Peroveta
Jonah
ana buka
Pariverena
God ana peroveta Jonah i kwatuei da au Niniveh ita raugugula. Wate tauna eḡa ita ḡoei da ana dobu ravai ai ḡavia wariaḡana awarii ita raugugula.
God i rauaḡaiḡaiei ma iana tauna i lawani. Au murina, i nae au Niniveh ma i nelaḡai da mai Israel ai ḡavia, God riwana i votetelei.
1
Jonah Bada i rauaḡaiḡaiei
1 Mara tagogi Bada, Amitai natuna Jonah i riwei,
2 “Ma vomairi ma nae au taon ḡaeḡaena Niniveh. Ma riwei, da ai ḡoʼapoapoei a inanai da i rata kaua ma lamna aubaina ana kovoḡi.”
3 Wate Jonah, Bada i voterei ma etanai ḡelauna i vaia ma ina ruba ḡaira au Joppa. Ma kampa waga i nenae au Tarshish i nelaḡai. I vimaia ma i geru da ita nae. I notai daBada ita ruba govaḡei.
4 Wate Bada kojikojira ḡaeḡaena i paritawanei da waga ita viairikarikai.
5 Waga ravai ai lawana aubaina i rovo-kaukaua ma ai god awarii i tou agu aubaina, ma purapura au boga i viorereni da waga ita telatela. Wate Jonah waga au orana i raunuavuru.
6 Kapena i ḡaira awarina ma i eni i pa, “Mara i apoapoe ḡaḡa ma e matamatave! Ma vomairi, ma tou am god awarina da ina voaguita. Mepa da ina raunuʼapoapoeleta da eḡa tana iraḡe.”
7 Waga ravai i babani vivira i pa, “Ḡaima tana vikalokaloei da tana aramanei aiai ana wavu.” Kalona i kauei ma wavuna Jonah awarina i peu
8 Ma taui Jonah i paridadanei, “Aiwai aubaina kojikojira awarita i peu? Tam aiai? Tam am nola aiwai, tam meiei?”
9 Jonah taui i paribelei i pa, “Tau Hebrewei ma tau Bada, Mara ana God a voepaepai, Tauna boga ma doa i kauei.”
10 Waga ravai i rovo kaukaua ma i vigaragararei, “Aiwai aubaina lamna u kauei!” Jonah boiboḡi i vieḡa da tauna Bada i rovoei da i rubaruba.
11 Mara i apoapoe kaua ma taui Jonah i vitaravirevirei, “Aiwai tana kauei da kojikojira ina kwa?”
12 Jonah i riwa, “Ona tawaneu au boga ma ive ina raumairiei. Aramanei da tau au kauelei wei ivena i vomairi.”
13 Wate waga ravai i lare-guratana da waga ita ḡairei au gera, wate eḡa tagotagogina, kojikojira i voguratei.
14 Anina ma taui anatapui i tou Jonah ana God awarina i pa, “Oo Bada! eḡa ma voterelai da wei ravana ana ḡoʼapoe aubaina, ana iʼraḡe, ma eḡa tarana wavuna ana avarai!”
15 Ma Jonah i vojijini ma i tawana-opunei au boga ma maratagogi kojikojira i wanatuini ma daumora i matave.
16 Ma ravai i rovoana-kauei da pulo i apui Bada awarina ma i parivainuaḡani da tauna ina vivirei.
17 Wate Bada iana ḡaeḡaena i paritawanei da Jonah i lawani. Ma Jonah iana au manawana i mae aupom ma waguvara tonuḡa.