15
Piyu Judah nturguy ni nge aw e gechig ngorad
1 Me ga’ar SOMOL ngog, “I mus ni fa’an mang e ba sak’iy Moses nge Samuel u roy ni yow be wenig ngog, ma dab gu runguy e girdi’ nu Judah. Mu guy rogon ngar chuwgad u p’eowcheg.
2 Nap’an ni yad ra fithem ko gin ngar sorgad ngay, ma ga weliy ngorad nike lungug:
Boch i yad e liliy e nge thang owcharad
ireram e gin bay ranod ngay!
Ma boch i yad e kug duwgiliy ni ngarm’ad u fithik’ e mael
ireram e gin bay ranod ngay!
Ma boch i yad e kug duwgiliy ni ngarm’ad ko uyongol
ireram e gin bay ranod ngay!
Ma boch i yad e kug duwgiliy ni ngan kolrad ngan fakrad ni ka ra manged kalbus,
ireram e gin bay ranod ngay!
3 I Gag SOMOL e kug duwgiliy ni aningeg ban’en nib gel e gafgow riy e nge yib ngorad: bay nli’rad ko saydon ngarm’ad; ma dowef rorad e bay yib e pilis ngi i girengiy; bay yib i par e arche’ ngi i longuy; ma gamanman ni malboch e bay yib i longuy e tin ke magey ko dowef rorad.
4 Ma bay gu gagiyegnag urngin girdi’en e pi nam nu fayleng ngar rus gad ko tin ke yib ngak piyu Judah, ni bochan e tin ni rin’ Manasseh u lan yu Jerusalem, ni be’ nib mo’on ni fak Hezekiah u nap’an ni Manasseh e pilung nu Judah.”
5 Be ga’ar SOMOL,
“Gimed e girdi’ nu Jerusalem, i mini’ e bayi runguymed,
nge mini’ e bayi kireban’ ngomed?
Mini’ e ra tal
nge fith salapmed?
6 Gimed e ka mu n’iged gag;
ka mu pi’ed keru’med ngog.
Ere ku gu k’iyag pa’ag ku ggad ngomed ka mu masengseng gad,
ya kug dabuy e k’adan’.
7 Lan gubin e binaw u lan e re nam ney
e ku gon’med riy nga fithik’ e nifeng ni bod kenggin e grain.
Ku gu thirifmed e girdi’ rog u but’,
ku gu thang e pogofan rok pifakmed
ya da’an mu taleged e kireb ni gimed be ngongliy.
8 Ku gu yo’ornag e ppin nike yim’ e pumo’on rorad
nike yo’or ko yan’ ni bay u dap’el’ay.
Pi’in ni pagel ni pifakmed nike taw nga fel’ngirad e ku gu thang e pogofan rorad,
ku gu gagiyegnag pi chitiningirad ka ra gafgowgad.
Gugad paag ngorad nib tomgin
ke yib e gafgow nib gel ngorad ma kar pired nga fithik’ e marus.
9 Re pin nike yim’ medlip e bitir ni fak e ke aw nga but’ nike m’ay e fan rok,
ni be guy rogon ni manga yigi pogofan.
Tamilang e ke ngal’ ni lumor u puluwon,
kem’ay fan ma ke par nike kireban’.
Bay gu gagiyegnag e pi to’ogor romed ngar thanged e pogofan rok
e pi aromed nike magey.
I Gag SOMOL e kugog e pi thin ney.”
Thin rok Jeremiah ngak SOMOL
10 Ba gel e gafgow ni gu be tay! Mang ni gargel nigeg e chitinag ngalan e biney e tamilang? Dabisiy ni nggu tugthin mu gu malu’ag thin ngak urngin e girdi’ ko re nam ney. Dawor gu pi’ e salpiy ngak be’ ni nge maruwel ngay nge mu’ me fulweg ngog, ma dawor gu ning e salpiy ku be’ nggu maruwel ngay nge mu’ mu gu fulweg; machane urngin e girdi’ ni yad be yibil ni yigi buch ban’en rog.
11 SOMOL, yibil ni yad be tay e nge yib ngog ni fa’anra da ug pigpig ngom ni bfel’ rogon, nge fa’anra da ug wenignag e pi to’ogor rog ngom ko ngiyal’ ni yib e gafgow nib gel ngorad.
12 Dariy be’ nrayag rok ni nge t’ar e wasey, nribun ba’aram ni yib ko lel’och ni ka ni athkuy ko wasey ni bronze.
13 I SOMOL e ga’ar ngog, “Bay gu pi’ e pi to’ogor ngar feked e fel’ rogon nge machaf ni bay u pa’ e tirog e girdi’, ni aram e gechig rog ngorad ni bochan e pi denen ni yad be ngongliy u lan e re nam ney ni ga’ngin.
14 Bay gu gagiyeg nagrad ngu’ur pired ni yad be pigpig ngak e pi to’ogor rorad u lan reb e nam ndar nanged murung’agen, ya damumuw rog e bod e nifiy, ma bay i daramram ndariy n’umngin nap’an.”
15 Ma aram mug ga’ar, “SOMOL, i gur e ga manang. Mu leam nigeg ngam ayuwegneg. Pi’in ni yad be gafgow nigeg e ngam fulweg taban ngorad. Dab mu gum’an nigem rorad ngar li’edgag ngagum’. Mu leamnag ni yibe yog e thin nib kireb ngog ni bocham.
16 Mu non ngog, mu gu rung’ag urngin bug e thin ni mog. SOMOL ni Got ni Gubin ma Rayag Rok, i gur e mmil suwog ngom, ere thin rom e be fal’eg lanin’ug ma be pi’ e felfelan’ ngog.
17 Da ug un ngak e girdi’ ko minmin nge mur ni yad be tay ni yad be felfelan’, ni bochan e maruwel ni mpi’ ngog mu gu par rog ni gu be damumuw.
18 Mangfan ni ngu’ug par ngu’ug gafgow? Mangfan ndabi gol e maad’ad u dowag? Mangfan nder fos? Mog, ka mu leamnag ni ngam t’ar lanin’ug ni bod rogon ba lul’ ni mlik’ ko ngiyal’ nike taw nga nap’an e gowel?”
19 Me fulweg SOMOL ni ga’ar, “Fa’an ga ra sul ngog, mu gu fekem ngam mang reb e tapigpig rog bayay. Fa’an ga ra weliy ban’en ni bay fan, ma gathi tin ndariy fan e ngam weliy, ma rayag ni ngam mang profet rog bayay. Girdi’ e bay ra sulod ngom bayay, machane gathi gur e ngam man ngorad.
20 Bay gu gagiyeg nigem ngam par u puluwrad ni ga bod bangi rungrung nib el nni ngongliy ko wasey ni bronze. Bay ur bad ra chamgad ngom, ma dabiyag ni ngar gelgad ngom. Bay gu un ngom ngu’ug yoror rom ngam par ndabi buch ban’en rom.
21 Bay gu chuwegem u pa’ e girdi’ nib kireb, mu gu ayuwegnem rok e pi’in yad ma gafgownag e girdi’. I Gag SOMOL e kugog e pi thin ney.”