15
Bada, Parivainuaḡana bagibagina Abram maiteni i kauei
Ma muriai Bada Abram ana au rauboni i riwei i pa, “Abram eḡa ma rovo. Tau am taugagalo am pulo ḡaeḡaena.”
2-3 Ma Abram i paribelei i pa, “Oo Bada God. Tau eḡa natunatu, ma am pulo eḡa ina voaguiu. Tam eḡa natu orotona uta vereu ma lamna aubaina au iraḡe au murina, Eleasar au taunola Damaskasei au vigulau ina vaia.”
Anina ma Bada i riwana-melei i pa, “Eḡa! Tauna am vigulau eḡa ina vaia, wate natum orotona tamei ina tupua, tauna am vigulau ina vaia.”
Anina ma Bada tauna i taravaina-opunei au doa ma i riwei i pa, “Ma ḡoutata au mara ma ubona ma inanai, mepa da tam tagotagogina da uta iavi. Lamna am epaepaia ina maḡa me ubona nanare. Eḡa aiai tagotagogina da ina iavi.”
Abram, Bada riwana i vitumaḡanei ma lamna aubaina Bada i riwa da Abram rava jijimanina.
 
12 Ma maranai madeḡa i neneulai ma Abram i matave-nuavuru kaua. Ma gimtona ma rovo ḡaeḡaena i nei ma i purui. 13  Ma Bada i riwei i pa, “Wei ma aramana-kauei! Am epaepaia ina vitaomana au dobu ḡela ma kampa ina vitaunola. Ma dobuna ravai* taui ina rau-iviapoapoelei da madeḡa 400 ina kwa. 14  Wate muriai tau nai dobuna ravai ana kovoḡi ma am epaepaia ina vipurapura kaua ma ina nememei. 15-16 Ma mai Amori ai ḡoʼapoapoe ina rata guratana, ma nai maranaina ana kovoḡi ma ana viaḡaḡana-opunei wei au dobuna. Ma lamna aubaina am epaepaia eḡa ina nei laḡilaḡinai da kimta au vi-four-na. Wate tam, Abram ma magura kaua ma ana nuaubam ma iraḡe ma ina doboim.”
 
15:13 Exo 1:1-14; Act 7:6 * 15:13 Mai Egypt. 15:14 Exo 12:40, 41; Act 7:7 15:15-16 Nai maranai, mai Amori ma mai Canaan au dobuna Canaan i mamae.