39
Fotifa Kawana Yosefa Si Kitanuvadiiya
1 Tovanama Isimeni fasekwina Yosefa si niiya Itifita, Fotifa i vitamaniya kana kaetoḡa. Fotifa tanake o tuiyo kasi toviketanuneina. Tanake Itifita tufomu yana namoḡa tamo nakasina.
2 Yave o Yosefa nukusi keta yana ovivita nenei, iba matatafuna i savivinisiya o dewadewana. Kana tovisime tene Itifita yana numai i fakwa.
3 Fotifa i kitanisaiya Yave o Yosefa nukusi eketa iba matatafusi i savisavivinisiya o si dibwadibwana-dewadewa.
4 Noko nenei nuwatana i oviya keta i viya tauna kana kaetoḡa. Eketa yana numa sinena kana kaetoḡa matatafusi sinesiyai, Yosefa i tene-viketanuniya. Yota yana nogonogo matatafuna kasi kitavikavina fasinei nimanei i teniya.
5 Noko tovanama nenei keta i niya Yosefa nenei eketa Fotifa yana numa kana tofakwa kana dewadewana si nisaiya. Yana nogonogo matatafuna numa sinenei keta bagunai, Yave i sawanuwagabubuwisiya eketa dewadewasi.
6 Noko nenei eketa Fotifa yana nogonogo matatafuna kana visime fasinei o Yosefa nimanei i teniya. Keta muka tamo aviyavana fasinei ita nuwanuwa eatu yana kaaḡa fasinei o i kitavikaviniya.
Yosefa kana tufuwa dewadewana yota kotokiwaḡa.
7 Muka ita fakwa nubwayouna eatu Fotifa kawana si kitanuvadiiya keta si sawanuyakaniya be nukusi sita banuwa.
8 Eatu i dibutoyoḡa i bwaduwa, “Kaku tovisime muka ita vinuwana aviyavana tamo numa nofe sinenei fasinei uḡuna iyau nenekuwai ketake. Nogonogo matatafuna o iyau sifukuwai.
9 Iyau o numa nofe kana tovisime naki maise tanake, eketa muka tamo aviyavana ita sawatanai nenekuwai, eatu kwamiḡa kawana. Na uḡuna namaise ana fufunagoyo yo naki ana go'yona Guyau matanei?”
10 Tova matatafuna si vivikokoniya atu i didibutoyoḡa keta muka nukusi sita banu yota muka nukusi sita fakwafakwa.
11 Tova tamokaḡa Yosefa i kanasuna numai mudadava fasinei eatu tovanama nenei, muka tamo kaetoḡa numai ita fakwafakwa.
12 Eketa Fotifa kawana si niya Yosefa nenei keta kana kwame si gitoniya keta si sawanuyakaniya si bwaduwa, “Ku nemi ku banuweiki!” Eatu Yosefa i dibwana i kikinomana menanai atu kana kwame i venuteweiya gumayogu nimasiyai.
13 Tovanama si kitiya Yosefa naki i dibwana atu kana kwameḡa si givikaviniya,
14 yasi numa kana kaetoḡa si wenevakukusisiya keta si iyavisiya si bwaduwa, “Nofe kwa kitai! Namoḡa nofe tene Ibeniu kawaki i nemiiya kakaninama, i givisinemumuwita. I kanasunanemiya yama totomuwai keta nuwanuwana ita mataveikiya eatu ka fina.
15 Tovanama i nowaniya ka fina, i dibwana eatu kana kwame i venuteweiya niniukiyai.”
16 Eketa kwame si fakwiiya kana nivaniva kawasi i makaviniya i nemiya numai.
17 Yota tamoka sifufunama si iyaviya si bwaduwa, “Kaetoḡa tene Ibeniu ku nemiiya kakaninama, i kanasuna yama totomuwai nuwanuwana ita givisinemumuwikiya.
18 Eatu tovanama ka fina nenei, kana kwame i venuteweiya niniukiyai atu i dibwana i kikinomana.”
19 Tovanama Fotifa kawana i nowanisiya si bwaduwa, “Ya kaetoḡa nofemaise i fufuna nenekiyai,” eketa sinena i nubusubusuwaniya.
20 Tonuaviya i iyavisiya si tabiya keta deniyai si teniya. Kabainama o tufomu yana finisina fasisiyai.
Keta deninama sinenei o Yosefa i fakwa.
21 Eatu Yave tanake nukusi keta i nuwagabubuwiya na nenei keta i sawanuwagabubuwiya. Noko nenei keta deni kana tokitavikavina nuwatana i oviya.
22 Eketa finisina matatafusi keta mudadava matatafuna deni sinenei, Yosefa nimanei i teniya.
23 Deni kana tokitavikavina muka ita nuwanuwa mudadavasima Yosefa nimanei i teniya fasinei. Uḡuna Yave o Yosefa nukusi keta i ovivitiya nenei iba matatafuna i savivinisiya o naki dewadewana.