14
Mai Israel Moses ma Aaron i viḡaviei
Ma nai waguvaraina rava anatapui i tou mara. Taui anatapui Moses ma Aaron i viḡaviei i pa, “Airake au Egypt ata iraḡe ota! Bo weka au mutulua. Aiwai aubaina Bada e nainaieta wei au dobuna da ravai sodei ina viraḡenita ma awawata ma natunatuta ina pani-naiei. I ai kaua da tata wanaviraita au Egypt.” Ma taui i babani vivira i pa, “Bada tana vinei da ina naiana-meleta au Egypt.”
Anina ma Moses ma Aaron i mae-ḡaira da naoi au doa Israel patarana au matai. Nun natuna Joshua ma Jephune natuna Caleb ruaḡai, taui maiteni dobu i tuvirevirei, ai gara i sikai, ma mai Israel anatapui i riwei, “Dobuna anatapunana a naeni ma a tuvirevirei ma dobu maumaurana. Mepa da Bada nuanuana ina ai awarita ma ina ruieta dobuna maumaurana awarina, weka sia ma lam eḡa anibaiana. Wate Bada eḡa ona viḡaviei. Ma ravai dobuna e maemaeni eḡa ona rovoei, tana viaḡaḡana-opunei. Taui ai agu eḡa. Tauta Bada maiteni ta mamae! Ravai eḡa ona rovoei!”
10 Mai Israel Caleb ma Joshua ḡaimei ita viraḡeni wate Bada ana borumana i eḡa numagara au tepana.
God Moses i riwei da ita wanavirai ma ana rava ita taravaina-naiei au mutulua da etanai e nenae au Boga lebalebarina ita naeni.
God i riwa da rava ina kovoḡi
26  Bada Moses ma Aaron i riwei, 27 “Wei ravai apoapoe ai beura awariu a nonora, iauei! Mai Israel ai pariviravira awariu a nonori.” 28 Wenanare ma paribelei, “Bada i riwa, ‘Tau wavauei a ririwa da aiwai o vivibaḡei, nanare ana kauei.” 29 Taumi au mutulua tupuami urabovai ina nae. O pari-virevireu aubaina taumi ami madeḡa 20 ma e ḡeḡae ona iraḡe. 30 A parivainuaḡami da wei au dobuna ota mae wate eḡa aiai tagogi wei au dobuna ina rui anina Jephune natuna Caleb ma Nun natuna Joshua.
31 Ma o ririwa da natunatumi ina vaia ai panipani, wate taui kampa ana ruiei da dobuna o gedugeduaieia ina maeni. 32 Wate taumi patarami tupuami au mutulua ina bova-nae. 33  Eḡa ota vipatutu ma lamna aubaina natunatumi ina vinuapoapoe au mutulua ma ina kovoḡi da ina viḡamoḡamo-nae da madeḡa 40 ina kwa nai maranaina taumi kimta magurimi ona iraḡe-pai. 34 Aupom 40 dobuna o tuvirevirei lamna aubaina ana kovoḡimi da madeḡa 40, au pom tagogi maiana madeḡa tagogi. Ami ḡoʼapoapoei aubai au kovoḡa malana ona vaia. 35  Tau Bada, A riwa! Tau wei ana kauei taumi ḡoʼapoapoe ravami anatapumi awarimi. Ami rava maiteni o vitagogiemi ma o viḡavieu. Taumi anatapumi au mutulua ona kwa, taumi weka ona iraḡe.
 
14:33 Act 7:36