27
Isak ni fal’egwa’athan Jakob
1 Ma ke pilibthir Isak, nike malmit. Me l’oeg e thin nge yan ngak Esau ni bin nib ilal ko fa gali pagel ni fak, me yib me ga’ar ngak, “Fakag!” Me fulweg ni ga’ar, “Gub aray.”
2 Me ga’ar Isak, “Kam gu’ ni kug pilibthir ni sana dabki n’uw nap’an mu gum’.
3 Wenig ngom, mu fek talin e cham rom, ni gat’ing rom nge gan ngam man nga daken e flang ngam li’ ba gamanman gu longuy.
4 Ma ga ngongliy rogon e ggan ni bfel’ lamen ni bod faram ni ga ma ngongliy ngam fek i yib ngog, ya nggu way, nge mu’ mu gu yibilayem u m’on ndawor gum’.”
5 Ma be motoyil Rebekah ko ngiyal’ ni be welthin Isak ngak Esau ni fak. Fa’ani yan Esau nga daken e flang ko mokol gamanman,
6 me ga’ar Rebekah ngak Jakob, “Dawori n’uw nap’an ni kug rung’ag e thin nike yog e chitamam ngak Esau nike ga’ar,
7 Mfek ba gamanman i yib ngog, ma ga lith ni fan ngog. Ya nggu way nge mu’, mu gu yibilayem ngak SOMOL u m’on ndawor gum’.
8 Fakag, mfol rog ngam rin’ e tin nggog.
9 Mman ko fare ran’ i kaming ngam mel’eg l’agruw u fithik’ nib sugsug ma kab bitir ngam fek i yib ngog, nggu lith mu gu ngongliy boch fapi ggan ni ba’adag e chitamam.
10 Ma ga fek i yan ngak e chitamam nge kay, me yibilayem ngak SOMOL u m’on ndawori yim’.”
11 Me ga’ar Jakob ngak e chitiningin, “Ga manang ni Esau e be’ nib mak’ piy downgin, me gag e de mak’ piy dowag.
12 Sana ra yib i math e chitamag ngog me nang ni gu be bannag; mu gu girengiy nga dakenag e buchwa’athan ma gathi fel’ewa’ath.”
13 Me ga’ar e chitiningin, “Fakag, mpag e buchwa’athan ni bayib ngom riy nge mang gag e yib nga dakenag; mu rin’ ni bod ni kugog, mman ngam fek fa gali kaming i yib ngog.”
14 Me yan i fek fa gali gamanman i yib ngak Rebekah, me lith Rebekah e ggan ni ba’adag e chitamngin fare pagel.
15 Me fek Rebekah e bin th’abi fel’ e mad rok Esau, ni be cha’riy Rebekah u naun, nge yin’ nga daken Jakob.
16 Me fek keru’ e kaming nge tay nga daken pa’ Jakob nge nga daken belel’ugun ndariy e piy riy.
17 Me pi’ Rebekah fapi ggan ni bfel’ lamen nge flowa nike lith ngak Jakob.
18 Me yan Jakob ngak e chitamngin me ga’ar ngak, “Chitamag!” Me fulweg ni ga’ar, “I gur e bin ngan ko fa gali pumo’on ni fakag?”
19 Me fulweg Jakob ni ga’ar, “I gag Esau ni fa bin nganni’ i fakam; kug rin’ ni bod ni kamog ngog. Wenig ngom, mu suwon ngam koy boch e ufin e gamanman ni kug fek i yib ni ngam koy, ma ga yibilayeg.”
20 Me ga’ar Isak, “Fakag, uw rogon ma ga pir’eg e gamanman ni er feni machreg?” Me ga’ar Jakob, “I SOMOL ni Got rom e ke ayuwegneg kug pir’eg.”
21 Me ga’ar Isak ngak Jakob, “Wenig ngom, mu chugur ngara’ nggu math nga dowam. Mog, ri gur Esau ni fakag?”
22 Me chuchugur Jakob i yan ngak e chitamngin, me math e chitamngin nga downgin me ga’ar, “Lamam e bod laman Jakob, machane daken pa’am e bod daken pa’ Esau.”
23 Ma de pow Jakob rok, ni bochan e bo’or e piy u daken pa’ ni bod daken pa’ Esau. Me fal’eg rogon ni nge yibilay,
24 machane me fith ngak ni ga’ar, “Mog, ri gur Esau ni fakag?” Me fulweg Jakob ni ga’ar, “I gag.”
25 Me ga’ar Isak, “Mfek boch e ufin ni kam ngongliy rogon i yib ngog nggu way nge mu’ mu gu yibilayem.” Me fek Jakob i yib ngak, me ki fek e wayin i yib ngak ni nge unum.
26 Me ga’ar e chitamngin ngak. “Fakag, mu chugur ngog ngam faray owcheg.”
27 Ma fa’ani chugur ni nge faray owchen, me farabon Isak bon e mad rok, ma aram me yibilay ni ga’ar: “Bon downgin fakag e bfel’ ni bod bon bangi woldug ni SOMOL e be ayuweg.
28 I Got e nge pi’ e wa’angachal nu tharmiy ngom, me yong’olnag e milay’ rom, me pi’ ngom e grain nge wayin ni pire’.
29 Ma pi nam e ngar manged tapigpig rom, ma girdi’en e pi nam e ngu’ur siro’gad ngom. Ma ga par ni gur e masta rok e girdi’ rom, mi i siro’ ngom e pi’in ni owchen e chitinam. Ma pi’in yad ra yibilayem ni nge buch wa’atham, e nge buch wa’athrad, ma pi’in yad ra yibilayem ni nge fel’ wa’atham, e nge fel’ wa’athrad.”
Esau ni wenig ni ngan yibilay
30 Me yibilay Isak Jakob, nge mu’ me yan Jakob ni kachingiyal’ nem; me taw Esau ni walagen nike sul ko mokol gamanman.
31 Miki ngongliy e ggan ni bfel’ lamen nge fek i yan ngak e chitamngin. Me ga’ar, “Chitamag, wenig ngom, mu suwon ngam koy boch e ufin e gamanman ni gag fakam e kug fek i yib ngom, ma ga yibilayeg.” Me fith Isak ngak ni ga’ar,
32 “I gur mini’?” Me fulweg ni ga’ar, “I gag Esau ni bin nganni’ i fakam.”
33 Ma aram me t’on Isak nreb me fith ni ga’ar, “I mini’ fa’anem nike li’ ba gamanman ke ngongliy rogon ke fek i yib ngog ni nggu way? Ya ka fini gu mu’ i kay ma kam taw. Ere kug yibilay, ma ke par riy ni aram rogon ndariy n’umngin nap’an.”
34 Fa’ani rung’ag Esau ni aram rogon, me pag laman ngalang nge yor me ga’ar, “Chitamag, kum yibilayeg!”
35 Me ga’ar Isak, “Ke yib walagem i ban nigeg. Ke fek e tow’ath ni gur e nggu yibilayem nge yag ngom.”
36 Me ga’ar Esau, “Ke gaman e l’agruw yay ko yaney nike ban nigeg. Arfan ngay ni fithingan e Jakob. Ke fek mat’awug ni bay rog ni bochan e gag e gub nganni’, ke chiney ma ke fek e meybil ni gag e ngan tay ngog. Ere dakuriy reb e meybil ni kam tay ni ngam yibilayeg ngay?”
37 Me ga’ar Isak ngak Esau, “Kug mu’ i yibilay ni nge par ni ir e masta rom, ma kug yibilay ni urngin e tirok e girdi’ ni ngar pired ni tapigpig rok. Ma kug yibilay ni nge yag e grain nge wayin ngak. Ere be mang e kabay ni gu ra pi’ ngom, i gur fakag?”
38 Me par Esau ngi i wenig ngak e chitamngin ni be ga’ar, “Mog, kari mus ni ta’reb e meybil ni bay rom?” Me ga’ar, “Chitamag, kum yibilayeg,” me pag laman ngalang nge yor.
39 Me ga’ar Isak ngak:
“Dabi yib e wa’angachal u tharmiy ni fan ngom,
Ma dariy bang e flang rom nib yong’ol.
40 Saydon rom e bayi pi’ e ggan ngom,
ma bay mu par ni gur e tapigpig rok walagem.
Machane ga ra togopluw ngak,
ma ga par ndabki gagiyeg nigem.”
41 Me fanenikay Esau Jakob, ni bochan e ke fal’eg e chitamngin wa’athan, me yog u wan’ ni ga’ar, “Dabki n’uw nap’an mi ni mowawnag e chitamag nike yim’; ma aram e bay gu thang e fan rok Jakob.”
42 Machane me rung’ag Rebekah murung’agen e n’en ke tanomnag Esau, me l’oeg e thin nga ni yan ni pining Jakob nge yib me ga’ar ngak, “Mmotoyil ngog, i Esau ni walagem e ke leamnag ni nge fulweg ngom e kireb ni kam rin’ ngak ni nge thang e fan rom.
43 Fakag, mu rin’ e tin nggog. Mu fal’eg rogom ngam mil ngak walageg i Laban ni bay u Haran.
44 Ma ga par boch u rom nge mada’ ko ngiyal’ nike m’ay e damumuw rok walagem,
45 me pag talin e n’en ni kam rin’ ngak. Ma aram mu gu l’oeg be’ nge yib i guyem ngam sul. Ya gathi mang ni nge mul galfakag u pa’ag u lan ta’reb e rran.”
Isak ni l’oeg Jakob nge yan ngak Laban
46 Me ga’ar Rebekah ngak Isak, “Ke ngochngochan’ug ma ke chalbag ko fapi ppin rok Esau ni bogi ppin u boch e nam. Fa’an ku ra le’engiy Jakob reb e bpin ni girdi’en e re nam ney ni kanog e Hittite ngorad, ma kabfel’ ni ngum’.”