2 TESALONAIKA
Faulo yana kiluma 'ana veluga me Tesalonaika 'waidie
'Eba kiavemageta
Faulo bola i miamia Kolinita, lubulubu de'e 'ana veluga i kilumi i nago Tesalonaika tovetumaganavo 'waidie. Faulo vala i nogai me Tesalonaika 'ifwaidi i venuanaluga Iesu yana vila-vaitugana faifaina. Yadi nuanua igodina Iesu 'akonadi i da vila-vaitugani i da mai begaidi i vemia-'avo'avovo. Lubulubu de'e nageneye Faulo i ve 'waidie, nagami Yaubada 'ana Tovedumwe'ai'ai i na souyeni, yana vekali 'waidiega tomotoga fuedi i na sakona, mulieta Toveimea Iesu Keliso i na vilai bega tosakona matatabudi 'adi vematavuloga i na veluagai. Wata Faulo i velu'ase'ase nuanuana yadi sauluva i na siviladi, folova wata sauluva 'atumaidi 'waidie i na 'idumwebika. Lubulubu de'e 'ana 'idi side bani'odi.
Faulo yana vona-vekaiwa. 1:1-2
I vekaiwa Yaubada 'waineye yadi tokemaiga faifaina wata i veifufu 'adi tovedumwe'ai'ai 'adi vematavuloga faifaina. 1:3-12
Ve Yaubada 'ana Tovedumwe'ai'ai wata Iesu yana mai faifaidi. 2:1-17
Velu'ase'ase folova 'atumaidi faifaidi. 3:1-15
Faulo yana 'alanuai. 3:16-18
1
1 Emavo, yau Faulo, Sailasa wata Timoti taiadi 'a vekaiwa 'waimie. 'Omi Iesu yana 'Aila'a 'wa miamiani 'atamana Tesalonaika 'waineye, Yaubada Tamada wata 'ada Toveimea Iesu Keliso yadi tomotoga, 'waimie 'a kilukiluma.
2 'A vevelu'ui faifaimi, nuanuama Yaubada Tamada wata 'ada Toveimea Iesu Keliso ma yadi nuakalikali i na vevesauluva 'atumaina 'waimie wata nuanua bikana mia 'atumaina taiadi i na velevelemi.
Keliso bola i na maiga, tomotoga i na veimeyeda faifaina
3 Emavo, i lubwainema tutuya matatabuna 'a na vevekaiwa Yaubada 'waineye faifaimi. 'Atumaina 'ai'edi 'a na vevekaiwa faifaimi, fai yami vetumagana Iesu 'waineye i vevetoketoke-'afo'afo wata yami venuakalikali emiavo taiadi i vevebwaika.
4 Yami sauluvanidi faifaidi 'ima 'a awa'ai'aimi, Yaubada yana 'Aila'avo 'aitamogana 'aitamogana 'waidie 'a vo, Me Tesalonaika vita wata veviga bwaikidi i veveluagadi Iesu 'ana tovedumwe'ai'ai 'waidiega, siwe yadi vetumagana fa'alina i totokemaiga vitanidi 'waidie.
5 Vitanidi 'wa veveluagadi Iesu faifaina, 'wainega ta 'asetai Yaubada yana sauluva tonovidi fai vitanidi 'waidiega i 'idewa-vagasemi nika 'ami fata 'wa na luku yana 'Eba Veimea 'waineye.
6-7 Wata ta 'asetai Yaubada yana sauluva tonovidi, bega i na veimea tomotoganidi vita i velevelemiga vematavuloga i na veluagai, we'e 'omi i na 'ita'ita'iemi 'wa na veawai vita 'waidiega wata 'ima bani'odi. Naninidi de'e i na souyedi tutuyanina 'ada Toveimea Iesu yana anelose toketokedi taiadi i na mai abamayega, 'ai-'ala'alata Iesu i na umeni i na mai.
8 Egavo kebu nuanuadi Yaubada, wata 'ada Toveimea Iesu Valana 'Atumaina kebu i da vematayakeyakeniga, i na vematavulogidi.
9 'Adi vematavuloga wafa-vagata wata Yaubada i na awa'idi'idiedi, kebu 'ada Toveimea maigina i na 'ise'iseni wata yana toketokena magemagetana i na bavuyeni.
10 'Aiatanina 'waineye i na maiga, 'ada Toveimea Iesu yana 'aiata bwaikina. Tutuyanina 'waineye yana tomotoga magemagetadi i na subiai wata egavo i vetumagana ma yadi nua'ewa i na ve'ililibuyeni. 'Omi me Tesalonaika wata ma fuemie 'wa na subiai, fai valana 'a lu'ivoneyeni 'waimie 'wa vetumagana 'waineye.
Faulo yana velu'ui me Tesalonaika faifaidi
11 Fai 'wa vetumagana Iesu 'waineye, tutuya fuedi faifaimi 'a vevelu'ui Yaubada 'waineye. I venua'ivinemi 'wa luku yana 'aila'a 'waineye, begaidi nuanuama i na 'i'ivaisemi bega 'wa na vevesauluva 'atumaina yana nuanua bani'odi. I lubwainemi yami vetumagana 'wainega folova 'atumaidi tulina tulina 'wa na 'i'idewadi. 'A vevelu'ui faifaimi nuanuama Yaubada i na kiavetoketokemi bega 'ami fata naninidi matatabuna 'wa na 'i'idewadi.
12 De'e yama velu'uinina 'wainega 'ada Toveimea Iesu Keliso 'ana ve'ililibu i na veluagai yami sauluva 'atumaidi 'waidiega, we'e taunina i na 'ive'ai'aiwabumi. Naninidi i na souyediga fai yada Yaubada wata 'ada Toveimea Iesu Keliso ma yadi nuakalikali i na vesauluva 'atumaina 'waimie.