12
Fare profet ni milnag e pogofan rok
1 I non SOMOL ngog ni ga’ar,
2 “Fak e girdi’, ga be par u fithik’ e girdi’ nib tatogopluw. Bay owchrad, machane darir guyed ban’en; bay telrad machane darir rung’aged ban’en, ni bochan e yad bogi tatogopluw.
3 “Fak e girdi’, are chiney, ngam m’ag e chugum rom ni bod nma rin’ e kalbus ngam mman ni dawori aw e lumor. Mu guy rogon ni nge guyem gubin e girdi’ ni ngam chuw ngam mman ngabang. Dabisiy nra guyem fapi tatogopluw.
4 Nap’an ni kab rran, ma ngam m’ag e chugom rom ni bod be’ ni ngan fek ngabang, ya nge yag nra guyed gur, ma guy rogon ngar guyed gur ni blayal’ ni ngam chuw ni susun e ngam mman ni gab kalbus nga wuru’ e nam.
5 Ngiyal’ ni yad be sap ma ga chabliy e rungrung ko naun rom ngam fek e chugum rom riy nga wean.
6 Ma guy rogon ngar guyed gur ni kam tay e chugom rom nga pom ma ga yan nga fithik’ e lumor ni kam upnguy owchem, ya nge dab muguy e gin ga be sor ngay. N’en ni ga be rin’ e bayi mang ba pow ni nge ginaeng yu Israel.”
7 Gu rin’ e n’en ni yog SOMOL ngog ni ngu rin’. Rofen nem mu gu m’ag e chugom rog ni bod nma rin’ e kalbus, me blayal’ riy ni be nep’ i yan mug mu gu chabliy e rungrung nga pa’ag nggu wan riy nga wean. Nap’an ni go’ yibe yaliyeg mu gon’ e chugom rog nga pog nggu chuw.
8 Bin migid e kadbul riy me ga’ar SOMOL ngog,
9 “Fak e girdi’, ra fithem e pi’in tatogopluw nu Israel ko mang e ga be rin’,
10 ma gog ngorad e n’en ni Gag SOMOL ni Th’abi Tolang e gu be yog ngorad. Re marnga’ag ney e fan ngak fak e pilung nma gagiyeg u lan yu Jerusalem nge fan ngak gubin e girdi’ nma par u rom.
11 Mog ngorad ni n’en kam rin’ e pow ko n’en ni bayi buch rorad — bay ni kolrad ngan kalbus nagrad.
12 Fare fak e pilung ni be gagiyeg nagrad e ra yon’ nga pon e chugom rok u fithik’ e lumor nge mil ko fare chabal ko rungrung ni kar kired ni fan ngak. Bayi upnguy owchen nge dabi guy e gin be sor ngay.
13 Machane bay gu pithig radan e nug rog nge aw ngay. Ma aram e bay gu fek ko fare binaw nu Babylon, ko gin bayi yim’ riy ni dabi guy e re binaw nem nga owchen.
14 Bay gu weregrad u gubin yang, gubin gathon e kort rok nge pi tafanow nge pi tamatnag rok, ma bay un changar nagrad ni ngan thangrad.
15 “Nap’an ni gu ra weregrad u daken boch e nam nge lan boch e binaw ni gathi binaw rorad, ma bay ra nanged ni Gag SOMOL.
16 Gu ra pag in i yad nge par ni dabi yim’ u fithik’ e mael, ara uyngol, ara liliy, ya fithik’ e pi nam i yan e ngar nanged riy feni sonogor pangrad. Ma bay ra nanged ni Gag SOMOL.”
Pow Ko fare profet nma dada’
17 I SOMOL e ga’ar ngog,
18 “Fak e girdi’, mu t’on ko ngiyal’ ni ga be abich, mag dada’ ko marus ko ngiyal’ ni ga be garbad.
19 Mog ngak fare nam ni ga’ngin ni irera’ e thin rok SOMOL ni Th’abi Tolang ngak e girdi’ nu Jerusalem ni ku yad be par u daken e re binaw rorad nem: Bay ra t’on gad ko ngiyal ni yad be abich ma yad be dada’ ko marus ko ngiyal’ ni yad be garbad. Re but’ rorad nem e bay gu fathiy e upong u daken, ya gubin e girdi’ ni be par riy e dakriy yarmen ko wodmang.
20 Pi binaw nike sug ko girdi’ e chiney e bay ni gathay, ma fare nam e bayi par ni dakriy e wulgo’ riy. Ma aram e bay ra nanged ni Gag fare SOMOL.”
Thin rok SOMOL ni bayib i m’ug nib riyul’
21 I SOMOL e ga’ar ngog,
22 “Fak e girdi’, mangfan ni girdi’ nu Israel e yad ma sul u daken e re bug i thin ni ba’aray: ‘Be yan e rran, ma pi yi’iy e dawor i m’ug’?
23 Mog ngorad e n’en ni Gag fare SOMOL ni Th’abi Tolang e gu be yog u murung’agen e binem. Binem e marang’ag e bay gu museg. Ni dab kun sul u daken u lan yu Israel bi’id. Ngamog ngorad ni ara’ rogon: Rran riy e ray, ni pi yi’iy e bayib i m’ug nrib riyul!
24 “U fithik e girdi’ nu Israel e bay gu taleg e pi cha’ nma pilyeg owcharad ngu’ur guyed bogi ban’en ara yad be yi’iy ni de riyul’, ni be soreg e girdi’ ngabang.
25 I Gag SOMOL, e bay gu non ngorad, ma n’en nggu gog e ra aw ngagil’. Dariy e sosowath riy. Ko ngiyal ni kigimed bfos, gimed e pi tatogopluw nir, me gag e bay gu rin’ e tin ni ug gineangmed riy ni gu ra rin’. I Gag SOMOL ni Th’abi Tolang e gu be non.”
26 Me ga’ar SOMOL ngog,
27 “Fak e girdi’, yu Israel e yad be leamnag ni pin’en ni kam guy nge pi yi’iy ni ga be tay e kab palog nga m’on.
28 Ere ngamog ngorad ni Gag, SOMOL ni Th’abi Tolang e gu be ga’ar: Dabi sosowath. N’en ni gog e nge yodrom. I Gag SOMOL ni Th’abi Tolang e gu be non!”