13
Taurauivu Canaan i tuvirevirei
1 Bada Moses i riwei i pa,
2 “Mai Israel ai dam 12 au orai rewapana tagotagogi ava ma vinei, da ma paritawanei da Canaan dobuna ina ivui, wei dobuna mai Israel a vereverei.”
3 Ma Bada i ririweia nanare Moses i kauei. Mai Israel ai dam 12 babadai i paritawanei. Taui ai ḡaravu au mutulua Paran i voterei da i nae au Canaan.
17 Maranai Moses ravai i paritawanei da dobuna ita ivui ma i riwei i pa, “Au Negev ona virautua da dobu violaolana ona naeni da au navanava ḡelauna.
18 Dobu ona tuvirevirei, ma ana patara ona inanai menanare, rava ai maḡa ma ai rewapana bo ai ḡokokokara?
19 Doa maumaurana bo eḡa? Ai melaḡai ona tuvirevirei, garigarina bo e mamae lota?
20 Doa maumaurana bo eḡa? Ai e gogogo bo eḡa? Ma ona kauana-guratei da ai anoi ḡelaui ona purai da ona neiai.”
21 Anina ma taui dobuna i naeni, au mutulua Zin i vikarei ma dobuna i naeni da au gia dewadewana au Rehob, wei lamna Lebo Hamath au ḡereḡerena.
Taurauivu i nememei
25 Au pom 40 taurauivu dobu i tuvirevirei ma i nememei,
26-27 I nei Moses, Aaron ma Israel patarai awari au Paran mutuluana au Kadesh ma ai anoi au dobuna i vaivaia i viatataiei. Ma i pariverei i pa, “U paritawanelai da dobuna a ivui, marina grape ana ḡou marana ma a inanai da ani ipi gabuna aiaina ma doa maumaurana, ma aina anoi ḡelaui a neiai da ona inanai.
28 Wate kampa rava ḡaiḡaiawai e mamae, ma ai melagai i rata kaua ma i gari-kwaviviroi da eḡa ḡavia ina rui. Ma kampa mai Anak a inanai.
29 Mai Amalek au mutulua Negev e mamae, ma mai Hitti mai Jebus ma mai Amori au ola e mamae ma mai Canaan au gera, Jordan wairana au ririvana e mamae.”
30 Ma Caleb, rava i riwei da i genuana ma i riwa i pa, “Tana nae dobuna ravai tana virubai ma dobuna tana vaia!”
31 Wate taurauivu maiteni i ḡeḡae i pa, “Eḡa! Ravai i virewapana kaua eḡa me tauta. Eḡa tana viḡaviei.”
32 Ma nanare taui nai dobuna ana apoapoe riwana i vibabarai mai Israel awari i pa, “Nai eḡa ani ipi doana aiaina ma rava manamanai ma ḡaiḡaiawai kampa e mamae.
33 Ma kampa rava ḡaiḡaiwai Mai Nephili a inanai (Mai Anak noinoii) tauai a inana-meleiai lamna me kapau ma nanare taui au matai lamna tauai me kapau.”