16
Iesu i vomairi
1 Ma Sabat au murina, Mary Magdalene ma Mary - James keikeina alona ma Salome, bunama ḡabuḡabui i gimarai da i naiei da Iesu tupuana ita buloi.
2 Ma Sunday ubaubanai boiboḡi maranai madeḡa i gogogo, taui i nae au kokoaga.
3 Ma i nenae ma i bababani, “Aiai aubaita ḡaima kokoaga au metaetana ina kaipeura-tawanei?”
4 Maranai taui i taepai, i ʼnanai da boiboḡi ḡaima i kaipeura-tawanei - ḡaima ḡaeḡae kaukauana.
5 Maranai i rui au guba ma oroto laragana ana gara ararapoirina i ʼnanai au oiena. Ma taui orai i auepai.
6 Oroto laragana i riwa, “Eḡa orami ina auepai, taumi, Iesu Nasaretei o baibaiei bo? I tupatuparatuia; tauna i vomairi! Ona inana, tauna eḡa weka! Taui weka taubeuna i vimataveni.
7 Marina ona nae ma ana tauvotaḡotaḡo ona riwei, ma Peter eḡa nuanuami ina vuru da Iesu e vivinao au Galili. Kampa ona inanai i ririwemi nanare.”
8 Taui i opu ma kokoagei i viruberubei ana ini sisisi ma ana rovoi. Taui i rovo kaua, lamna aubaina eḡa rava ita riwei.
Mark 16:9-20
Mark Riwana Aiaina damona lamna wariaḡa i vine-boai. Ma rava ḡelauna aiwai i notanotai nanare au vs 9 da 20 i girumi. Wei damonana weka i vikarei.
Iesu, Mary Magdalene awarina i eḡa
9 Iesu iraḡelei i vomairi me au Sunday ubaubanai boiboḡi ma i ainae da Mary Magdalene awarina i eḡa. Maraotai Iesu, Mary awarina arua-apoapoei seven i viopuni.
10 Iesu, ana tauvotaḡotaḡo i vivinuabola ma i toutou ma Mary i ḡeta da i pariverei.
11 Ma Mary i pariverei da Iesu i lawana me ma tauna matanei Iesu i ʼnanai. Wate taui eḡa ita vitumaḡanei.
Iesu, tauvotaḡotaḡo ruaḡa awari i eḡa
12 Wei au murina Iesu inanana tapuna ma ana tauvotaḡotaḡo ruaḡa awari i eḡa; maranai taui i nenae au melagai.
13 Taui i naeme ma tauvotaḡotaḡo ḡelaui i vieḡei. Wate taui nanare eḡa ita vitumaḡanei.
Iesu, Taui 11 awari i eḡa
14 Muriai taui 11 i amam ma Iesu awarii i eḡa. Ma i eni aubaina taui orai i bado ma eḡa ita vitumaḡana maranai rava, i riwei da Tauna i vomairi me.
15 Iesu ana Apasol i riwei, “Ona nae dobu au anatapuna. Ma God Riwana Aiaina ona jimei rava anatapui awarii.
16 Aiai da i vitumaḡana ma i babataito; tauna ina lawana. Ma aiai da eḡa ita vitumaḡana ina kovoḡi.
17 Ma taui aiavoi da i vitumaḡana, rewapana ina verei da kaua babai ina kauei. Ma arua-apoapoei ina viopuni ma pona tapunei ina babani.
18 Taui, mota uraiei ina vaia ma waiawa ina umai ma eḡa ina rauputei. Ma urai doridoriai au kolai ina terei ma ina lawana.”
God, Iesu i ḡaiei au Mara
19 Bada Iesu, awari i babani vorovei. Ma tauna i ḡaiei au mara ma God au oiena i kiala.
20 Tauvotaḡotaḡo i opu ma dobu au anatapuna i raraugugula. Ma Bada, taui i voagui ma kaua babai i kaukauei da tauvotaḡotaḡo aiwai i bababaniei i vovai-virewapani.