8
Niospa Yõshi Sharaõnoax nõ ika
1 Akka Jesucristo nõko Ifono nõ afe yora. Nãskakẽ Epa Niospa noko yoima iskafakĩ: “Mã chaka. Ẽ mato omiskõimanõ. Emakinoax fotakãfe omiskõipakenakafo mẽra nãnoax mã omiskõipakenaka,” ixõ noko yoipakenakama mãmãi nõko chaka noko soaxõ,
2 Jesucristoõxõ Niospa ãfe Yõshi Sharapa noko nimasharai anã chaka nõko ifo inõma, nõ omiskõipakexanõma.
3 Moisés yoini keskara nõ tãpifiano aato noko imasharatiroma nõko chaka noko soaxotiroma. Akka Epa Niospa shinãyoni ãfe Fake nai mẽraxõ mai ano nĩchixiki ari noko keskara yora inõ. Noko keskarafiaxokai nõ amis keskara afaa chakafamisma. Akka noko nãxoni anã afara chaka nõko ifo inõma.
4 Nãskata iskaratĩa nõ Niospa Yõshi Shara Ifofaax aõxõ Moisés yoini keskara nõ nikatiro. Nõ Niospa meka ifofasharakõitiro.
5 Akka nõ chaka xateyamano afara chakapa noko amapaiyai keskara fisti nõ atiro. Akka Niospa Yõshi Sharapa noko ĩkinãno nã noko amapaiyai keskara fisti nõ atiro.
6 Nã apaiyaifo keskara fisti shinãkanax afo nakanax anã otokanax omiskõipakenakafo. Nios fe ipanakafoma. Akka Niospa Yõshi Shara ato mẽra naneano nã apaiyai keskara Niospa Yõshi Sharaõxõ atirofo. Nãskax isharapakenakafo shinãsharakata.
7 Fetsafãfe Nios noikaspakani Niospa ato yoia keskara nikapaikanima. Ãto shinã mẽraxõ afara chaka fisti shinãkani. Nãskaxõ Niospa ato yoia keskara nikatirofoma.
8 Nã ãto shinãmã shinãifo keskara fisti shinãkakĩ Niospa ato amapaiyai keskara atirofoma. Afara chaka ifofaifono Nios atoki inimaima.
9 Akka mãkai askarama. Mãto shinã mẽraxõ afara chakapa mato shinãmanima. Akka Niospa Yõshi Shara mãto shinã mẽra nanexõ mato shinãmasharamis. Akka Niospa Yõshi Shara mãto shinã mẽra naneyamaino mã Cristo fe rafetiroma.
10 Cristo mato fe rafefiaino afara chakaõnoax mãto yora nai. Mãto yora nafiano mãto fẽro mẽsho naima Nios fe nipanaka Niospamãi afaa chakafamisma keskara mato õiaino.
11 Mã Jesús naano Niospa otofani. Nãato ãfe Yõshi Shara mãto shinã mẽra nanea. Nãskarifiakĩ mãto yora naano ãfe Yõshi Sharaõxõ Niospa anã mato otofatiro mãto yora fenasharakõi inõ.
12 Efe yora mĩshtichi, Niospa Yõshi Shara nofe rafeaino Epa Niosnoa nõ shinãtiro noko amapaiyai keskara akĩ. A nõ afara chakafamiskai anã nõ shinãpaitiroma noko Niospa amapaiyai keskara akĩ.
13 Akka a nõ apaiyaifo keskara fisti shinãx nõ omiskõipakenaka nai. Akka nãskafixõ Niospa Yõshi Sharaõxõ afara chakafakĩ nõ xatexõ anã chaka nõ shinãtiroma. Nõ Epa Nios fe nisharapakenaka.
14 Niospa Yõshi Sharapa noko shinãmanaino nõ Niospa fakefo iki.
15 Ãfe Yõshi Sharapa noko shinãmasharapai nõ anã mesenõma. Mã nõfi Niospa Yõshi Shara fĩaki. Nã ãfe Yõshi Sharaõxõ ãfe fakefo noko ima. Aõxõ nõ yoitiro iskafakĩ: “Epa Nios, mĩ ẽfe Epa,” ixõ nõ yoitiro.
16 Nõko shinã mẽraxõ Niospa Yõshi Sharapa noko yoi iskafakĩ: “Mĩ Epa Niospa Fakekõi,” ixõ noko yoi.
17 Nõ Niospa fakekẽ nã noko yoia keskara noko inãtiro. Nõfi nõ Niospa fakekẽ nã ãfe Fake Cristo ani keskara nokori inãtiro. Nõõnoax omiskõifinixakĩ iskaratĩa nai mẽranoax Apa Nios fe xanĩfokõi. Nãskarifiai nõri aõnoax omiskõiax nõ nai mẽra Epa Nios ano nokoano noko sharafinakõia imaxii nõ afe isharapakexanõ, a keskara shara nõ inõ. Akka afe yorafo Niospa ato sharafaxõi nãfomãi ãfe fakefokẽ.
Niospa fakefo Jesús fe isharapakenakafo
18 Nõ iskaratĩa omiskõiyofiax nõ chipo Jesús fe isharapakenaka. A keskara sharafinakõi noko imai. Tsõa õimisma keskara sharafo noko õimaxii. A nõ omiskõipaoni anã nõ shinãima.
19 Epa Niospa ãfe fakefo otofaxii a keskara sharakõi ato imaxii. Akka nã Niospa onifanifãfe manakani õisharapaikõikakĩ afe keskarafo ato imaimãkai.
20-21 Niospa ãfe fakefo sharakõi ato õimaxii. Nãskatari a onifanifori sharakõi ixii. Anã afaa chaka ixiima. Afarafo anã payokomepakenakama. Akka iskaratĩa nã Niospa onifanifo payokomepakenakafo askayamapaifiaifono. Nãskaxõ Niospa yoini: “Adán afara chakafaõnoax keyokõi payokomepakenaka.” Akka Niospa ãfe fakekõifo akiki nokoaifono ato yora fetsafaxoxii anã payokomenõfoma, afara chakafãfe ato fekaxtefanõma. Nãskarifiai Niospa onifanifori nã Niospa fakekõifo keskara shara ixii, anã payokomepakenakama.
22 Kẽromã fake kãikĩ pae meyotiro. Mã kãixõ anã pae metiroma. Nãskarifiai a Niospa onifanifo omiskõiyokani. Akka mã Niospa ato fetsafaano anã omiskõixikanima.
23 Akka nõ Niospa fakefo ãfe Yõshi Shara nofe rafeaino nõ tãpitiro nõ Nios ikano kaax nõ isharakõixii. Akka iskaratĩa nõ isinĩ iki fekaxtei. Nãskakẽ nõ manasharai Epa Nios ika ano noko ifinõ nõ ãfe fakefokẽ a keskara shara noko imanõ. Nãskatari nõko yora fena sharakõi noko imai anã nõ isinĩ inakama. Anãkai nõ nanakama.
24-25 Nãskara nõ shinãi nõ akiki nokoaito noko fetsafaxii a keskara shara nõ inõ. Nãskax nõ afe ipanaka. Chanĩmara faxõ inimayanã nõ manasharatiro fena fenakima nã nõ akiki nokoaitĩa. Akiki nokoxõ nõ anã manatiroma mãmãi nõ õikĩ.
26 Nãskarifiakĩ Epa Niospa ãfe Yõshi Sharapa noko axosharafafãini. Afeskaxõ nõ Epa Nios kĩfisharatiromẽ nõkai tãpiama. Akka ãfe Yõshi Shara nõ mẽra nanexõ noko shinãmanaino nõ kĩfisharatiro. Noko noikĩ noko kĩfixoni. Noko kĩfixonai keskarakai tsõarikai kĩfitiroma.
27 Ãfe Yõshi Sharapa shinãi keskara Epa Niospa tãpikõia. Keyokõi nõko shinã mẽrari nõ shinãi keskara tãpikõia. Epa Niospa noko amapaiyai keskara nãnori ãfe Yõshi Sharapa a chanĩmara faafo tii ato kĩfixomis.
Jesúsxõ nõ keyokõi finõkõitiro
28 Akka nõ tãpia Epa Niospa noko katoni a apaiyai keskara nõ anõ. Nõ Epa Nios noiaino afarafãfe noko afeskarafafiaino afoxõ Epa Niospa noko axosharai.
29 Nõ Jesús Ifofayoamano Epa Niospa tãpiyoni fatofomãkĩ a chanĩmara faifo. Akka chanĩmara fayoafomano shinãni iskafakĩ: “Nafo ẽfe Fake keskara ẽ ato imaxii,” ixõ shinãyoni. Niospa ãfe Fake iyoa Jesús. Nãskaxri nõri ãfe fake chipoko ixii.
30 Tãpiyoni nõ ãfe fakefo ixinõ. Askano nõko shinã mẽraxõ noko yoini: “Ẽfe Fake chanĩmara fakãfe,” noko fani. Fatora anori yoixõ ato chaka soaxoni isharanõfo, afaa chakafamisma keskara ato õixii, ato chaka soaxonano ãfe Fake sharakõi keskara inõfo.
31 Noko askasharafaino ¿nõ fakiri yoitiromẽ? Epa Niospa noko sharafakõinaino afara chakafãfe noko chakafamatiroma.
32 Epa Niospa noko noikĩ ãfe Fake Jesús timamanima noko naxonõ. Nãskanixakĩ noko axosharatiro nã apaiyai keskara nõ anõ.
33 Epa Niospa noko katoni nõ afe yora inõ. Nãskaxõ nõko chaka noko soaxonano afara chakafamisma keskara noko õixiki. Askano fetsafãfe mĩ chakara noko faifono nõ ato ifofaima.
34 Jesucristo noko nãxokẽ Ãpa otofani. Iskaratĩa Apa Nios ika ano ika Apa feta ato keyokõi ĩkinã. Epa Nios noko kĩfixõfafãini. Nã chanĩmakõikẽ tsõa, “Mĩ afara chakafamiski. Nãskax mĩ omiskõipakenaka,” noko tsõa fatiroma.
35 Tsõakai Jesucristo nomakinoa potatiroma noko noiyamanõ. Nõ omiskõikãi, nõko shinã mẽra fekaxtekãi, nõ Jesúsnoa yoiaito noko omiskõimafãi, noko fonãimafãi, nõ rapati yopafãi, noko mesemafãi noko retepaifãi, keyokõi afãfekãi Cristo nomakinoa potatirofoma noko noiyamanõ.
36 Niospa meka yoikĩ David kirika keneni iskafakĩ:
Epa Nios, pena tii mĩõxõ noko retepaikani. Nõ oveja keskara. Ifãfe nã oveja itipinĩfasharai retexiki. Nãskarifiakĩ a mĩõxõ noko chakafaifãfe noko retepaitirofo,
ixõ kirika keneni.
37 Noko askafafiaifono keyokõi nã chakafo nõ finõkõitiro Jesús noko noiaino.
38-39 Jesucristo nõko Ifonokai afanã Epa Nios nomakinoa potatiroma anã noko noinõma. Nã ẽ chanĩmara fakõini. Epa Niospa noko noiaino afanã noko afeska fatiroma anã noko noinõma. Nõ nafiakẽkai nomakinoa afanã Nios potatiroma. Nõ niyoanori nomakinoa tsõa paxkatiroma. Ãfe ãjirifãferikai nomakinoa paxkatirofoma. Yõshi chakafãferikai nomakinoa paxkatirofoma. Afarafo iskaratĩa ikaifãferikai nomakinoa paxkatirofoma. Inõpokoaifãferikai nomakinoa paxkatirofoma. Afara chakafãfe ãto xãnifofofãferikai nomakinoa paxkatirofoma. Nã nai ari ikafãfe, mai ano ikafãferikai nomakinoa paxkatirofoma. Epa Niospa nõko Ifo Jesucristoxõ noko noi. Nãskakẽ keyokõi onifanifãferikai nomakinoa paxkatirofoma anã noko noinõma.