20
Hezekiah ni Pilung ni m’ar nge gol
(Isaiah 38:1–8, 21–22; 2 Kronicles 32:24–26)
1 Bang ko ngiyal’ney me og e m’ar ngak Hezekiah ni Pilung nge chugur ni nge yim’. Ma fare profet i Isaiah nib mo’on ni fak Amoz e yan i guy me ga’ar ngak, “Be yog SOMOL ngom ni ngam yarmiy urngin ban’en, ya dab kum gol. Mu fal’eg rogom ni nga mum’.”
2 Me cheleg Hezekiah owchen nge sap ko rungrung nge meybil ni ga’ar:
3 “SOMOL, nge par u wun’um, ni rogon ni ug pigpig ngom e rib fel’ rogon ma rigub yul’yul’ ngay ma gubin ngiyal’ ma gu be guy rogon ni nggu rin’ e tin gab adag ni nggu rin’.” Me tabab ko meyor nib gel.
4 Me pag Isaiah fare pilung, machane u m’on ni nge yan nge chuw u lan fare yoror ko fare naun ni tafen e pilung me yog SOMOL ngak
5 ni nge sul ngak Hezekiah, ni ir e ma yog e thin rok e girdi’ rok SOMOL, nge ga’ar ngak, “I gag SOMOL ni Got rok e ga’ rom i David kakrom, e kug rung’ag e meybil rom ma kug guy lu’am. Bay ggol nigem, me nap’an dalip e rran ma ga yan nga Tempel.
6 Bay gu tem ngkum par ni gab fos ni ragag nge lal e duw. Bay gu ayuwegnem nge re binaw nu Jerusalem ney u pa’ fare pilung nu Assyria. Bay gu yoror ko re binaw ney, ni bochan bugwag nge bochan ko n’en ni gu micheg ngak e tapigpig rog i David.”
7 Ma aram me yog Isaiah ngak fa cha’ ni be par rok fare pilung nib m’ar ni nge tay bogi ban’en nib barbar nni ngongliy ko gek’iy ni fig ngalan mit e lot rok, me ra gol.
8 Me fith Hezekiah ni ga’ar, “Mang e pow riy nra micheg nra gol nigeg SOMOL ma nga tomuren dalip e rran ma rayag ni nggu wan nga Tempel?”
9 Me fulweg Isaiah ni ga’ar, “Bayi pi’ SOMOL ba pow ngom ni nge gagyal ni bayi tay nga tagil’ e tin ke micheg. Bin ngan e gab adag e chiney, gab adag ni nge yan e re taglul’ ni be’er u daken e tawo’ nga m’on ni ragag thal e tawo’ fa nge sul nga tomur ni ragag thal.”
10 Me fulweg Hezekiah ni ga’ar, “Bmom ni nge yan e taglul’ nga m’on ni ragag thal e tawo’! Ere nge sul nga tomur ni ragag thal e tawo’.”
11 Me meybil Isaiah ngak SOMOL, me gagiyegnag SOMOL fare taglul’ nge sul nga tomur u ragag thal ko fare towa’ ni n’uf Ahaz ni Pilung ngalang.
Pi tamol’og nu Babylonia
(Isaiah 39:1–8)
12 U bang ko ngiyal’ i n’em me rung’ag i Merodak Baladan ni Pilung nu Babylonia, nib mo’on ni fak Baladan, nike m’ar Hezekiah ni Pilung, ma aram me pi’ bangi babyor nge ba tow’ath nge yib ngak.
13 Me pining Hezekiah e magaer ngak fapi tamol’og me dag feni fel’ rogon ngorad — pi silber rok nge gol, nge spice nge florida, nge urngin e pi talin e mael rok. Dariy ban’en u lane pi senggil nma cha’riy e chugum rok riy fa bang u lan e gin ni be gagiyegnag ni de dag ngorad.
14 Ma aram me yan fare profet i Isaiah ngak Hezekiah ni Pilung me fith ni ga’ar, “Ke yib e pi pumo’on ney u uw ma mang e ka rogned ngom?”
Me fulweg Hezekiah ni ga’ar, “Karbad u Babylonia nib nam nrib palog.”
15 “Mang e kar guyed u lan e re naun ney ni tafen e pilung?”
“Kar guyed gubin ban’en. Dariy ban’en u lan fapi senggil’ ni yima cha’riy e chugum riy nda gu dag ngorad.”
16 Ma aram me ga’ar Isaiah ngak fare pilung, “Be ga’ar SOMOL ni Gubin ma Rayag Rok
17 bayi taw nga bangiyal’ ni gubin ban’en nu lan fare naun rom ni tafen e pilung, ni gubin ban’en ni cha’riy e pi ga’ rom kakrom ke mada’ ko bin daba’ e rran e bay ni fek nge m’ay nga Babylonia. Dariy ban’en nra magey.
18 Boch e pi’in nri owchem e bay ni fekrad nga bang ngar manged bogi eunuch ni ngar pigpiggad u lan tafen e pilung nu Babylonia.”
19 Me Hezekiah ni Pilung e leamnag ni fan e ran’ey e gapas ma dariy ban’en nra buch u n’umngin nap’an e yafos rok, aram me fulweg ni ga’ar, “Fare thin ni kamog ngog ni yib rok SOMOL e ba manigil.”
Tungun e gagiyeg rok Hezekiah
(2 Kronicles 32:32, 33)
20 Gubin e tin i rin’ Hezekiah ni Pilung, ni pi ngongolen e madangdang rok, nge rogon ni ngongliy bangi ran nge ker ba lul’ u tane but’ nge yib e ran ngalan fare binaw, e yi go’ kani yoloy ngalan e babyor ni Chepin e Pilung nu Judah.
21 Me yim’ Hezekiah, me yan Manasseh nib mo’on ni fak nga luwan nge mang pilung.