41
Tufomu Kana Kavayuna
1 Manamana nuwesi i kakavisiya muninei, Itifita tufomu i kavayuna vitana Naeni ukowa kafakainei i misimisiniya.
2 Tovanama nenei bunumakau kasi 7 na kasi tufutufuwa yota kasi kita dewadewasi ukowei si vanenemiya keta nabenabe kafakainei, nimwau si kakawa.
3 Yota bunumakau kasi 7 kasi kita goyosi keta banibaninisi munisiyai si vanenemiya eketa niniusiyai si misiniya.
4 Kasi kita goyosi keta banibaninisi si misiniya keta kasi 7 na kasi tufutufuwa keta kasi kita dewadewasi, si kanisiya. Nokomai tufomu i kenoviniya.
5 Tovanama i banu-savaviniya, yota i kavayuna. I kitiya witi uguna tamokaḡa nenei, i foka 7 wanosi nakanakasisi yota dewadewasi.
6 Muniyai yota 7 si foka o wanosi kasi kita vitana fonimana inainana ita taoyayanisi eyo sita wenono.
7 Wano wenonosi si misinimoka tu wano nakanakasisi keta dewadewasi, si tononisiya. Eketa tufomu i kenoviniya atu i sanamaniya o i kavayuna.
8 Nuwabuniyai kavayunasima fasisiyai, nuwanuwa yaona i vaniya. Na uḡuna bwadu i vininitiya Itifita kana matatafu nenei yana toibaiba keta yana tonuwatasuyasuya fasisiyai, eketa si nemiya nenei. Kana kavayuna i nusifufuwisiya atu muka tamo aitevana kana fata be ita yausi nenei.
9 Atu tufomu kana ukowa kana tokavenena kasi toviketanuneina, tufomu i iyaviya i bwaduwa, “Ae aiye, kimoki yo yaku fufunagoyo a tukuya.
10-12 Manatuwaina tovanama maneka kana tokaguwana kasi toviketanuneina keta iyau, ku nuwagoyowikiya eketa tuiyo kasi toviketanuneina yana numa sinenei, deniyai ku tenikiya. Tovanama nenei tene Ibeniu tufunakasina tamokaḡa waniya nokomai. Tanake o toviketanuneinanama kana kaetoḡa. Nuwabuna tamokaḡa nama nuwa ka kavayuna. Kama kavayunasima ka iyaviya eketa kasi givina i yausiya nenekiyai o tuninatunina.
13 Avana i bwaduwiya, naki maisemoka i kikinomana. Iyau ku tene-savavinikuwa yaku kafa mudadava nenei, eatu ya tonuaviya ku visimeisiya keta maneka kana tokaguwana kasi toviketanuneina kayona si nuonosiya eketa tofwana kai etanei si sinavikukiya.”
14 Eketa tufomu bwadu i vininitiya Yosefa fasinei eketa muka mwanenena atu deniyai si oviya. Nauna kana mutukonokono i tanakakanuya keta kana nuya i dawanatamatamanina muniyai yo si niiya tufomu nenei.
15 Eketa tufomu i bwaduwa, “Nuwabuna a kavayuna, eatu muka tamo aitevana kana fata ita yauya nenekuwai. Atu a nowaniya avage tovanama avi kavayuna kuna nowaniya, ka fata kuna yauya.”
16 Atu Yosefa i bwaduwa, “Iyau muka kaku fata, eatu Guyauḡa kana kiyau dewadewana ina veniwa.”
Tufomu kana kavayuna nuwesi i nusifufuwiya Yosefa nenei.
25-32 Keta Yosefa na yana vimogumogu i bwaduwa, “Tufomu yo, ka kavayuna nuwesi kasi nuwanuwa naki tamokaḡa. Aviyavana tova kabegomokena Guyau ina saviviniya fasinei, neneweu i tene-kikinomaniya. Guyau naki i givifakiniya, iba nofe kabegomokena ina saviviniya. Nofe fasinei tamoka kavayunanama atu kawa nuwa i visawaveniwa.
Bunumakau kasi 7 na kasi tufutufuwa yota kasi kita dewadewasi, maise yota witi fokasi 7 nakanakasisi keta dewadewasi, kasi nuwanuwa manamana 7 mauna. Itifita kana matatafu ina mauna.
Bunumakau 7 banibaninisi yota kasi kita goyosi munisiyai si vanenemiya, yota witi fokasi 7 fisusi vitana fonimana inainana ita taoyayanisi keta sita wenono, kana nuwanuwa o manamana 7 nenesiyai noga. Manamana 7 mauna muninei, manamana 7 yota sinesiyai noga ina kikinomana. Eketa fiyao Itifita yasi mauna kana tova yawane sina vinuwataunuwiya, uḡuna fafani kana matatafu noga ina munuya.
Tufomu yo, nofe avana a bwaduwisiya o naki maisemoka Guyau kabegomokena ina saviviniya.
33 Tufomu yo, tamo namoḡa tosanamana atu na nuwatasuyasuyana kuta gibokiya be tanake Itifita kana matatafu ita visimeiya.
34 Menana tamokatamokaḡa nenesiyai kawakawa kuta vinuwadadanisiya. Ebe manamana 7 mauna yana tova nenei, tovanama kabwaga oyuna kasi tutuya nenesiyai, kawakawasima dawana 5 nenesiyai tamokaḡa sita gigivikaviniya.
35 Nofe kawakawasima maisa matatafuna sita kwakwiya. Ya visime nenei, menana tamokatamokaḡa nenesiyai maisa matatafuna yasi bonuwai sita totoisiya ebe sita kitavikaviniya namoḡa fasisiyai.
36 Nofe dawanasima yawane namoḡa ita vibiyawasisiya manamana 7 sinesiyai, tovanama noga ina kikinomana Itifita sinenei. Ebe nofe ketaketanama nenei, namoḡa muka vitanona nenei sita domuna.”
37 Tufomu yana namoḡa nakanakasisi nukusi ketaketanama nuwatasi i oviya.
38 Eketa tufomu i iyavisiya i bwaduwa, “Venemokena, Guyau kanununa o namoḡa nofe nenei, yota muka tamo namoḡa tonuwatasuyasuya venemokena yo tana nisaḡai maise tanake.”
39 Eyo tufomu Yosefa i iyaviya i bwaduwa, “Uḡuna Guyau o ibasima nofe i gikikinomanisiya neneweu, eketa muka tamo aitevana yana sanamana be yana nuwatasuyasuya maise kwaḡa.
40 Yaku kafa visime matatafuna kwaḡa nimaweu eketa yaku namonamoḡa matatafusi, ya visimesima sina muniisiya. Eatu wavaḡa kana vifotu fasinei o kwaḡa sifukuwai.”
41 Eketa Yosefa nenei i bwaduwa, “Nofe tova kwaḡa a ginakasiwa Itifita kana matatafu kana tovisime.”
42 Eketa kana nimabweuna vivigionina, nimanei i yauya keta Yosefa nimanei i sifwatamaniya yota kwame dewabauna i vikotoniya keta kodokodo nukawanamanamaneinana i viya keta kayonei i nuvisanigogwiya.
45 Eketa tufomu Itifita wavana Yosefa i veniya, Safeneti-faniya. Yota kawana i veniya kana wava Aseneti, Fotifena natuna. Fotifena o Oni yasi tovibwanaose. Eketa Yosefa naki i vitovisimeya Itifita nenei.
46 Yosefa i vibutuwa bunanige Itifita tufomu fasinei kana manamana 30 nenei. Noko muninei Yosefa i misiniya keta tufomu i venuteweiya eatu Itifita kana matatafu i vadadaniya.
47 Manamana 7 mauna yana tova sinesiyai fafani Itifita i maunafaga.
48 Noko manamanasima sinesiyai, Yosefa namoḡa i iyavisiya ebe kabwaga si ooyuna atu tufotufo si vakukusiya keta menaninama tamokatamokaḡa kana bonuwai i totoiya.
49 Dawana i kisiwaḡa si vimwanauḡuna maise numagama kwadewai, eketa kana ginaḡanaḡa Yosefa i onoviya.
53 Manamana 7 sinesiyai Itifita sinenei, mauna kana tova i kakaviya.
54 Eatu manamana 7 noga i vibutuwa, naki avana Yosefa i bwaduwiya maisemoka i kikinomana. Fafani matatafuna nenesiyai o noga nakasina i kikinomana, eatu Itifita yana kafa visimeḡa nenei o kabwaga i fakwafakwa.
55 Tovanama fiyao Itifita si vitanonamoka, si vikokona-bwedibwediya tufomu nenei kabwaga fasinei. Eatu tufomu i iyavisiya i bwaduwa, “Yosefa nenei kwa nai be avana ita iyavimiya maise, kwa savivinei.”
56 Fwayafwaya kana matatafu noga nakasina atu Itifita nenei o nakatamokena. Eketa Yosefa kabwaga kasi bonu i kiyauwa eketa fiyao Itifita nenesiyai i vikimwaneina.
57 Atu yota mani fafani nenesiyai noga i nakatamoka. Na fasinei namoḡa si nenemiya Itifita eketa Yosefa nenei kabwaga si vivikimwaneya.