14
Abram, Lot i vai-melei
11-12 Gulagulau 4 Sodom ma Gomorah ai purapura ma ai lam i kwalei. Abram maiana Lot au Sodom i mamae i vaia ma ana purapura maiteni i vaia ma i nae.
13 Abram tauna Hebrewei ma Mamre ana ai ḡaeḡaena au ḡereḡerena i mamae. Ai taniwagana wavana Mamre tauna Amoriei, varevareina Eskol ma Aner. Anatapui Abram ana tauagu, ḡavia au marana. Ma oroto tagogi ḡavia i rovoei da i rovo-nae ma i ḡeta Abram awarina ma i vibenabenamei.
14 Ma maranai Abram i nonori da taui maiana Lot i vaia. Tauna ana sorodia vinevinei ana au melagai tuputupuai 318 i kwatuei. Ma ḡaviḡaviai i votaḡoi da i ḡae au Dan.
15 Waguvarai ana sorodia i ḡutai ma ḡaviḡaviai i viaḡaḡei da Damaskas i verautuini da au Hobah i ḡeta ma kampa i vovaiubai.
16 Purapura anatapui i vai-melei. Maiana Lot ma ana purapura ma waivine ma rava ḡelaui.
Melkisedek, Abram i viaiaini
18 Melkisedek tauna Salem ai gulau ma God Aidamo Telarana ana pirisi pulo tauapuina. Palawa ma wine i neiai,
19 ma Abram i viaiaini ma i pa,
“God Aidamo Telarana mara ma dobu taukaueina,
ina viaiainim.
20 Ma God Aidamo Telarana am ḡavia au uram i terei,
lamna aubaina tana voepaepai.”
Ma Abram aiwai ana sorodia maiteni i tami i vitagogiei da ḡuta 10 i kauei. Ma ḡuta tagogi i votawanei ma Melkisedek i verei.