5
1 Akka ẽ mato yoinõ nikakapo. Pexe xiniax pão ikax keyotiro. Nãskarifiai nõ naino nõko yora keyotiro anã nõko fero mẽsho nõ mẽra inõma. Akka tsõakai noko yora fenafaxotiroma. Epa Nios fistichi noko yora fena onifaxotiro. Akka mã nõ nai mẽra kaax nõko yora fena shara ixii. Epa Niospa noko yora fena shara faxõano a anã keyonakama.
2 Akka nõ fekaxtemis nõko yora fekaxkõimei. Nõko yora fenashara fapai nai mẽraxõ.
3 Akka nõ naax, ¿nõko fero mẽsho yoraya itiromamamẽ? Maa. Epa Nios fisti nõ Ifofamiskẽ noko yora fena shara faxotiro nõ afe ĩpaxanõ. Nãskakẽ nõko fero mẽsho yoramais nai mẽranoax itiroma Epa Niospamãi noko yora fena faxõano.
4 Iskaratĩa nono mai ano niyoax nõko yora omiskõiyoi. Askafiax nõ nayopaima. Nõ nayoamano Cristo onõ noko yora fetsafaxoxiki nõ isharapakexanõ.
5 Nã Epa Nios fistichi noko onifani nõ afe ĩpaxanõ. Nãskakẽ ãfe Yõshi Shara nõ mẽra nanea nõ tãpinõ noko yora fetsa faxoxiaino.
6 Nãskakẽ nõ shinãsharafafãini nono mai ano niyoxõ, nayoxoma, nõko Ifo Jesús ari kayoxoma mã nõ tãpia.
7 Nãskakẽ nã Jesús ika ano õiyamafikĩ nono mai anoxõ nõ chanĩmara fafafafãini. Nãskaxõ chipo nõ õixii Epa Niospa noko fetsafaano.
8 Akka mã nõ tãpisharakõia Epa Niospamãi noko yora fetsa inãino. Akka mã nõ nakĩ nõko yora nõ ratafainikai nõ sharafinakõia ikikakĩ. Nãskakẽ nõ inimasharakõi mã nõ nai nõko Ifo Jesús femãi nõ ikikai.
9 Akka nono mai ano nõ niyoxõ nõko Ifo nõ yonoxosharayopai nokoki inimanõ. Nãskatari nai mẽraxori na fischisharapaiyai keskafakĩ nõko Ifo nõ inimamapaisharakõi.
10 Akka nã chanĩmara faafo tii Cristoki nokoxikani. Nãskatari noko yoipakexii nono mai ano niyoxõ nõ shara famismãkĩ, askayamakĩ nõ chakafamismãki. Akka nõ afara shara famiskẽ afara sharakõi noko inãxii. Akka nõ afara chakafamiskẽ afara shara noko inãpaifikĩ noko inãxima. Nãskakẽ nõ fixiima. Nãskakẽ Jesúsxõ nõ yonopai sharakõi.
Pablo yoini Cristoõnoax nõ Nios fe rafetiro
11 Akka Niospa noko yoia keskara nõ ayamax nõ rãfitiro. Nãskatari fetsafori nõ ato yoipai nã Niospa ato yoiai keskara anõfo. Niospa noko tãpikõia nõmãi mẽstekõi yoiaito. Nõkai ato feparapaima. Mãri mã mã noko tãpikõia nõ mato pãramisma. Nõko meka mẽstekõi fisti nõ mato yoimis. Nãnori fisti mãto shinã mẽraxõ mã shinãpainõ.
12 Akka kakapai nõa nõ yoimesharapaima. Akka mẽstekõi fisti nõ mato yoimis, mã mã tãpia. Akka fetsafãfekai mato yoikõikanima mato feparapaikani. A yoiaifo anorikai yoimisfoma ãa ãto shinã mẽraxõ shinãkaxõ yoimisfo kakapaiyanã. Akka nõfi mato pãramisma, chanĩma fisti nõ mato yoimis. Nãskakẽ mã nokoki inimakõimis. Nãskaxõ mã nokoõxõ ato yoikĩ nokoõnoa mã ato yoisharatiro.
13 Chanĩma, nõ Nios noikĩ kerexkai nõ yonoxofafãimis aõnoa fetsafãfe nikasharanõfo. Akka yorafãfe nokoõnoa yoimisfo iskafakakĩ: “Na Pablo feta yonomisfãfe shinãsharamisfoma mẽxotaima ato Niospa meka yoifofãsafamisfo omiskõifinafikakĩ,” ixõ noko yoimisfo. Ãa noko askafanõfokĩ mã nõ tãpiakĩ Niosxõ nõ yonofikai mã ãfe meka tãpinõ. Akka nõ mẽstekõi shinãsharakĩ nõ mato yonoxosharamis.
14 Cristo noko noikĩ noko yoini nõ ãfe meka shara mato yoinõ. Cristo keyokõi yorafoõnoax naani. Nãskakẽ mã nõ naa keskara a nõ iyopaoni keskara ixikima.
15 Akka mã Jesús nayoni yorafoõnoax keyokõi a keskara shara ixiki. Nãskakẽ a nõ chaka ipaoni keskara ixiima. Nãskakẽ nã nõ apaiyai keskara fisti anã nõ shinãtiroma. Cristoõnoax nõ yonosharaxotiro. Cristo ãa nokoõnoax nayoni. Nafiano Epa Niospa ãfe sharaõxõ anã otofani.
16 Akka nã Jesús chanĩmara faafãfema fetsafoõnoa shinãifo keskarakai nõ anã atoõnoa anori shinãpakenakama. Nõri anori shinãyopaoni nõ anã askapaima. Cristoõnoari nõ chakakõi shinãyopaoni. Nõkai anã aõnoa anori shinãima.
17 Nãskakẽ Cristo nã Ifofaafo ato shinã fetsafaxõa anã shinãyopaoni keskara inõfoma, fena keskara shara inõfo. A Niospa fichipaiyai keskara fena keskara nõ ixii. Keyokõi fena keskara ixii.
18 Epa Niospa Cristoõxõ noko fetsafaa anã nõ noikaspanõma, nõ afe rafenõ. Askatari noko yoini aõxõ ãfe meka nõ ato tãpimanõ Epa Nios fe rafenõfo.
19 Epa Niospa Cristoõxõ keyokõi yorafo afe rafemapai anã noikaspanõfoma. Cristomãi noko nãxonikẽ Epa Niospa a nõ afara chakafamisnoa anã shinãima. Nã Epa Niospa noko yoia keskafakĩ nãnorikõi nõ mato yoimis.
20 Akka Cristo noko nĩchini nõ ãfe meka mato yoinõ. Nõ ãfe meka mato yoi nã Epa Niospa mato yoiai keskara. Epa Niospa nokoõxõ mato yoi nã Cristo mato yoipaiyai keskafakĩ. Nãskakẽ nikakõikãfe Cristo mato nãxonikĩ mato chaka soaxoxiki. Nãskakẽ Cristo Ifofaxõ mãto chaka xatekãfe Epa Nios fe rafexikakĩ.
21 Akka Cristo afaa chakafapaonima. Nãskafikẽ Apa Niospa nõko chakafo akiki nĩchini. Cristo afaa chakafayamafiakatsaxakĩ noko nãxoni Epa Niospa noko omiskõimayamanõ. Nã yora chaka keskarax nõko chakafoõnoax Jesús nani. Nãskakẽ nõ Jesús Ifofaino Niospa noko õitiro sharakõi nã nõ afaa chakafamisma keskara, nokoki inimakõikĩ.