21
I Manasseh ni Pilung nu Judah
(2 Kronicles 33:1–20)
1 I Manasseh e ragag nge l’agruw e duw yangren me mang pilung nu Judah, me yog e thin u Jerusalem ni aningeg i ragag nge lal e duw. Chitinngin e Hefzibah.
2 Me un i rin’ e pin’en nib sonogor ni be rin’ e pi nam nike tulufrad SOMOL nga wuru’ fare nam nap’an ni be yan e tirok e girdi’ i yan ngay, Manasseh e denen nib togopluw ngak SOMOL.
3 Miki toy bayay fa yungi tagil e tayfan ni fa’an ni gathay i Hezekiah ni chitamngin; i ubung e pi altar ni fen e tayfan ngak Baal me ngongliy ba liyos ni ya’an fare got ni bpin ni Asherah, ni bod ni rin’ Ahab ni Pilung nu Israel. Manasseh e ki un i tayfan e pi t’uf.
4 Me ubing e pi altar rok e pi’in ndar nanged SOMOL u lan fare Tempel, ni aram e gin ni yog SOMOL ni ngu’un liyor riy ngak.
5 Mu lan fa gali yoror ko fare Tempel e ubung bogi altar riy ni fen e pi t’uf ni ngu’un tayfan.
6 Me maligachnag be’ nib pagel ni fak nib maligach ni mo’oruf. Mi i un i yi’iynag e n’en ni bayi buch me un ko pig nge pi sathuw, tmanwol, nge pi tapong thagith. I denen nrib gel nib togopluw ngak SOMOL me pug e damumuw rok.
7 Me tay fare pow rok fare got ni bpin ni Asherah ngalan fare Tempel, ni aram fa gin ni yog SOMOL ngak David nge Solomon ni fare mo’on ni fak ni ga’ar, “U roy u lan yu Jerusalem u lan e re Tempel ney, e irera’ e gin ni kug mel’eg u lan urngin yang i tafen fa ragag nge l’agruw i ganong nu Israel ni ir e ngu’un liyor mu’un meybil ngog riy.
8 Ma fa’anra fol e girdi’ nu Israel u gubin e tin kugog ni ngan rin’ miyad ayuweg fare Motochiyel ni ga’ngin ni pi’ e tapigpig rog i Moses ngorad, ma aram e dab gu pagrad ngan tulufrad nga wuru’ fare nam ni gu pi’ ngak e pi chitamangirad kakrom.”
9 Machane girdi’ nu Judah e dar folgad rok SOMOL, me waliyrad Manasseh ngar ngongliyed boch e denen nrib gel e kireb riy ko tin i ngongliy e pi nam ni ba’aram ni tulufrad SOMOL nga wuru’ fare nam nnap’an ni be yib e tirok e girdi’ i yib ngay.
10 U l’ugun e pi profet ni tapigpig rok SOMOL e yog riy ni ga’ar,
11 “I Manasseh ni Pilung e ke rin’ e pin’ey nib sonogor, bogi ban’en nib pag fini kireb ko tin i rin’ piyu Kanaan; ma pi liyos rok e ke waliy e girdi’ nu Judah nga fithik’ e denen.
12 Ere Gag SOMOL ni Got rok yu Israel, e bay gu fek e riya’ nga daken yu Jerusalem ngu Judah ni gubin e pi’in yad ra rung’ag murung’agen e ra balyangan’rad ngay.
13 Bay gu gechignag yu Jerusalem ni bod ni kug rin’ nga Samaria, ni ku bod ni kug rin’ ngak Ahab ni Pilung nu Israel nge pi’in owchen. Bay gu tharbeg girdi’en nge paryu Jerusalem nri dakuriy be’ riy, nikari be’ech ni bod ba raba’ i pilet ni kan’ag e garda’ riy ke be’ech kani pulpaliy.
14 Ma pi’in yad ra magey ndab ram’ad e gu ra digeyrad, bay gu pi’rad nga pa’ e pi to’ogor rorad, ni bay ra gelgad ngorad ngar feked u yargal e tin bay u daken e nam rorad.
15 Gu ra rin’ e pin’ey ngak e tirog e girdi’ ni bochan e kar denengad nib togopluw ngog kar puged e damumuw rog ni ka nap’an fa ngiyal’ ni chuw e pi chitamangirad u Egypt ke mada ko bin daba’ e rran.”
16 I Manasseh e thang e fan rok bo’or e girdi’ ndariy ban’en ni kar bucheged, nge sugnag e racha’ rorad daken e yupa’ i kanawo’ nu Jerusalem ni be yan ni lul’; i rin’ e ran’ey nge cheg ko girdi’ nu Judah ni waliyrad ngu’ur tedfan yug boch e got, ni aram tapgin miyad denen nib togopluw ngak SOMOL.
17 Gubin e tin kabay ni rin’ Manasseh, nib mu’un e pi denen ni rin’ ngay, e kani yoloy ngalan e babyor ni Chepin e Pilung nu Judah.
18 Me yim’ Manasseh min k’eyag u lan fare gi milay’ u charen e naun rok ni tafen e pilung, ni kanog e milay’ nu Uzza ngay, me Amon nib mo’on ni fak e yan nga luwan nge mang pilung.
Amon ni Pilung nu Judah
(2 Kronicles 33:21–25)
19 I Amon e rliw nge l’agruw e duw yangren me mang pilung nu Judah, me yog e thin u Jerusalem ni l’agruw e duw. Chitinngin e Meshullemeth, ni be’ ni bpin ni fak Haruz ko fachi binaw nu Jotbah.
20 Ma ku bod e chitamngin i Manasseh, i denen nib togopluw ngak SOMOL;
21 i falwok u ngonglen e chitamngin, ngi i tayfan e pi liyos ni i tay e chitamngin fan.
22 I pi’ keru’ ngak SOMOL, ni fare Got rok e pi chitamngin kakrom, ma de fol ko tin ni yog SOMOL ngak.
23 Pi tolang ko salthaw rok Amon e ra makathgad nib togopluw ngak ngar li’ed nge yim’ u lan fare naun rok e pilung.
24 Ma pi girdi’ nu Judah e ra thanged e fan rok e pi’in ra li’ed Amon miyad tay Josiah nib mo’on ni fak Amon nge mang pilung.
25 Gubin e tin i rin’ Amon e kani yoloy ngalan e babyor ni Chepin e Pilung nu Judah.
26 I Amon e ni k’eyag ko fare low ko yam’ u lan e milay’ nu Uzza, me Josiah nib mo’on ni fak e yan nga luwan nge mang pilung.