28
1 Me pining Isak Jakob nge welthin ngak ni bfel’, ni ga’ar ngak, “Dab mu le’engiy reb e bpin nu Kanaan.
2 Mu fal’eg rogom ngam man nga Mesopotamia, nga tafen Bethuel, ni chitamngin e chitinam. Mu le’engiy reb e bpin u rom, ni reb i fak Laban ni walagen e chitinam.
3 I Got ni Gubin ma Rayag Rok e nge fal’eg wa’atham ko mabgol rom nge pi’ ngom e bitir ni pire’, ngam mang chitamngin bo’or e nam.
4 Me fal’eg wa’atham nge pi’in ni owchem ni bod rogon ni fal’eg wa’athan Abraham, ma ga tafnay e re nam ney ni ga be par riy, ni Got e pi’ ngak Abraham.”
5 Me l’oeg Isak Jakob nge yan nga Mesopotamia ngak Laban, ni be’ nib mo’on ni fak Bethuel ni ir reb fapi girdi’ ni yima yog e Aramean ngorad. Laban e walagen Rebekah, ni chitiningin Jakob nge Esau.
Esau ni Le’engiy be’ ni bpin ni fak Ishmael
6 Me nang Esau nike yibilay Isak Jakob ke mu’ ma keyog ngak ni nge yan nga Mesopotamia nge le’engiy reb e bpin u rom. Miki nang ni fa’ani yibilay me yog ngak ndabi le’engiy reb e bpin nu Kanaan.
7 Me nang ni Jakob e ke fol rok e chitamngin nge chitiningin, ke yan nga Mesopotamia.
8 Ma fa’ani nang Esau ni Isak ni chitamngin e de fel’ u wan’ e ppin nu Kanaan,
9 me yan ngak Ishmael ni fak Abraham nge le’engiy be’ ni bpin ni fak ni Mahalath fithingan, ma walagen Nebayoth.
Lik’ay rok Jakob u Bethel
10 Me chuw Jakob u Beersheba nge yan nga Haran.
11 Me taw nga bangi n’en me par riy, ya ke aw e yal’. Me pag ir nga but’ nge teyey’ ngab malang.
12 Me lik’ay nike guy ba tawo’ ni yan u but’ nge mada’ nga lanelang. Ma be yan e pi engel rok Got riy ngalang ma yad be yib riy nga but’.
13 Me guy SOMOL nib sak’iy u to’oben. Me ga’ar ngak Jakob, “I Gag SOMOL, ni Got rok Abraham nge Isak. Bay gu pi’ ngom nge pi’in owchem e re nam ney ni kam pagem riy nga but’.
14 Pi’in owchem e bay ra boded urngin e fiyath nu fayleng. Ma bay ra ga’ niged e nam rorad i yan ko lel’och, nge yimuch, nge ngek, nge ngal, ma urngin e pi nam nu fayleng e bay i fel’ wa’athrad ni bocham nge bochan e pi’in owchem.
15 Dab mu pag talin, ni bay ug un ngom ngu’ug yoror rom ko yungi n’en ni ga be yan riy, ma bay gu fulwegnem ko re nam ney. Dab gu pagem nge mada’ ko ngiyal’ ni kug ngongliy urngin e tin kugog ngom ni bay gu rin’.”
16 Me od Jakob me ga’ar, “I SOMOL e riyul’ ni bay u roy, ma da ug nang.”
17 Me tamdag, me ga’ar, “Rib kandugwen e gin’ey! Dabisiy ni naun rok Got ma garog nga tharmiy.”
18 Me od Jakob nri kakadbul. Me fek fare malang ni teyey’ ngay nge suwonnag ni nge mang malang ko puguran. Me pu’og e gapgep nga daken fare malang me pining e magaer ngak Got.
19 Me tunguy fithingan e gin’em ni Bethel. (Re binaw nem e immoy fithingan ni Luz ko som’on.)
20 Me micheg Jakob bbugithin ngak SOMOL ni Got ni ga’ar, “Fa’anra um un ngog ngu’um yoror rog ko re milekag ney, mu um pi’ e ggan nge mad ngog,
21 mu gu sul nga tafen e chitamag ndabi buch ban’en rog, me ere ga ra mang Got rog.
22 Re malang ney ni kug suwonnag ni nge par nib malang ko puguran e bayi mang naun rom ni ngu’un meybil ngom riy, mu gu pi’ ngom ragag e pasent ko pin’en ni ga be yagnag ngog.”