45
Yosefa Tauna Wakakana I Siiya
4 Yosefa Ibeniu fonasiyai sisitawaḡana i iyavisiya i bwaduwa, “Simokaḡa kwa nemai niniukuwai.” Eketa si nemiya niniunei, eyo i bwaduwa, “Iyau taimi Yosefa. Gwadikuma kwa vikimwaneikuwa Itifita nenesiyai.
5 Noko fasinei muka nuwatami ina dauna be tututaumi kwana vikanuwanuwagoyo, kwa vikimwaneikuwa be a nemiya nofemai fasinei. Atu tanake Guyau i mikiteweikuwa a nemiya namoḡa kasi gifafafana fasinei.
6 Noga i nemiita manamana nuwesi. Eatu yota manamana 5 si nenemiya nenesiyai, muka tamo aitevana kana fata ina baguna o ina nukabwaga.
7 Guyau i mikiteweikuwa kunaumi ebe yawasimi ata gifafafanisiya ketaketa dewabauna nenei, ebe susukwa kiyakiyayana muka ina domuna fwayafwaya nofe nenei.
8 Nofe fasinei kwami muka kwata teweyeiku be ata nemi nofemai, eatu tanake Guyau i teweikuwa. Eketa i tenikuwa togivisawakedana tufomu fasinei, yota yana namonamoḡa yasi tuveka keta yota Itifita kana tovisime.
9 Nofe tova kwana dibwana amaku nenei eketa kwana iyaviya, ‘Natuu Yosefa maise i bwaduwa, “Guyau i tenikuwa Itifita kana tovisime nakasina. Eketa muka kuna nuyawayawanei nenekuwai.
10 Na uguniu kwata vikukuwayauna, be yami yomuyomu be waḡawaḡau nukusi kwata nemiya fwayafwaya Goseni nenei, niniukuwai kwata vimenana.
11 Ebe yo manamana 5 nenesiyai yawane noga ina niniya, ana kitikitimiya. Akata ka sabu nukusi vitanona nenei kwana fakwa.” ’ ”
25 Yosefa sisitawaḡana Itifita si teweiya atu si makavinisiya Kenani amasi Yakobo nenei.
26 Eketa amasi si iyaviya si bwaduwa, “Yosefa noko i fakwafakwa, muka ita mate atu tanake Itifita kana tovisime.” Eatu Yakobo si visabanutuiya eketa muka ita vitumaḡaneisi.
27 Atu matatafuna avana Yosefa i bwaduwiya maise si iyaviya. Keta yota Yosefa waganusoni i teweisiya kana kivitotoḡa fasinei, tovanama i kitisiya nuwatana i kanabunabuya.
28 Eketa i bwaduwa, “O bwadu venemokena. Natuku Yosefa gewa i fakwafakwa. Kwa niyeiku be natuku tafakaina a kitai, fonana a nowaniya, yo muniyai kwana teneviunikuwa.”