32
Kumaea bulumakau 'ana 'isa'isa bani'odi golidayega i 'idewai
1 Me Isileli Mosese i lulukamaseni 'oyayega i na obuma siwe i lukamata-wayogeni, bega i maia Eloni 'waineye i voneni i vo, 'U tovoi, yama yaubadavo 'u na 'idewadi, kumanidiavo i na 'edakumesema. Kebu ta da 'asetai ava'ai i souyeni Mosese 'waineye, kumanina Itifitayega i mieda.”
2 Nika Eloni bonadi i tutuli i vo, Yami vevinevo, natumiavo iavetadi wata vevinedi 'adi vaigavu 'oma'oma 'wa na kiata'idi 'wa na miedi 'waikuye.”
3 Bega tomotoga matatabudi 'adi 'oma'oma i kiata'idi Eloni i veleni.
4 I 'ewadi i 'a'avana, golidanina i kabuni i dewaga mulieta i dabia bega kumaea bulumakau natudi iavetana 'ana 'isa'isa bani'odi i 'idewai. Tomotoga i 'iseni i vo, E'a me Isileli, side yada yaubada, kumanina i kumeseda bega ta souyeda Itifitayega.”
5 Eloni tomotoga yadi sosoana i 'iseni bega 'eba velomu i didigi kumaeanina manawaneye wata bonana bwaikinega i veifufu i vo, 'Awa'awai 'Auvea 'waineye ta na lusakali.”
6 I 'atai awa'awaiogose tomotoga i tovoi bega 'aisaya i kabunidi 'eba velomu 'waineye wata 'aisaya veiana faifaina i 'anivelena-maimaiga. Matatabudi sakali i 'idewai, i 'ani'ani wata i veve'alayemu. Yadi yemunina 'wainega nuadi i lugaugaudi nika i lu'avo'avovo.
7 'Auvea Mosese i voneni i vo, 'U na obu-matayo'o yamu tomotogavo 'u vagavaidiga Itifitayega 'akonadi i sakona wata i vedumwe'ai'aieku.
8 Sauluva 'atumaina wata magemagetana 'ana 'eda a vonediga, 'akonadi i baileni bega golida i kabuni kumaea i 'idewai bulumakau 'ana 'isa'isa bani'odi, ma yadi subia i 'odu'odu wata 'aisaya i velomuyedi i kabunidi 'waineye. Bega ma ediavo i veveifufu i vo, De'e yada yaubada Itifitayega i vagavaida ta souyeda.’
9 'Akonadi a 'isedi, mogitana nuafoudi fa'alidi.
10 Mosese, 'asiauotoga 'u na tauya 'u na obu, yau 'aise'avaku a na miamia bega yaku nuasako i na vebwaika-'afo'afo de'e tomotoganidi a na luvela'ovidi, we'e ma'itufa 'omu tubumwavo 'adi 'aila'a a na 'ivebwaikaotogi.”
11 Siwe Mosese ma yana nuaobu 'Auvea yana Yaubada 'waineye i vo, 'Auvea, kebu ma yamu kamogala 'u na nuasako yamu tomotogavo 'waidie, kumanidiavo yamu toketokena 'wainega 'u vagavaidi Itifitayega.
12 I na nunago me Itifita i na vo, Awale yadi Yaubada i 'ita'ita'iedi siwe i vekaliedi, nuanuana i na luvewafadi 'oya 'waidie bega i na leo'a'avadi nika kebu tamu aitoi i na miamia?’ 'Asa'aiana, kebu 'u na toke 'u na nuasakoga. Kebu vita bwaikina yamu tomotogavo 'u na veledi.
13 We'e 'u da nuanidi yamu tofolovavo Ebelamo, Aisake wata Iakobo, kumanidiavo 'u vona'awaufaufa 'waidie taunimu 'amu wagavayega 'u vo, Yau 'amu wauma wata 'amu 'aila'a a na 'ivebwaikaotogi bani'odi 'ubwana abame. Fwayafwayanina matatabuna a vona'awaufeufeni, tubumwavo a na veledi i na 'eno-vagata 'waidie.”
14 Nika 'Auvea yana nuanua i sivilai bega nani vitana i voneyeniga yana tomotogavo 'waidie, kebu i da 'idewai.
15 Mosese i vilai i obuma 'oyayega, we'e kileu 'adi 'ailuga bei 'Auvea yana veakutagona i kilumiga, i kiave'avinidi. Kileunidi kilukilumidi ma vi'avi'aidi, manawana wata mulina 'waidie.
16 De'e kileunidi Yaubada i 'idewadi wata veimeanidi 'waidie Yaubada taunina i kilumidi.
19 Tutuyanina Mosese i le'wa i 'isanago yadi bae'wa 'waineye kumaea bulumakau 'ana 'isa'isa bani'odi i 'iseni, we'e tomotoga i tavotavola wata i kayakayama, nika ma yana kamogala veakutagona 'ana kileu i tawedi i tubakabakaledi 'oya lamuneye.
20 Bega kumaea bulumakau 'ani 'isa'isa bani'odi i 'ewai i kabuni, i 'a'avana i tutuya yavuloi'avana tui bani'odiga, mulieta i luyavuyavuleni ufa 'waineye me Isileli i lukakadedi i ve'alayemu.
21 Mosese Eloni i voneni i vo, De'e tomotoganidi ava'ai i 'idewai 'waimuye bega 'u kumesedi i sakona-magimagi'ai?”
22 Eloni i vo, Yaku 'auvea, kebu 'u na nuasakoyekuga, 'omu 'akonadi 'u 'asetai tomotoganidi yadi sauluva wata yadi vekamogaogala.
23 Tomotoga i voneku i vo, Yama yaubada 'u na 'idewai, kumanina i na 'edakumesema. We'e Mosese, kumanina Itifitayega i miemaga, kebu ta da 'asetai ava'ai i souyeni 'waineye.’
24 Nika a veifufu 'waidie a vo, 'Ai'edi golida 'waimie, 'eba vaigavu 'wa na 'ewayavuledi.’ Tomotoga fuedi golida i miedi 'waikuye bega 'aie a tawedi i obu nika kumaea bulumakau 'ana 'isa'isa bani'odi i souyeni.”
25 Mosese i 'iseni wata i 'asetai Eloni tomotoga kebu i da ve'isabodediga i lu'avo'avovo, we'e 'adi gaviavo yadi vesauluva i 'isedi bega i sidibidibiedi wata i awavesakoyedi.
26 Begaidi Mosese yadi bae'wa 'ana 'awa 'waineye i tovoi bonana bwaikinega i vegolegole i vo, Egavo 'Auvea nuanuami, 'wa na maia 'waikuye 'wa na ve'ila'eku.” Nika Livai 'ana wauma matatabudi i maia 'waineye.
27 Mosese i veifufu 'waidie i vo, 'Omi me Livai a na vonemi. Yami 'Auvea, me Isileli yami Yaubada bonana side i vo, 'Aitamogana 'aitamogana yami kefata 'wa na 'ewai, yami bae'wa matatabuna 'waineamo 'wa na nagoi, taimiavo, tatamiavo, emiavo wata 'ami mialatu matatabudi 'wa na luvewafadi, kumanidiavo kumaea 'waineye i 'odu'odu.”
28 Nika Livai 'ana wauma ma yadi ve'ililibu Mosese yana veimeanina i vematayakeyakeni. Tomotoga 'adi 'aila'a bani'odi 3,000 i luvewafadi.
29 Nika Mosese i vonedi i vo, De'e 'aiatanina 'waineye, 'Auvea yana veimea 'wa vematayakeyakeni, kebu taunimi natumiavo wata emiavo faifaidi 'wa da nuanuaga, begaidi 'Auvea i vesauluva-'atumaina 'waimie i yato'idiemi yana tofolovavo.”
30 I 'atai Mosese tomotoga i vonedi i vo, 'Omi sakona bwaikina 'wa 'idewai, siwe yau a na laka 'Auvea 'waineye bega a na velu'ui 'waineye, voke i yami sakona i na 'u'umidi.”
31 Bega Mosese i vilai i laka 'oyeye 'Auvea 'waineye i vo, Va'e tomotoganidi i sakona bwaikina, kumaea i 'idewadi golidayega bega ma yadi ve'ililibu i subisubiadi.
32 Yadi sauluva sakoina 'u da nuatavunidi we'e 'ai'edi kebu 'u na nuatavunidiga, 'aku wagava 'u na 'u'umi yamu buki 'wainega.”
33 Nika 'Auvea Mosese yana vona i tutuli i vo, Egavo i sakona 'waikuye 'adi wagava a na 'u'umidi yaku buki 'wainega.
34 'U na vilamu 'u na obu, tomotoga 'u na 'edakumesedi 'awalawanina a voneyeniga 'waineye, we'e yaku anelose i na 'edakumesemi. 'Awaie vematavuloga 'ana tutuya i na le'waga, a na wai tomotoganidi yadi sakona 'adi tutula a na veledi.”
35 Mulieta 'Auvea tomotoga i vematavulogidi viga bwaikina 'wainega fai kumaea i subisubiai wata i 'odu'odu 'waineye, kumanina Eloni golidayega i 'idewai.