32
Ba pilung nib mat’aw
Bay reb e rran ni bay yib ba pilung nib mat’aw, nge pi’in ni bay u rogned e thin ko nam nib ba yal’uw e gagiyeg ni bay ur ted. Ra bagayad ma bayi par ni bod ba manaf ni ngan naf ngay ko nifeng nge yoko’. Yad ra bod e yu pa’ i lul’ ni bay u daken bangi ted nder tugul ban’en riy, ma yad bod e tagalul’ u ba war ni ba ga’ ni ba ga’ ni bay u daken bangi ted. Owcherad nge telrad e bayi m’uth ko tin bt’uf ni nge yag ngak e girdi’. Gathi bay ku’ur ngochngochan’ gad ya yad ra ngongol u fithik’ e gumaen’ nge gonop, nge nangfan, ma thin ni bay u rogned e tin nri ir e yad be leamnag. Dariy be’ nra leamnag ni pi’in balyang e ngan tolang nagrad u wan’uy, ara nog ni girdi’ ni kireb e yad ba yul’yul’. Be’ nib balyang e ma yog e thin ko balyang, mma leamnag e pin’en nib kireb ni nge rin’. N’en ma rin’ nge n’en ma yog e ba togopluw ngak SOMOL, ma dar ma pi’ e ggan ngak e girdi’ ndariy e ggan rorad ara pi’ e garbod ngak e girdi’ ndariy ban’en ni yad ra unum. Ir be’ nib kireb mma rin’ e kireb; ma lifith l’ugun ni aram e be ngongliy e makath ni nge gafgownag e pi’in gafgow nge dabiyag ngorad mat’wunrad. Machane be’ nib yul’yul’ e be ngongol u fithik’ e yul’yul’ ma be tay ir ko tin nib mat’aw.
Gechig nge sul ngarogon
Gimed e pi’in ppin nib mom urngin ban’en ngomed ndariy ban’en ni be magafan’med ngay e mu telmed ko n’en gu be yog. 10 Kam pired e chiney ni bfel’ rogomed, machane ngiyal’ney ko binem e duw e bay mpired nike magafan’med, ya dariy wom’ngin e woldug romed ni grape ni ngam t’ared ngam ayuweged nga naun. 11 Um pired nib mom urngin ban’en ngomed nder magafan’med; machane chiney e ngam t’on gad ko marus! Mu lufed e mad romed ngam m’aged e mad nike kaday ma ke mogchoth nga lukngumed. 12 Mu pirdi’iyed pa’med nga daken ngorongormed nike kireban’med, ya tagil’ e woldug romed nib yong’ol e but’ riy nge yungi grape ni fi’imed e ka ni kirebnag, 13 ma pan ni bay rachangalen e be tugul u daken e but’ rok e tirog e girdi’. Mu yor niged urngin e naun ni i par e girdi’ riy ni yad ba felfelan’ nge fare binaw ni i yan e maruwel riy ni bfel’ rogon. 14 Mus nga tafen e pilung ni bay nn’ag, ma fare binaw ni tochuch ko nam e bay nn’ag. Pi tafen e girdi’ nge pi naun ni kan yororiy ni fan ko mael ma matanagen e binaw e bayi par nib puth ndariy n’umngin nap’an. Pi gamanman ni dongki ni malboch e bay ur gorbalgad riy, ma saf e bay ur pir’eged e pan riy ni ngar ked.
15 Machane bay ki pi’ Got ngodad e kan nthothup* rok. Ma yungi ted nder tugul ban’en riy e bayi yong’ol, ma yungi woldug e bayi yib e ggan ngay ni pire’. 16 Gubin yang u daken e nam ni bay un rin’ e tin nib mat’aw nge tin nib yal’uw riy. 17 Ra be’ ma bay i rin’ e tin nib mat’aw, ma aram fan ni bay un par u fithik’ e gapas nge pagan’ ni gubin ngiyal’. 18 Pi naun rok e girdi’ rok Got e bay un par riy u fithik’ e gapas ma dabi buch ban’en rorad, ma kem’ay e magafan’ rorad. 19 (Ma sigre’en e burey nike tugul e gek’iy riy e bay i par ni bfel’ gelngin e garbeb riy, ma pi binaw e bay i par u fithik’ e gapas ko yungi n’en ni ba ga’ e rad riy.) 20 Bayi par e girdi’ nri yad ba felfelan’ ya ke pire’ e ran ni fan ko woldug, ma yungi n’en ni bay i kay e gamanman ni dongki nge garbaw e pan riy e bay ur pired riy ndabi buch ban’en rorad.
* 32:15 KAN NTHOTHUP: gelngin Got.