14
But’ ni mlik ko yal’ nigel
1 I SOMOL e keyog ngog murung’agen e yal’ ni gel ni ga’ar,
2 “Yu Judah e ke parnag e meyor;
pi binaw riy e ke fengfeng,
girdi’ riy e ka ra thig gad nga but’ u fithik’ e gafgowan’,
ma yu Jerusalem e yad be yornag e ayuw ngalang.
3 Pi’in nib yo’or ban’en rorad e yad be l’oeg e pi tapigpig rorad ni ngar feked e ran;
yad be yan ko luwed,
ma darir piri’egged e ran;
ma ra fulweged e rume’ rorad i yib nib mlik’ langgin.
Ka ra mithged owcharad
ya ke math e liyab ngorad ma ke wagagay lanin’rad.
4 Bochan e dakir aw e n’uw
ke fengfeng e but’,
ma pi girdi’en e woldug e ka ra m’ar gad nga lanin’rad;
ka ra mitheged owcharad.
5 U lan e flang e be n’ag e gamanman ni deer
fak riy ni kafni gargaleg
ni bochan e pan ni dakriy.
6 Dongki ni malboch e yad ba sak’iy u pe’bugul e burey
ni yibe chibiy e fan rorad ni bod e jackal;
ma ka ra malmitgad
ni bochan e ggan dakriy.
7 Girdi’ rog e yad be yor ngog ni yad be ga’ar,
‘Yug aray rogon ni denen romad e ku gu affed riy’en,
machane SOMOL, mu aywegmad ni bod ni mmicheg.
Kug pi’ed keru’mad ngom nike yo’or yay;
ma ku gu denengad nib togopluw ngom.
8 Kemus ni gur e lagan’ rok yu Israel;
I gure cha’ ni ga ma aywegmad ko riya’.
Mangfan ni kambod be’ ni da gu nanged owchen u lan binaw romad,
ni bod be’ nib milekag ni kemus ni nge par ta’reb e nnep?
9 Mangfan ni ka mu bod be’ nike gin ngomad,
ni bod ba salthaw ni dakriy gelngin ni nge pi e ayuw?
Rriyul’ SOMOL ni ga bay romad!
Gamad e girdi’ rom;
are dab mu n’agmad.’ ”
10 I SOMOL e be weliy murung’agen e pi girdi’ ney ni be ga’ar, “Yad ba’adag ni ngar milgad rog, ma dabiyag rorad ni ngar gagiyeg nigedyad. Ere der felan’nug ngorad. Bay gu tay uwan’ug e kireb rorad mu gu gechig nagrad ni bochan e denen rorad.”
11 Be ga’ar SOMOL ngog, “Dab mu wenig ngog ni nggu ayuweg e pi girdi’ ney.
12 I mus ni yad ra pag e abich ma dab gu telig nga lamrad ni yad be wenig ngog ni nggu ayuwegrad; ma dab ra fel’gad u wun’ug, ni mus ni yad ra pi’ ngog e gamanman ni ka ni urfiy nge grain. Ma aram e bay gu li’rad ko mael nge uyongol nge liliy.”
13 Ma aram me lungug, “SOMOL ni Th’abi Tolang, ga manang ni be weliy e pi profet ngak e girdi’ ni dabki yib e mael ara uyongol, ya ke lungurad kamog ni kemus ni gapas e bayi par u daken e nam romad.”
14 Ma aram me fulweg SOMOL ni ga’ar, “Tinir e profet ni go’ bogi ban’en e yad be lifith l’ugunrad u fithingag; da gu l’oegrad ara gog ngorad e tin ni ngar rin’ed, ara gu welthin ngorad. Pin’en ni yad be weliy ngomed nni piliyeg e changar rorad ngar guyed, e gathi gag e yib rog, ya bogi yi’iy nib m’ay fan, ma bogi n’en ni sum ko leam rorad.
15 I Gag SOMOL e gu be yog ngom e n’en ni bay gu rin’ ngak e pi profet nem ni gathi gag e kug l’oegrad, ma yad be welthin u fithingag ni be lungurad, mael nge uyongol e dabi yib nga daken e re nam ney. Ere bay gu thang e pogofan rorad u fithik’ e mael nge uyongol.
16 Pi’in ka ra weliyed e pi thin ney ngorad e bay ki li’rad e mael nge uyongol. Dowef rorad e bay nin’ ngalan e yu pa’ i kanawo’ u Jerusalem, ma dariy be’ nra k’eyagrad. Irera’ e n’en ni bayib ngorad ni yad gubin, nge pi le’engirad, nge pifakrad ni pumo’on nge ppin. Bay gu gagiyegnag ngar pi’ed puluwon e kireb rorad.”
17 I SOMOL e ta’chiylen ngog ni nggog ko girdi’ murung’agen e kireban’ rog ni ngug ga’ar:
“Nge par lan owcheg ni be ser e lu’ riy ni rran nge nep’,
mu gu par ndab gu tal ko meyor;
ya girdi’ rog e rib elmerin e cham ni ka ni tay ngorad,
rib gel e maad’ad ni ka ni tay ngorad.
18 Nap’an ni gu ra yan nga daken e pi flang
ma gu be guy e ldow ko pumo’on ni kan li’rad ko mael;
ma nap’an e gu ra yan ngalan e yochi binaw,
mu gguy e girdi’ ni yad be yim’ ni mak’iy.
Pi profet nge pi prist e ka yad be ngongliy e maruwel rorad,
machane dar nanged e n’en ni yad be rin’.”
Girdi’ ni yad be wenig ngak SOMOL
19 SOMOL, mog, kari mu n’ag e girdi’ nu Judah?
Kam dabuy daken e girdi’ nu Zion?
Mangfan ni ka mu maad’ad ngomad nib almarin
ndabkiyag ni ggolgad?
Gamad be gay e gapas, machane dariy ban’en ni bfel’ nike yib i m’ug;
gu fineyed ni bay ggolgad, machane gafgow nib gel e marus riy e ke yib.
20 SOMOL, riyul’ ni ku gu ngongliyed e kireb;
ma ku er rogon pi chitamangimad ni ur ngongliyed e kireb,
ku gu ngongliyed e kireb nib togopluw ngom.
21 Mu leamnag e tin mmicheg ma dab mu dabuymad;
dab mu pag yu Jerusalem ngan m’aynag farad,
ya ireram e gin tagil’im nib gilbuguwan.
Dab mu th’ab fare m’ag ni mu ngongliy u thildad.
22 Dariy reb fapi liyos ko pi nam nrayag ni nge gagiyegnag nge aw e n’uw;
lanelang ni go’ ir rok, e dabyag ni nge gagiyegnag nge aw e n’uw.
SOMOL, ni Got romad, ku gu pired ni gur e ke l’agan’mad ngom,
ya gur e ga be rin’ e pin’ey.