4
1 Akka Epa Niospa noko shinãkĩ noko yoini ãfe meka shara Jesucristoõnoa nõ yoifofãfofãinõ. Nãskakẽ nõ shinãchakaima, nõ Niospa meka yoiki xateima.
2 Nãskakẽ nõ afaa one chakafamisma rãfixikima, a afara one chakafamisfo keskafakĩ. Askatari nõ tsoa pãramisma. Askatari nõa nõ Niospa meka fetsafaxõ yoimisma. Akka Niospa tãpia meka chanĩma fisti nõ yoimiskẽ. Nãskakẽ mã nokoki inimasharapainõ, nã nõ afarafo shara faito õi.
3 Na meka shara Jesúsnoa nõ yoimis nikakaspaifono nã onea keskara. Nãskakẽ tãpikanamax oa fẽstoa keskarafo. Nãskakanax omiskõipakenakafo.
4 Nãfofi nã niafaka chaka ãto ifoxõ ato yoimis. Nãskaxõ nã õiti fẽstoa keskara ato faano na meka shara Jesúsnoa tãpitirofoma. Nã yora fẽxõ luz ota sharafiano õitiroma keskarafo. Nãskarakaxori Jesús finakõia tãpitirofoma. Nãskatari tsõa tãpitiroma Jesús Apa keskara sharafinakõifiano.
5 Akka nõkai nõa nõ nokoõnoa nõ mato yoimisma mã noko ifofanõ. Askatamaroko nõ mato yoimis Jesucristo mãto Ifo inõ. Nõko Ifokẽ aõ noixõ nõ yonoxosharapai. Akka nõ mato axosharapai Cristoõnoa mã tãpinõ.
6 Niospa pena onifayoxoma fakishkẽ yoini pena inõ. Nãskarari nõ Jesús Ifofayamax nõko õiti nã fakish keskara chakakõi ipaoni. Akka Niospa Jesucristoõxõ nõko õiti mẽra noko chaxamashara aõxõ nõ tãpinõ afe keskara sharakõimãki.
Pablo yoini nõ Jesús chanĩmara faax nõ isharatiro
7 Akka nõ afaayamafekẽ Niospa ãfe sharakõi noko mẽra nanea nõ ãfe meka shara Jesúsnoa ato yoinõ. Akka nã kesho noko keskarari akai afaama. Samama moshitiro. Moshifitirokẽ a mẽra afara sharakõi nõ nanetiro. Nãskarifiai nõ afaayamafiano Jesús nofe rafea. Nãskakẽ yorafãfe tãpitirofo Niospa Yõshi Shara nõmẽra nanea.
8 Nã nõ imis keskara iskaratĩa ẽ mato yoinõ mã tãpinõ. Noko chakafafiakakĩ noko xatemakanima. Nãskafixõ nõ afeskaimẽti ixõ, nõ shinãchakafikĩ mã nõ tãpia Epa Niospamãi noko axosharafafainaito.
9 Noko noikaspakakĩ noko chakafapaimisfo. Nãskakaxõ noko chĩfafofãsafamisfo. Noko askafafiaifono Epa Niospa noko potaima. Nãskakatari noko retepaikakĩ noko tsefeya fafiafono Epa Niospa noko kexesharamis nõ nayamanõ.
10 Jesús niyoano retepaipaonifo keskafakĩ nokori nãskari fakani retepaikakĩ. Noko retepaifiaifono nõko Ifo Jesús noko kexesharai noko retenõfoma. Nãskakẽ yorafãfe tãpitirofo mã Jesús nafianixakĩ anã otoax nikẽ.
11 Nõ Jesús yonoxonaito mẽxotaima noko retepaikani. Akka noko retepaifiaifono nõko Ifo Jesús noko kexesharai noko reteyamanõfo. Akka nõa nõ ifimetiroma nayamaxiki. Nãskakẽ tãpitirofo mã Jesús nafianixakĩ anã otoax nofe ikẽ.
12 Nãskakẽ Jesúsnoa nõ mato yoimis fetsafãfe noko retepaifiaifono mã chanĩmara faax mã afe ĩpaxanõ.
13 Akka Epa Niospa meka kirika ano yõra keneni iskafakĩ: “Ẽ Epa Nios chanĩmara fakõini. Nãskakẽ Niosnoa ẽ ato yoi,” ixõ kirikaki Niospa meka keneni yõra. Nãskarifiakĩ nõri Niospa meka chanĩmara fakõixõ nõ mato yoi.
14 Akka mã nõ tãpia nõko Ifo Jesús mã nafiakẽ Ẽpa Niospa anã õtofani afe ĩpaxanõ. Nãskakẽ Apa Jesús otofani keskafakĩ mato yafi nokori otofaxii nõ afe ĩpaxanõ.
15 Akka nõ omiskõikõi mato Epa Niospa meka yoi mã ãfe meka chanĩmara fakõinõ. Nãskakẽ yora ichapafãferi Epa Nios nikakõikaxõ, “Aicho, Epa Niosi, mĩ fãsi sharakõi,” faxinõfo.
16 Nãskakẽ nõ omiskõifikĩ nõ shinãchakaima. Nõko Ifokai nõ kachikiri faima. Akka nõko yorari anã kerexma nõ omiskõiaino. Askafixõ nõko shinã mẽra mẽxotaima noko kerex fafafãini.
17 Akka a nõ niyoax nõ omiskõiyoai akai afaama, samamashta keyoi. Akka nõ Jesúsnoax omiskõiaito a noko sharakõi imai a keskarakai tsõa õiyomisma. Nãfori keyonakama.
18 Akka nã nõ omiskõiai shinãtamaroko nã nõ õiyomisma nõ shinãi. Nios ika anoxõ noko inimamapakenaka. Nãa nõ shinãi. Akka nã afaranã noko omiskõimanai samama keyoxii. Akka a Niospa noko chipo imai keskara keyonakama.