26
Paul ana gudu i tarai
1 Ma Agrippa Paul i riwei, “A vianinem da ma babani.” Ma Paul urana i voepai ma ana gudu tarana i vikarei
2 i pa:
I ai kaua gulau Agrippa da amadodo tam au etara e rarautaniḡanei da Jew babadai ai viwavu awariu ana tere-vaijijimani.
3 Tau aramanei da tam mai Jew ai giu ma ai paripariḡai u aramanana-kauei. Lamna aubaina a vivibaḡaim da au paribelana ma rautaniḡanana-kauei.
4 Mai Jew anatapui au lawana i aramanei, aburu da marina, au dobu oina da au Jerusalem.
5 Taui rorova ava i aramaneu ma ina riwem da tau ai boru bagibagina ma piripirina, Pharisi au orana a rui ma tarawatu anatapuna a vojijina-kauei.
6 Ma marina a vivitumaḡana da God aiwai noinoita i parivainuaḡani ina kauei. Ma lamna aubaina tau weka a maimairi.
7 Wei parivai-nuaḡanana ata dam 12 e vipaipaiei da ina nei lamna aubaina ata rava i vipatutu ma marai ma waguvarai God e viviborumei. Au gulau wei vitumaḡanana aubaina mai Jew e viviwavuiu.
8 Aiwai aubaina o notanotai da God eḡa tagotagogina da rava iraḡelei ina vovaimairini?
9 Tau au naona a notai da aiwai anatapuna ata kauei da Iesu Nasaretei ata viḡaviei.
10 Ma anina lamna a kauei au Jerusalem. Pirisi ḡeḡetelerana babadai pepa i verei ma lamna i vovai-virewapaniu ma kerisiana vivivireii maḡamaḡaui au numa panipani a terei, ma nanare ai iraḡe a vianinei.
11 Mara maḡamaḡaui boru numai a naeni da kerisiana a vununaiei da ai tumaḡana ita boviei. Amlou i ḡaiḡai kaua da dobu ḡelaui a naeni kerisiana a baibaiei.
12 Mara tagogi pirisi babadai au Jerusalem pepa i vereu da rewapana i vereu ma a nae au Damaskas.
13 Ma aubenai nanare, tau au etanai a nenae ma a inanai, lalalaina marei i ḡairai ma i lalaiai, gamrina madeḡa i ḡetawanei! Au rava maiteni a bababara i lalaiai.
14 Anatapuiai a vipeuana au doa ma pona Hebrewei awariu i bababani. I riwa, “Saul, Saul aiwai aubaina e viviḡavieu? Tam e ḡoeḡoei da Tau ma viapoapoeniu wate eḡa da tam e viviapoapoena-melem!”
15 Ma a paridadana, “Bada tam aiai?”
Ma Bada i paribelei, “Tau Iesu, ravana tauna e viviḡaviei.
16 Wate ma vomairi. Tau a nei awarim da vaivai ata verem da ma vitaunola Tau aubaiu, ma amadodo aiwai u inanai ma aiwai ana viatataiem, ma vimatamatei rava awarii.
17 Tau ana gagaloem am rava mai Israel awarii ma nanare Jentail ravai awari, ma ana paritawanem Jentail awarii,
18 da matai ma vikalai, da ai lawana apoapoe ina voterei ma ina nei au lalalaina, ma Satan ana rewapana ina votere-tawanei ma ina nei God awarina. Tauna ai ḡoʼapoapoe ina nota-tawanei, ma ina taravaini natunatuna rarautanii, ai tumaḡana awariu aubaina.”
19 Lamna aubaina Gulau Agrippa, tau riwa marei au inana a inanai a voteletelei.
20 Au naona a jima mai Jew awarii au Damaskas ma nanare au Jerusalem ma Judea anatapuna ma muriai Jentail maiteni awarii. A jima da ai ḡoʼapoapoe ina votere-tawanei ma ina mae-tavirei God awarina, ma ai lawana ina vimataira da ai kaua apoapoe i voterei-tawanei.
21 Wei babanii aubaina mai Jew au Tempol i vojijiniu ma i ḡoei da ita viraḡeniu.
22 Wate God i vilawaniu da marina, ma weka a maimairi da a vimatamata rava muomuoi ma nanare rava ḡaeḡaei awarii. Aiwai a bababaniei lamna peroveta nununai ma Moses i ririweta ina tupua.
23 Taui i riwa da tauvilawana Keriso ina vinuapoapoe. Ma tauna ina iraḡe ma ina vinao da ina vomairi me ma wei matairana ina vinolanola da tauna God lalalaina mai Jew ma Jentail aubaii.
24 Weka Festus i vionaḡi ma i garara Paul awarina, “Tam u bua! Am aramana i vibuaim!”
25 Wate Paul i paribelei, “Au bada Festus tau eḡa ata bua. Tau aiwai a bababaniei lamna riwa kaua ma babani anona.
26 Wei kaua eḡa govagovaḡana ma aramanei da Gulau Agrippa anatapuna i aramanei, ma lamna aubaina ana tepatorau wei kauai ana babaniei awarina.”
27 Paul Gulau Agrippa i riwei i pa, “Peroveta e vivitumaḡanei bo eḡa? A aramanei da nanare!”
28 Ma Agrippa i paribelei, “U notai da tau laḡilaḡina ma sinaviraiu da ana vikerisiana!”
29 Paul i paribelei, “Laḡilaḡina bo amapo, a raraupari God awarina da tam ma rava anatapui wei au boruna ina tupua-vira me tau nanare wate eḡa sein maiteni.”
30 Anina ma gulau ma gavena ma Benisi i vomairi ma i nae.
31 Ma anatapui i nenae ma i babani vivira ma i vianina i pa, “Wei ravana eḡa aiwai apoapoena ita kauei da tana viraḡeni bo tana pani.”
32 Ma Agrippa Festus i riwei, “Mepa da eḡa ita vibaḡa ḡae Caesar awarina, lamna marina tata rupeni.”