33
Mosese 'Auvea yana mageta mataududulina i 'iseni
12 Tamu 'aiata 'waineye Mosese 'Auvea i voneni i vo, Basenadi 'u voneku nuanuamu yamu tomotoga a na vagavaidi a na nawedi fwayafwayanina 'u vona'awaufeufeniga 'waineye, siwe kebu 'u da voneku aitoi 'u na venua'ivineni bega taiadi 'a na nago. We'e 'u voneku 'u vo, A 'aseta-'atumaimu wata faifaimu a sosoana.’
13 'Ai'edi mogitana 'u na sosoanekuga, nuanuaku yamu nuanua 'u na sivemageseni, bega a na 'aseta-'atumaimu nika tutuya matatabuna a na kiavesosoanimu. De'e 'aila'anidi 'asa'aiana yamu tomotoga mogitana.”
14 Bega 'Auvea i tutula i vo, Yau tauniku taiadi ta na nago, wata mia niwalova a na velemu.”
15 Nika Mosese i vo, 'Ai'edi 'omu kebu taiadi ta na nagoga, kebu 'u na vagavaima de'e 'awalawanina 'wainega.
16 Mali tomotoga bani'odiga i na munega i na 'asetai yau wata yamu tomotoga 'u na sosoanema 'ai'edi kebu taiadi ta na nagoga? 'Ai'edi 'omu taiadi ta na nagoga, i na 'asetama 'u yato'idiema tomia fwayafwaya matatabuna 'waidiega, 'ima yamu tomotoga mogitana.”
17 Bega 'Auvea Mosese yana vona i tutuli i vo, Ava'ai yamu nuanua 'u lu'ivoneyeni 'waikuye, a na 'idewai fai a sosoanemu wata a 'aseta-'atumaimu.”
18 Nika Mosese i vo, 'Asiau nuanuaku yamu mageta mataududulina 'u da sivemageseni 'waikuye.”
19 'Auvea i tutula i vo, Yau 'asiau yaku 'atumaina a na sivemageseni debanagomuyega i na nago wata 'aku wagava tabutabuna YAHWEH a na 'inanai. Yaku nuakalikali wata yaku 'isanuakalikali a na sivemageseni aitoi a na venua'ivineniga 'waineye.
20 Siwe kebu a na tauyemu maigiku 'u na 'iseni, fai 'ai'edi aitoi i na 'isekuga i na wafa.”
21 Wata 'Auvea i vo, Side bei kileu tabwaneye 'u na tovotovoi lilivakuye.
22 A na givemu kileu 'awasasadie wata a na velubabalemu nimaku 'wainega, mulieta yaku mageta mataududulina manawamuyeamo i na nago 'ana tugusa a na 'iawemu.
23 Tutuyanina a na vaganagoga nimaku a na 'ewai dumwe'avaku 'u na 'iseni, we'e maigiku kebu 'u na 'iseniga.”