48
Ifeneimu Keta Manasa Kasi Sawanuwagabubu
1 Tamoka tova Yosefa i biganowana amana i visafwavinaḡa. Eketa natunatuna kasi nuwa Manasa keta Ifeneimu i ovisiya keta si niya Yakobo kana kita fasinei.
2 Tovanama Yosefa i kikinomana, Yakobo si iyaviya si bwaduwa, “Natuu Yosefa i nemiya.” Eketa Yakobo matamataveyai atu naki i fiwanemokiya keta i nuvitoiya kana kiviyai.
3 Keta Yakobo Yosefa i iyaviya i bwaduwa, “Fafani Kenani menana Nusi nenei Guyau Tofiwanaonaona i kenokikinomana nenekuwai keta nokomai i sawanuwagabubuwikuwa.
4 I bwaduwa, ‘Kimoki ka sabu ana givinakasiya. Susukwau ana givigeyaniya ebe kunuma yagwanina ina kikinomana. Yota fwayafwaya nofe ana venisiya susukwau yasi fwayafwayavaḡata.’ ”
5 Yakobo yana bwadu i nusaviya i bwaduwa, “Eketa natunatuu kasi nuwa Ifeneimu keta Manasa Itifita si tufuwa yo muniyai a nemiya o iyau natunatuku, naki maisemoka Nubeni keta Simiyoni.
6 Eatu muniyai natunatuu sina tufuwa, enao kwaḡa natunatuu. Eatu yasi fwayafwaya kana vitoniwaga fasinei o sisitawaḡasi Ifeneimu keta Manasa kasi wavai.”
13 Eketa Yosefa natunatuna kasi nuwa i niisiya Yakobo niniunei. Ifeneimu i teniya Yakobo kukikimawana, atu Manasa o kukikikataina.
14 Eatu Yakobo nimana i tewewenuya keta kikikataina gwadiyei Ifeneimu debabounei i teniya atu kikimawana o i teniya kotokikinuna Manasa nenei.
15 Eketa Yosefa i sawanuwagabubuwiya i bwaduwa,
“Guyaunama amaku Aisake keta waḡaku Ebenaamu nenei si kodukoduwa,
tufunakata nofe ita sawanuwagabubuwisiya.
Guyaunama yawasiku kana matatafu nenei i kitavikavinikuwa maise yomuyomu kasi tokitavikavina,
ita sawanuwagabubuwisiya.
16 Yota Guyau kana kaetoḡanama abamei i ofafafikuwa dauna matatafuna nenesiyai,
ita sawanuwagabubuwisiya.
A kawakawanunukuwiya be nofe tufunakatasima nenesiyai,
namoḡa kaku wava, amaku Aisake keta yota waḡaku Ebenaamu kasi wava, sita tukutukusiya.
Keta yota a kawakawanunukuwiya
be kasi sabu ita nakata fwayafwaya nofe nenei.”
17 Eatu tovanama Yosefa i kitiya amana kikikataina i teniya Ifeneimu debabounei muka ita sebobo. Na fasinei amana nimanei i ova be ita tenetamaniya Manasa debabounei.
18 Eketa i bwaduwa, “Amaku, na muka nemaise. Manasa o kotokikinuna. Na fasinei kikikataiu debabounei ku tenei.”
19 Eatu amana i vikununewanewa i bwaduwa, “Natuku, a sanamaniya avana a savisaviviniya. Kimoki Manasa kana wava ina nakata. Susukwanei yawane kunuma nakasina ina kikinomana. Atu taina o yawane nakatamataina yo tawaḡana. Eketa susukwanei yawane kunuma yagwanisi sina kikinomana.”
20 Eketa na kuyadayadanama nenei i sawanuwagabubuwisiya i bwaduwa,
“Avi tova fiyao Isineni yasi sawanuwagabubu kana tovai, kami wava sina kinana sina bwaduwa,
‘Guyau ka kawakawanunukuwiya be ita sawanuwagabubuwiwa vitana Ifeneimu keta Manasa i sawanuwagabubuwisiya maise.’ ”
Noko nenei Ifeneimu kana wava i teneviketanuniya eatu Manasa i vimunifota.
21 Eketa Yakobo Yosefa i iyaviya i bwaduwa, “Ku nowaniya, iyau o kabegomokena be ina kakavikuwa, eatu Guyau o kwami nukusi. Eketa yawane ina makavinimiya waḡawaḡami fwayafwayasiyai.”