42
Yakobo Natunatuna I Visimeisiya Si Niya Itifita
Eatu tovanama Yakobo i nowaniya vitana Itifita nenei kabwaga, natunatuna nenesiyai i bwaduwa, “Namaise yo kwa nigwanavaḡata. +Kwa vaneneḡa! A nowaniya vitana Itifita nenei kabwaga. Kwa sobu nokomai kwa vikimwane akata tana domuna.”
Eketa Yosefa sisitawaḡana kasi 10 si sobuwa Itifita kabwagavikimwane fasinei. Atu amasi i vinuwana vitana tamo avana goyona ita kikinomana Beniyamina, Yosefa kana tufunuwa nenei. Na fasinei muka ita visimeyei ebe nukusi sita nai nenei. Fafani Kenani nenei noga naki i goyomoka, na fasinei Yakobo natunatuna yota namoḡa yagwanisi nukusi si sobuwa Itifita kabwagavikimwane fasinei.
Noko tovanama nenei fafani matatafuna Itifita sinenei Yosefa i vivisimeiya, eketa namoḡa matatafusi nenesiyai kabwaga i vivikimwaneiya. Eketa tovanama sisitawaḡana si kikinomana, kaevavanei si koduwa fwayafwayai. Yosefa i kitakinanisiya eatu seba i teweiya vitana muka ita sanamaneisi eketa i kayosanakiya nenesiyai i bwaduwa, “Kwami namaniyei kwa nemai?”
Eketa si bwaduwa, “Kima Kenaniyei ka nemiya kabwagavikimwane yawagiki.”
Yosefa sisitawaḡana i kinanisiya atu tasike o muka sita kitakinanei. +Kana kavayuna i tukunakasiya fasisiyai eketa i bwaduwa, “Kwami tokitanaḡanaḡa kwa nemiya kwana sanamaniya kawasasa kafa kanasuna ebe yo nemaniyei kwana vibutukiya.”
10 Atu si nufata si bwaduwa, “Aiye, muka. Kima ka kaetoḡa ka nemiya o kabwagavikimwane yawagiki.”
 
21 Eketa tututausi nenesiyai si vikanusifusifufuwa si bwaduwa, “Noko tovanama nenei taita i bwedisitasita kana ovivita fasinei kana dauna ta kitiya eatu muka tata sineganiganiyei. Na fasinei nofe dauninama ta kakamukoniya o kita kata kuvana.”
22  +Eketa Nubeni i bwaduviyewa i bwaduwa, “Noko tovanama nenei a iyavimiya, ‘Muka gwadimonamona kwana givikuvavaniya.’ Eatu fonaku kwa teweiya. Nofe tova yana mate fasinei kita mwavinana ta ninisaiya.” 23 Yosefa o Itifita fonasiyai i nunusifufuwisiya keta togivina i gigiviniya nenesiyai. Na nenei si bwaduwa vitana muka yasi sifufu ita nowanowaniya.
Yosefa nenei sisitawaḡana kabwaga si vikimwaneya eketa si makavinisiya Kenani amasi nenei. Muniyai yota si makavina-savavinisiya Itifita kabwagavikimwane fasinei.
+ 42:2 Bunanige 7:12 + 42:9 Kabikona 37:5-10 + 42:22 Kabikona 37:21,22