11
Iesu i rui au Jerusalem
(Matthew 21:1-11; Luke 19:28-40; John 12:12-19)
1 Ma maranai Jerusalem i tuḡereḡerei ma i rui au Betphagi ma Bethani au ola Olives. Ma ana tauvotaḡotaḡo ruaḡa i paritawanei,
2 ma i riwei i pa, “Ona nae au melagai au naomi. Maranai o ruirui, kampa donki natuna ḡaubo, raḡiraḡitana ona nelaḡai. Tauna eḡa aiai ita geru-dadanei. Ona rupeni ma ona neiai.
3 Mepa da aiai ina paridadana, ‘Aiwai aubaina wei o kaukauei?’ Ona riwei, ‘Bada e ḡoeḡoei ma maratagogi ina paritawana-melei.”
4 Ma i nae ma donki ḡaubona au doa au metaeta raḡiraḡitana i rupeni.
5 Rava ḡelaui kampa i maimairi i paridadana i pa, “Aiwai o kaukauei donki ḡaubona o ruperupeni?”
6 Ma i paribelei me Iesu i ririweia nanare ma taui i voterei da i nae.
7 Taui donki i neiai Iesu awarina ma ai puru au uporana i tawana-epai ma au tepana Iesu i kiala.
8 Ma rava maḡamaḡaui, ai puru au eta i ebani ma ḡelaui, ai rugurugu i tarataraia i ebani.
9 Taui i vivinao ma taui au muri i nenei i garara:
“Hosanna!”
“Viviaiainana tauna Bada au wavana e nenei!”
10 “Viviaiainana amata David ana vigulau e nenei!”
“Hosanna au aidamo telarana!”
11 Iesu i ḡeta au Jerusalem ma i rui au Tempol ma anatapuna i tuvirevirei ma au i biga aubaina, i opu me au Bethani, taui 12 maiteni.
Iesu, damala aina i parivai-irairaḡeni
(Matthew 21:18-19)
12 Ma marana i tom, taui Bethani i opu-tawanei ma Iesu am-iraḡe.
13 Au weia ma damala aina i ʼnanai ana ruguruguna. Ma i nae da ita inanai da i ua bo eḡa. Maranai kampa i ḡeta, eḡa aiwai ita nelaḡai. Anina ai ruguruguna ava, aubaina eḡa damala ana mara.
14 Iesu, damala aina i riwei i pa, “Eḡa aiai amadodo ma amapo anom ina am-melei!” Ma ana tauvotaḡotaḡo i nonori aiwai i latoni.
Iesu, taugimara tempolei i viaḡaḡana-opunei
(Matthew 21:12-17; Luke 19:45-48; John 2:13-22)
15 Maranai taui i ḡeta au Jerusalem, Iesu i rui Tempol garina au orana ma taugimara i viaḡaḡana-opunei, mane tauviraina ai kepakepa ma gabubu taugimareina ai anikiala i vitauvirai.
16 Ma i viḡaei da eḡa aiai ana gimara Tempol au orana ita avarai-naiei.
17 Ma rava i viararamani i pa, “I girugirumia nanare,
‘Au numa ina ḡorei pari numana
dam anatapui au dobu aubaii.’
Wate taumi o vovirai da kwalakwalai ai guba.”
18 Pirisi Babadai ma tarawatu Babadai i nonori ma i ogei da ita viraḡeni. Taui, Iesu i rovoei aubaina patara ana viararamana i baiei.
19 Ma au bigai Iesu ana rava, Jerusalem i opu-tawanei.
Damala aina i poi
(Matthew 21:20-22)
20 Ma ubaubanai taui i nenae ma damala aina i ʼnanai anatapuna i poi.
21 Peter i notai ma i riwa “Tauviararamana ma inana! Damala aina u parivai-irairaḡenia i poi.”
22 Iesu i paribelei, “God ona vitumaḡanei!
23 A ririwana-kauemi. Rava wei olana ita riwei, ‘Ma vomairi ma au boga ma tawanem!’ Ma nuanuana eḡa ina raḡaraḡa ma ina vitumaḡana da aiwai e ririweia, ina tupua.
24 Lamna aubaina a ririwemi. Aiwai ami au pari o vibaḡei, ona vitumaḡana da taumi boiboḡi o vaia ma ina viḡarimiei.
25 Ma maranai e raraupari, au naona rava anatapui ai ḡoʼapoapoe awarim ma nota-tawanei. Ma nanare amam au mara am ḡoʼapoapoe ina nota-tawanei.”
Jew babadai, Iesu ana vibadana i vitarapiriei
(Matthew 21:23-27; Luke 20:1-8)
27 Taui i nememei au Jerusalem ma Tempol au orana i bababara. Ma Pirisi Babadai, Tarawatu Babadai ma dogadogara i nei Iesu awarina.
28 Ma i paridadanei i pa, “Aiwai vibadanei wei kauai e kaukauei? Aiai vibadana i verem da wei kauai uta kauei?”
29 Iesu i paribelei i pa, “Au vitaraviravira tagogi ana terei ma ona paribeleu. Ma ana riwemi; aiwai vibadanei wei kauai a kaukauei.
30 Aiai, John taubabataito vibadana i verei da rava ita babataitoi, God bo rava? Ona riweu!”
31 Taui i vitarapiri vivira, “Mepa da tana riwa, ‘Godei.’ Tauna ina riwa, ‘Ma aiwai aubaina eḡa ota vitumaḡanei?’
32 Wate eḡa tana riwa da, ‘Ravei.” Taui rava i rovoei, aubaina rava anatapui, ai nota da John anina peroveta.
33 Ma i paribelei, “Tauai eḡa ata aramanei.” Iesu i riwa, “Tau nanare eḡa ana riwemi aiwai vibadanei wei kauai a kaukauei.”