27
Paul wagei i vaḡai nae au Rome
Festus mara i tereterei i ḡetai da tauai ata nae au Rome. Paul ma tau ma panipani ḡelaui maiteni au waga a geru ma a vaḡai Rome aubaina. Rome ai sorodia badana wavana Julius au urana i terelai. Tauna Caesar ana sorodia vinevinena. Waga Adaramitei i nei da a geru ma wagana i ḡota-nae au Eisia provins gerana. Oroto wavana Aristakas ana dobu Thesalonika au Masedonia provins tauna maiteni i geru.
Au maratomna au Sidon taon a ḡota, Julius ivina i ai Paul awarina ma i voterei da i opu au gera da ana rava ita raugenari ma ana ḡoana aiwai ita vibaḡei. Muriai wagei a opu da a nenae ma ive i verau-matamataniai ma lamna aubaina bonabona au Saipras ma dobu ḡaeḡaena au pouna au mulaḡina ambori. Ma boga ḡaeḡaena a bori da Silisia provins da Pamphilia provins geraii a voterei da au Maira taon a rui au Lisia provins Au Maira taon kampa sorodia badana mai Egypt ai waga Alexandriei i nenae au Italy kampa i vigeruiai. Ma aupom maḡamaḡaui nuatauai a ruba ma a voia guratana da Cinidus taon a tuḡereḡerei wate ive i verau-matamataniai da kampa waga a virai da Crete bonabonana ma mutu Samone au poui au mulaḡina a nae. Ma kampa nuatauai bonabona Crete gerana a naeni aubaina mara i apoapoe ma a ḡeta dobu e ḡoreḡorei U Aiaina, Lasea taon au ḡereḡerena.
Mara ḡaeḡaena a vine-boai au vaḡai* ma Rupena Ujina marana boiboḡi i kwa, marina lamna ive ma rabama ai mara ma boga babarana i vinirovorovo. 10 Ma Paul i riwa, “Nelara, malana a vaivaia da ata vaḡai ina apoapoe kaua ma waga ma purapura tana vine-boa-pai. Ata lawana maiteni tana vineboai.” 11 Wate sorodia ai bada, kapena ana babani i rautaniḡanei ma eḡa Paul da kampa ata mae ma eḡa ata nae. 12 Wei gabuna eḡa ita ai wei ivena au marana ma rava maḡamaḡaui i goei da waganei ata nae da Phinix una, Crete au bonabonana da kampa ata mae da bodu ita kwa. Wei u ḡaeḡaena ma mutuii lavarata ma rauanaḡa e vinao-vereverei, da au mulaḡina e mamae.
Kojikojira Ḡaeḡaena
13 Maranai rauanaḡa i vikarei ma waga ravai i notai da marina mara aiaina da ita nae au Phinix una. Ma anika i taini ma Crete bonabona geraei i nae. 14 Ma eḡa barana ita uama ma kojikojira olei iveiai. 15 Ive wagana i verau-matamatani ma waga eḡa tagotagogina da ita vobelei ma i voterei da ive waga i avara-opunei. 16 Bonabona aburuna Kauda gerana au mulaḡina a ruba ma kampa a voia guratana da dingy a terepai au waga da a ragita-jijini. 17 Wei i kauana vorovei ma ḡuravei waga au gabaurina da waga adana i raḡita-kwaviviroi. Taui i rovo mepa da au maratete ina amḡaena au Syrtis,§ Libya au gerana. Lamna aubaina ḡuravei ai da kuka, i raḡita-tagogiei ma au boga i viorereni da waga ita bibi. Ma i voterei da kojikojira waga i avara-naiei. 18 Maratomna kojikojirana i rarau-guratanelei da purapura ḡelaui au boga a viorereni. 19 Aupom vitonuina taui waga purapurai i viorereni au boga. 20 Kojikojira i ruba da aupom biaḡa da madeḡa ma ubona i purui. Ravai ai nota i kwa.
21 Wei au marana rava au waga am i kauana-avei, anina ma Paul i vomairi ma taui i riwei, “Nelara ota rautaniḡaneu ma Crete eḡa tata oputawanei, amapo waga eḡa tata viapoapoeni ma ata purapura eḡa tata vineboai. 22 Wate a ririwana-guratemi da eḡa orami ina peu! Aubaina avena da waga ina monu wate eḡa ina iraḡe. 23 God lamna tau au Bada ma ana taunola tau. Waguvarai God ana anela i paritawaneiai awariu. 24 Ma i riwa, ‘Eḡa ma rovo! Tam anina da Caesar au naona ma etara! Ma ḡelauna lamna God ana nuavaina maemaena rava anatapui maiteni e vaḡavaḡai ina lawana.’ 25 Lamna aubaina tepami ina tora! Aubaina tau God a vivitumaḡanei ma menanare i ririweia nanarena ina tupua. 26 Wate tauta au maratete tana amḡaena.”
27 Kojikojira i avara-naielai au Mediteranean Bogana da aupom 14 i kwa ma nubautuva waga ravai malana i vaia da taui gera i tuḡereḡerei. 28 Ma barawa au giana ḡaima i raḡini ma au boga i tawanana-ḡairei da topa ana gabinou ita aramanei. Ma i aramanei da 40 meter ma i mae aburuna ma i raudadana-melei lamna marina 30 meter. 29 Ma taui i rovo mepa da rabama waga au kira ina viairikarikai lamna aubaina waga au ipuna anika 4 i tawana ḡairei ma i vipaipai da mara ina tom tawanana. 30 Ma waga ravai ai kaua i kaukauei da ita ruba-govaḡa. Ma i vioga da dingiei ita opu waga au naona da anika ita dubara-naiei, ma lamna aubaina dingy i teretere-ḡairei au boga, 31 Wate Paul sorodia ai bada maiteni i riwei, “Mepa da waga ravai ina rubatawanemi lamna anatapumi ona iraḡe.” 32 Ma sorodia dingy ḡuravana i borituini ma dingy kwakwavina i peu au boga ma i avara-naiei.
33 Ma maratomtomai Paul rava anatapui i egari da ita am, i pa, “Taumi marina aupom 14 rovo i kauemi ma eḡa ota am.” 34 “Tau a vivibaḡa-guratemi da ona am da ona virewapana, eḡa aiai tagogi ina iraḡe.” 35  Paul i babani vorovei ma au matai palawa i vaia, Bada i viegualauei ma i vogimai ma i ani. 36 Ma rava anatapui inanai ma orai i bagibagi ma am i vikarei. 37 Tauai anatapuiai 276 au waga. 38 Ma rava anatapui i am da i am-iaua. Ma witi baikei au boga i viorereni da waga ita votelatelai da au gera ita ḡota da avena ita amḡaina.
Waga au maratete i amḡaena
39 Maranai mara i tom tawanana taui dobu i ʼnanai wate gerana eḡa ita aramanei, wate U inanai da gerana aiaina ma i notai da gerana aiaina da waga kampa ita viḡaeni. 40 Anina ma anika ḡuravai i viaituituini, ma labilabi i tere-ḡairei, ma waga au naona kuka voaburunei i votawatawanei ma gera aubaina i ruba. 41 Wate waga au maratete i amḡaena da i tapaiei, ma rabama waga ipuna i viairikarikai.
42 Sorodia i ḡoei da panipani ita viraḡeni, da avena ita toa-ḡaira au gera ma ita viruberubei. 43 Wate sorodia ai bada i ḡoei da Paul ita vilawani ma i viḡaei, anina ma ai viogatara eḡa ita kauei. Ma taui aiavoi toa i aramanei i egari da i viauepa au boga ma i toa-ḡaira au gera. 44 Ma ḡelaui aiwai da i tenatenam i vidauei. Ma nanare anatapui lawalawaii au gera i ḡota.
* 27:9 Iri i parei da kojikojira ana mara ma i vaḡai. 27:9 Eng. Atonement bo Yom Kippur marana wei lamna September bo October rabama ma ive ai mara 27:14 Kariwabu ḡaeḡaena § 27:17 Wei lamna maratete.