4
Jesus ni yib e mo’onyan’ i guy rogon ni nge denen
(Mark 1:12–13; Luke 4:1–13)
1 Me pow’iy fare Kan ni Thothup Jesus nga daken e ted ni fan e nge yib e mo’onyan’ i guy rogon e n’en nra rin’ me denen Jesus.
2 Ma fa’ani par ni aningeg i ragag e rran nge neap’ nde abich, me yib e bilig ngak.
3 Me yib e mo’onyan’ i ga’ar ngak, “Fa’anra Fak Got gur, me ere mu non ko pi malang ney nge ngal’ ni flowa.”
4 Me fulweg Jesus ni ga’ar, “Fare babyor nib thothup e be ga’ar, ‘Girdi’ e gathi go’o flowa era ikay me par nib fos, ya urngin bug e thin ni yib u langan Got e ra taye girdi’ nib fos ni dabi yim’.’ ”
5 Me fek fare mo’onyan’ Jesus ngalan fare binaw nib thothup, nge yan i tay nga daken e gin’en nth’abi tolang ko fare Tempel,
6 me ga’ar ngak, “Fa’anra Fak Got gur, ma ga og nga but’; ya be ga’ar e babyor nib thothup,
‘Ra yog Got ngak e pi engel rok e n’en ni ngar rin’ed ngom;
ma bay ra feked gur i yan nga but’,
ni dabi maad’ad em ko malang.’ ”
7 Me fulweg Jesus ni ga’ar, “Machane ki yog e babyor nib thothup ni ga’ar, ‘Ri dab mu sikengnag Somol ni Got rom.’ ”
8 Me ere fek fare mo’onyan’ Jesus nga daken bburey nrib tolang nge dag urngin e nam nu fayleng nge fel’ngin ngak.
9 Me ga’ar fare mo’onyan’ ngak, “Fa’an ga ra ragbug nga but’ ngam tayfag mu gu pi’ e pin’ey ni urngin ngom.”
10 Me fulweg Jesus ngak ni ga’ar, “Satan, mman ngam chuw! Ya babyor nib thothup e be ga’ar, Mu tay fan Somol ni Got rom ma yigo ir e ngam pigpig ngak!”
11 Ma aram me pag fare mo’onyan’ Jesus; me yib e pi engel ngarbad ra pigpiggad ngak.
Jesus ni tabab ko maruwel rok u Galile
(Mark 1:14–15; Luke 4:14–15)
12 Fa’ani rung’ag Jesus ni kanin’ John nga kalbus, me yan nga Galile.
13 Ma de par u Nazareth, machane me yan i par nga Kapernaum, nib binaw ni bay u to’oben e lipath nu Galile, ni bay u lan e nug nu Zebulun nge Naftali.
14 I yodorom ni fan e nge yib i m’ug nib riyul’ e tin ni yog Isaiah ni profet ni ga’ar:
15 “Nug nu Zebulun, nge nug nu Naftali,
nib migid ko lipath, u baraba’ e Jordan,
Galile rok e pi’in gathi yad piyu Israel!
16 Girdi’ ni yad be par u fithik’ e lumor
bay ra guyed ba tamilang ni ba ga’!
Nga daken e pi’in be par u fithik’ e lumor ko nam ni yam’,
e ke puf e woch u ba tamilang nib ga!”
17 Aram e re ngiyal’ ni tabab Jesus ko machib ni be ga’ar, “Mpi’ed keru’med ko denen ni gimed be rin’! Ya gagiyeg nu tharmiy e ke chugur!”
Jesus ni pining aningeg ni’ ni girdi’en e fita’
(Mark 1:16–20; Luke 5:1–11)
18 Nap’an ni be yan Jesus u to’oben e lipath nu Galile, me guy l’agruw i walag ni yow ma fita’, ni Simon (nike lunguy e Peter) nge walagen ni Andrew, ni yow be fita’ ko nug u lan e lipath.
19 Me ga’ar Jesus ngorow, “Mu unew ngog, mu gu fil ngomew rogon i yagnag e girdi’.”
20 Kachingiyal’ nem miyow digey e nug rorow ngar unew ngak.
21 Me yan miki guy l’agruw i walag ni pumo’on ni aram James nge John, ni Zebede e chitamangirow, ni yow bay u bowoch ni yad e chitamangirow i Zebede, ni yow be fal’eg rogon e nug rorad ni ngan fita’ ngay. Me piningrow Jesus;
22 ma kachingiyal’ nem miyow digey fare bowoch nge chitamangirow ngar unew ngak Jesus.
Jesus ni i fil e thin rok Got ngak e girdi’, ma be machib, ma be golnag e girdi’ ko lilliy
(Luke 6:17–19)
23 Me yan Jesus nga gubin yang u Galile, ni be machibnag u lan tafen e mu’ulung rorad e Thin Ni Bfel’ ni murung’agen e gagiyeg rok Got, ma be golnag e girdi’ u urngin mit e liliy nge m’ar.
24 Me wear murung’agen u daken e nam nu Syria ni ga’ngin, ma aram mi i fek e girdi’ i yib ngak urngin e pi’in bay e liliy rorad ni gubin mit, nge pi’in kar gafgowgad u urngin mit e gafgow; ni girdi’ nike ying e mo’onyan’ ngorad, nge girdi’ ni bay e m’ar rorad ni epilepsy, nge pi’in ndariy gelngin bang u dowrad, ma yigo’ gol nagrad Jesus ko liliy ni yad gubin.
25 Ma pire’ ni pire’ e girdi’ ni yad be lek, nrabad u Galile, ngu lan fare gi nug ni Ragag e Binaw fithingan, ngu Jerusalem, ngu Judea, ngu lan fa gi binaw ni bay u ba’nem e lul’ ni Jordan.