40
Finisina Nasi Nuwa Si Kavayuna
1 Tova tamokaḡa Itifita tufomu kana ukowa kana tokavenena kasi toviketanuneina keta maneka kana tokaguwana kasi toviketanuneina nukusi, si fufunagoyowa tufomu nenei.
2 Tobunanigesima nasi nuwa i nuwagoyowisiya,
3 keta deniyai i tenisiya tuiyo kasi toviketanuneina yana numai, namai Yosefa i fakwafakwa nenei.
4 Toviketanuneinanama Yosefa i teniya kasi kaetoḡa keta si fakwa simo matanubwayouna.
5 Nuwabuna tamokaḡa tufomu yana tobunanigesima, ukowa kana tokavenena keta maneka kana tokaguwana, si kavayuna. Nasi nuwa nuwabunanama nenei si kavayuna atu kasi kavayunasima kasi gigivina o tuninatunina.
6 Tova i katakiya nuwabuniyai tovanama Yosefa i kitisiya tafakaisi si kanawenonowa.
7 Eketa i nutoniisiya i bwaduwa, “Kimoki namaise yo nuwanuwa i munumunumi?”
8 Si nufata si bwaduwa, “Nuwabuna nama nuwa ka kavayuna eatu muka tamo aitevana kana fata be kama kavayunasima ina kiyau.”
Eketa Yosefa i iyavisiya i bwaduwa, “Guyauḡa kana fata kavayuna ina yausiya. Eyo kami kavayuna kwa iyaveiku.”
9 Eketa ukowa kana tokavenena i vibutuwa i nusifufuwa i bwaduwa, “A kavayuna a kitiya genefi unavina naukuwai,
10 eketa unavinama i vinaḡanaḡana naḡanina tonusi. Dadana si kikinomana, unavina si visisiya, si nuwatataisiya eketa uwasi si ouwa.
11 Eatu tufomu kana owa o a gigivikaviniya, na fasinei uwa a kigonuwa, utosi a bibitotoiya tufomu kana owai keta nimanei a teniya.”
12 Eketa Yosefa i iyaviya i bwaduwa, “Ka kavayuna kana givina nofemaise. Naḡani tonusi kana givina kuyadayada tonusi.
13 Kuyadayada tonusi ina kakavisiya muninei, tufomu debabouḡu ina katunakasiya eketa ina vinuwateweiwa eyo ina giyauwa keta ya mudadava manatuwaina nenei ina tenesavaviniwa. Nokomai tufomu nimanei kana owa kuna vioviya, manatuwaina ku fufufuniya maise tovanama ku vitokavenena ukowa kana tovai.
14 Tovanama kuta toḡadewadewa nenei, kuta tukukuwa. Ae unaku, kuta ovivitikuwa be tufomu kuta iyaviya fasikuwai ebe deni nofe sinenei kuta vikikinomanikuwa.
15 Tufomu kuta iyaviya aviyavana nenekuwai i kikinomana fasinei. Ibeniu fwayafwayana nenei namoḡa si givikavinikuwa si dibwanikuwa. Nofemai yota muka tamo aviyavana goyona ata fufuniya atu deniyai si tenikuwa.”
16 Tovanama maneka kana tokaguwana i nowaniya unana kana kavayuna Yosefa i yauya fasinei, nuwatana i oviya eketa Yosefa i iyaviya i bwaduwa, “Iyau yota a kavayuna, maneka feyawisi tonusi a afisiya.
17 Feyawa etanemokenei sinenei o maneka tuninatunina kakaguwanisi tufomu fasinei. Eatu debaboukuwai feyawanama nenei o manuwa si kakawa.”
18 Eketa Yosefa i iyaviya i bwaduwa, “Ka kavayuna nofemaise, feyawa tonusi kana givina kuyadayada tonusi.
19 Kuyadayada tonusi muninei, tufomu debabouḡu ina katunakasiya keta kayou sina nuonosiya eyo tofwau kai nenei sina sinavikukiya. Keta manuwa sina nemiya, kwafiniweu viyou sina kaniya.”
20 Kuyadayada tonusi i kakavisiya muninei, tufomu yana kafa tufuwa kana kuyadayada i nuvifotiya. Eketa yana kawakawa yasi ka i fufuniya. Ukowa kana tokavenena keta maneka kana tokaguwana i ketoyausiya keta si nemiisiya tufomu nenei kawakawa nausiyai.
21 Nokomai, ukowa tokavenena i teniya kana kiviyai eketa tufomu nimanei kana owa i viova-savaviniya.
22 Eatu tonuaviya i visimeisiya keta maneka kana tokaguwana kayona si nuonosiya keta tofwana kaiyai si sinavikukiya. Naki avana Yosefa i bwaduwiya, maisemoka i kikinomana.
23 Eatu ukowa kana tokavenena muka Yosefa ita tukuya, i vinuwataunuwiya.