Bible Ni Thothup EZEKIEL 13

Yi’iy nib togopluw ngak e pi profet ni pumo’on ni go’ Bogi ban’en

1 I ga’ar SOMOL ngog, 2 “Fak e girdi’, mu gechignag e pi profet nu Israel ni yad e yad be tunguy e yi’iy rorad. Mog ngorad ni ngar motoyilgad ko thin rok SOMOL.”

3 Irera’ e n’en be yog SOMOL ni Th’abi Tolang: “Ke gafgow e pi profet ney ni balyang, ni yad be dake go’ yad manang ma yad be tunguy bogi ban’en ngu u rogned ni kar guyed. 4 Girdi’ nu Israel, pi profet romed e be m’ayfarad ni bod e pilis ni malboch ni yad ma par ko yungi n’en ni kan n’ag u lan e binaw. 5 Darir matanagiyed e yungin ke puth e rungrung, ma ku dariy e ngar ubungiyed e rungrung, ere yu Israel e dabyag i ayweg ko ngiyal’ nike yib e mael ko fare rran rok SOMOL. 6 Changar rorad nma pilyeg e de riyul’ ma tin yad be yog ni bayi yodrom e go’ ban. Yad be yog ni thin rog e yad be weliy, ma gathi gag e gol’ograd. Ere yug aram rogon ma yad be leamnag ni thin rorad e bay i m’ug nrib riyul’. 7 Gu ga’ar ngorad: Pi changar romed ni be pig e de riyul’, nge tin gimed be yog ni bayi yodrom e go’ ban. Gimed be yog ni pi thin nem e thin rog, machane gag e dawor gu non ngomed!”

8 Ma aram me ga’ar SOMOL ni Th’abi Tolang ngorad, “Thin romed e de riyul’, nge changar romed ni be pig e go’ ban. Gub togopluw ngomed. 9 I gag e nggu gechig nagmed e pi profet ni de rriyul e tiromed e changar, ma go’ ban e yi’iy ni gimed be tay. Dab mu’uned ngaram ko ngiyal’ nra mu’ulung e girdi’ rog ni ngar purpuruy’ gad; fithingimed e dabi un ngalan babyoren e girdi’ nu Israel; dakriy bi’id ni gimed ra sul ko nam romed. Ma aram e bay mu nanged ni Gag fare SOMOL ni Th’abi Tolang.

10 “Pi profet e yad be ban nag e girdi’ rog ni yad be yog ni urngin ban’en mabfel’ rogon. Ya urngin ban’en ma de fel! Girdi’ rog e kar ubungyed ba rungrung ngalang ni de ayal e malang riy, ma pi profet e kar acheyed nib wech ni ngar mithaged thibngin. 11 Mog ko profet ni rungrung rorad e bayi puth nga but’. Bay gu pi’ e nifeng nib gel, nge n’uw ni sarbul, nge ayis ni nge mul u lang nge buthug fare rungrung. 12 Fare rungrung e ra puth, gubin e girdi’ ma ra fithem ko mang angin fare ma’chaw ni wech ngay.”

13 Ere chiney e irera’ e n’en ni be yog SOMOL ni Th’abi Tolang: “U fithik’ e damumuw rog e bay gu pi’ e nifeng nib gel, nge n’uw ni sarbul, nge yung i ayis ni gowa bogi malang ni nge mul u lang nge buthug fare rungrung. 14 Kug t’ar u wun’ug ni nggu buthug fare rungrung nra achayed ko ma’chaw ni wech, nge wear, me par enggin u but’ ndariy ban’en u daken. Ra puth nge li’med ni gimed gubin. Me nang gubin e girdi’ ni Gag SOMOL.

15 “Fare rungrung nge pi’in ni kar upunguyed thibngin ko ma’chaw ni wech, e yad ra thamiy ga’ngin gelngin e damumuw rog. Ma aram e bay gog ngom nike chuw fagi rungrung ma ku arita’ e pi’in nra achayed ko ma’chaw ni wech 16 ni fapi profet ni ur micheged ngak piyu Jerusalem ni urngin ban’en ma kabfel’ rogon, e ngiyal’nem ni urngin mdefel’!” I SOMOL ni Th’abi Tolang e be non.

Yi’iy nni togopluwnag ko pi profet ni ppin ni go’ bogi ban’en

17 SOMOL e ga’ar, “Fak e girdi’, mu yaliy e ppin u fithik’ e girdi’ rom ni yad be tunguy boch ban’en ni bayi buch. Mu gechig nagrad 18 ma gog e n’en ni be yog SOMOL ni Th’abi Tolang ngorad:

“Gafgow gimed e pi ppin nir! Gimed be lifith yungi pachael nib machmach ni nge fanay gubin e girdi’ nge yung i hangkach nib machmach ni nge m’ag gubin e girdi’ nga lolugrad, ya nge gel gelngirad nga daken e yafos rok boch e girdi. Ma gimed ba’adag ni nge ying ba gelngin ngomed ni gelngin e yafos nge yam’ ngam maruwel gad ngay nggi i yag bogi ban’en riy ngomed. 19 Gimed be m’aynag fag u mit e girdi’ ni fan e nge yag buchu’uw e barley nge yoch yang e flowa ngomed. Gimed be thang e pogofan ko girdi’ ni dariy tapgin e yam’ ni ngar ted, mi gimed be pag e pi’in ni bay tapgin ni ngarm’ad ni yad ba fos. Ma gimed be sasalap l’ugun ko girdi’ rog ngi i mich u wan’rad e thin romed.”

20 Ere irera’ e n’en ni be yog SOMOL ni Th’abi Tolang: “Gub fananikay e pi pachael nir ni gimed be maruwel ngay u rogon ni nge gagiyegnag e yafos nge yam’. Bay gu th’ab e pi pachael nem u pa’amed mug luf e pi girdi’ nem u tanggin e gagiyeg romed. 21 Bay gu guchthiy e hangkach romed mug pag e girdi’ rog ngar chuwgad u tan gelngimed ni ta’bayay me mus ni dab kibuch. Ma aram e bay mu nanged ni Gag fare SOMOL.

22 “Sasalap l’ugun romed e be lul’weg laniyan’ e girdi’ nib manigil, ni girdi’ ndagur finey ni nge gafgow. Gimed be tay tanggin e girdi’ ni kireb nge dab rpaged e kireb ni yad be rin’ ngar aywegned e yafos rorad. 23 Ma chiney e pi yi’iy romed ni go’ ban e nge tal. Gu be pithig e girdi’ rog u tan gelingmed, ya nge yag ni ngam nanged ni Gag fare SOMOL.”