mur. Ngana laka ure kuenkuena ngana mur nenge saharia. 15 Ure lochloch ngana nenge te maulul iri nachnai teteu langa mono nge Noa. 16 Ke tamane ngana e pe heina e te teu la ke pomanga NeHalang helengana ia lange i. Te teu la ke ulo pe NeHalang piu hele sapele iri.
17 Pe pitte sio pe ech taua kileng ke etue iri ana non kina elle pe uch toto ero mana. Pe ech hot pe kon haka ke inhaka hote mono nga ich. 18 Pe ech tuain pe songia kikina ngana pe kon haka ke taua kileng lochloch ngana nga ich pe mono neu mana rara manmana nga ech ona ol. 19 Pe ech tuainin kura ke salala hite kileng lochloch ngana nga ich pe kon haka ke ristote hengene papalaungana mur nga kileng lochloch nenge tetu nga tapa ene. 20 Kon hite hengene nemur ke ana malang nenge haka langa ech ona lohot ke 6.5 mita. 21 Pe ure lochloch ngana nenge tetu ke te maulul nga ich te mete lochloch. Ure nenge pomanga ngie mur pe kolok mur pe huros inolo ngana mur pe ure nenge te amamo nga ich pe hehei pe hana lochloch. 22 Ke ure lochloch ngana nenge te tu ke eingaria tatah nga ich, iri lochloch ngana te mete. 23 Ke Non Soke hemete ure lochloch ngana nenge te maulul nga ich ke te het lochloch. Hehei pe hana pe huros nenge marana pe inolo pe ngie mur. Pe Noa i toro mana tu ol luluch nge iri nenge tetu luluch nge i nga mono.
24 Iange ech tautaua kileng ke etue iri ana non kina rahtele nai pe analoch (150).