33
Meybil ni fan ko ayuw
1 Pi to’ogor rodad e kar riya’ gad! Kar moro’ro’gad u fithik’ e yargel ma yad be yagnag e girdi’, ni yug aram rogon ni dariy be’ nike mororo’ ngorad ara yag nagrad nga pa’ e pi to’ogor. Machane re ngiyal’ ni yad be rin’ e pin’em riy e bayi mus, ma aram yad e bay un rin’ e pin’em ngorad.
2 SOMOL, mu runguymad. I gur e ke l’agan’mad ngom. Um yoror romad u reb e rran nge reb, ma ga ayuwegmad ko ngiyal’ nike yib e oloboch ngomad.
3 Ga ra cham ni pa’mad, me mil e pi nam ni bochan lingan e mael.
4 Chugum rorad e kan leag u fithik’ e mael.
5 Ke sorok SOMOL! Ya ir e be gagiyegnag urngin ban’en. Bayi sugnag yu Jerusalem ko tin nib mat’aw nge yal’uw,
6 me tay e re nam ney nike duwgil. Gubin ngiyal’ nma yoror rok e tirok e girdi’ ma be pi’ e gonop nge llowan’ ngorad. N’en nib th’abi t’uf rorad e madgun SOMOL ni ngi i par u wan’rad.
7 Pumo’on nib falu’ e yad be pong ni ngan ayuwegrad! Pi’in owchen reb e nam nga reb e nam ni yad be guy rogon ni nge aw e gapas u thilin e nam, e ba gel e meyor ni yad be tay.
8 Kanawo’en e yo’or e dabkiyag e yan riy ko wodmang nge riya’. Pi m’ag e yibe th’ab, ma pin’en nike ta’reban’uy ngay ni ngan rin’ e danir tay nga tagil’. Dariy be’ ni ku yibe tay fan.
9 But’ ko re nam ney e dakunir muruwliy ma kann’ag. Geargear nu Lebanon e ke mororoy, fare loway nu Sharon nib yong’ol e but’ riy e ke bod bangi ted ni desert, mu lan yu Bashan ngu daken e Burey ni Karmel e be mulmul yuwan e gek’iy riy nga but’.
I SOMOL ni be ginaeng e pi to’ogor rok
10 Be ga’ar SOMOL ngak e pi nam, “Chiney e nggu mithmith. Nggu dag fanag gel.
11 Tin gimed be puruy’nag e dabiyag i fanay ma urngin e n’en ni gimed be rin’ e ri dariy fan. Gimed be kireb nagmed!
12 Bay mmuchubu’gad ni bod e malang nni urfiy ni nge yib e wech riy, ma ku bod e rachangal nni urfiy nge ngal’ ni awat.
13 Urngin e girdi’ nib chugur nge tin nib mal’af e rrung’aged e tin kug rin’ miyad nang gelngig.”
14 Girdi’ nu Zion ni yad ba sug ko denen e yad be t’on ko marus. Be lungurad, “Gechig rok Got e bod ba nifiy ni be yik ndariy n’umngin nap’an. Gur rayag rok bagadad ni nge dabi yim’ u ba nifiy ni aram rogon?”
15 Rayag ni nge dab mum’ ni fa’anra u mog ma ga be rin’ e n’en ni bfel’. Dab mmaruwelgad nga gelngimed ni ngam ban niged e pi’in gafgow, ma dab mu feked puluwon e sasaliyeb. Dab mu chaeggad ngak e pi’in kar puruy’ niged rogon ni ngar thanged e pogofan ara ngar ngongliyed boch ban’en nib kireb.
16 Ma aram e dabi buch ban’en romed; bay mu pired ni gimed ba muduwgil ni bod rogon ni gimed bay u ba lan e gin kan yororiy ni fan ko mael. Bay u mu pired ni bay e ggan ni gimed ra kay nge ran ni gimed ra garbod ngay.
Fla’ab ni bay yib nga m’on
17 Bay kum guyed bayay ba pilung ni be gagiyeg u fithik’ e flaab u ba nam ni be ga’ i yan nga gubin yang.
18 Marus ni um ted ni bochan girdi’en yugu boch e nam ni ur feked e tax u pa’med nge pi damit e bayi par ni kemus ni ban’en ni kabay u wun’med.
19 Ma dab kum guyed girdi’en yugu boch e nam ni yad ba uf ma ba thil e thin rorad ni yad ra non ma dab mu nanged fan!
20 A mu sapgad nga Zion, ni fare binaw ni ud madnom niged riy e madnom ni fan ngak SOMOL. Mu sapgad nga Jerusalem, nib binaw nra ni par riy ma dabi buch ban’en rok be’! Bay i par ni bod ba tent ndabi rur, ni dabiyag ni nge puw e pin’en ni yuluy riy ma dabi math’ gafan.
21 I SOMOL e bayi dag ngodad e fla’ab rok. Bay ud pired u to’oben bogi lul’ nge yu pa’ i lul’ ni ba ga’ radan, ma dariy e barkow ko to’ogor nra yan u langgin.
22-23 Urngin e rigin ni bay u daken e pi barkow nem e ra par nib m’ay fan; ma lay riy e dabiyag ni ngan pithig! Bay da feked gubin fel’ rogon rok e pi to’ogor rodad, ni kaygi pire’ ni mus ko girdi’ ni mugutgut ma yira pi’ e f’oth rorad riy. I SOMOL e ra mang pilung rodad; Ir e bay i gagiyeg nagdad mi i yoror rodad.
24 Dariy be’ ni be par u lan e nam rodad ni bayki yog nib m’ar, ma denen e kem’ay i n’ag fan ni urngin.