6
Hehei Pe Hana Te Poia Poinga Poreke Ngana
1 Nga etue nenge hehei pe hana iri hulua toto pe te talun ke tetu purpure ich lochloch, te hoe tuturia heheina mur.
2 Pe NeHalang tutuna mur te esia hehei pe hana nga ich tuturia heheina mur nge nakuria urana mana. Pomalam muteria taua iri pe tesio at ke te mene hote hel nge iri ke te leia iri.
3 Pe Non Soke hele, “Opek nenge e tunge lange hehei pe hana ke te maulul lape tu ke koko ero iange iri lape te mete. Talun heueu nei pe la, lape e tung ke hesinga iri ananon kina lime pe ananon kina elle (120) nga mele tungana nga ich nei.”
4 Nepilim mur pule tetu nga ich nga etue neu pe nga hoena pule (nga ech tau ngana ia kileng rumena). Nga etue nenge NeHalang tutuna mur tema luluch nge hehei nga ich ke te hoe tuturia mur, te lohot ke iri hana kerkereng ngana mur nenge pingaria songong nge nike.
5 Non Soke naue ke hehei pe hana nga ich te poia poinga poreke ngana mur nge elela toto pe leteria tuanin ngana mur nga reria inga mur lohot nga poinga poreke ngana ke kokoes mana.
6 Non Soke ala hote hehei pe hana nga ich pe naue ke mau pe letena toto ia iri.
7 Ke pomalam Non Soke hele, “Iau e ala hote hehei pe hana nga ich pe heueu nei lape e hemelue iri ke mele e nge tu nga ich ero ol. Hehei pe hana pe ur inolo mur pe ngie mur nga tapa sana pe ure nemur nenge te amamo pule. E poia iri ke pomau pe letek meena iange e ala hote iri.”
8 Pe Noa i non nenge urana nga Non Soke matana.
NeHalang Halaua Noa Pe Nehei Pe Tutuna Mur
9 Nananga nenge Noa tutuna mur pe na tete mur koi nei:
Nga etue neu hehei pe hana te popoi poinga poreke ngana. Pe Noa i non nge pengpeng iange poia poinga poreke ngana e ero. Pe NeHalang iech toto nga Noa letena tuanin ngana mur pe nena poinga mur.
10 Noa tutuna mur iri mol, Sem pe Ham pe Iapet.
11 Pe NeHalang naue ke hehei pe hana lochloch nga ich te heul teua iri nga poinga poreke ngana ke het toto pe te hun helel nge iri.
12 NeHalang naue ich pe poreke toto nga matana iange hulua lochloch te tu teu toto nga poinga poreke ngana.
13 Pe NeHalang hele lange Noa ke teke, “Iau letek haka ke e teke e hemete hulua lochloch iange te heloko teu tote iri nga salaunga ana poinga pe te hun helel nge iri. Oe! Lape e heporeke tote iri luluch nga ich.
14 Pe iong o mene ae urana ngana mur hel ke o ume lem mono ia pe o tal totote ana tokola mur nga letena. Pe o taulue ure pilpile ngana nenge pomanga pulos letena pe nge hot ke meris ero.
15 Pe o umeia mono nem ke mai koi: Sase ngana o lope ke ana lome iri 300 mita pe pongponga ngana ana lome iri 50 mita pe ona ana lome iri 30 mita.
16 Pe o umeia ona ke pomanga pele pe opoia nenga tunangana ke ele haka pol ke luana elle (1 mita). Pe o umeia mono nem ana piunga nga ilina pe otal ke ana lung iri mol iange mono nem lape ana manga toto iri mol.
17 Iange Iau lape e poi hote ech ke hot ke taua kileng lochloch ngana nga ich ke hemete hulua lochloch pe ure lochloch ngana nenge eingaria pe te maulul pe tetu nge sio nga tapa ene. Ke ure lochloch ngana nenge tetu nga ich lape te mete lochloch.
18 Pe Iau lape e poia lek tomunga hele ana helenga luluch nge iong. Pe iong lape oteu nga lem mono luluch nge lem hei pe tutum mur pe reria hehei mur pule.
19 Pe o mene huros maulul ngana mur iri nachnai nga huros kuenkuena ngana mur lochloch ke teteu langa mono pule. E nge hei pe e nge tamane pe o nauele iri ke te maulul luluch nge iong.
20 Nachnai nga ngie kuenkuena ngana mur pe huros kuenkuena nga mur pe ure lochloch ngana nenge te amamo nga ich kuenkuena ngana mur, lape te lange iong ke o nauele iri ke te maulul.
21 Pe pule o lolochia ngaunga kuenkuena ngana mur ke o tatach teua langa mono ke iong pe lem hei pe tutum mur pe reria hehei mur pe huros nemur amo ngaunga ia.”
22 Ke Noa umeia ure lochloch ngana ke pomanga NeHalang hele ngana ia lange i.