2
Yaubada 'ana Tovedumwe'ai'ai i na souyeniga faifaina
1-2 Ekwavo, nuanuaku a na veifufu 'ada Toveimea Iesu Keliso yana vila-vaitugana faifaina wata i na si'augida ta na laka 'waineye. Kebu nuanuaku 'wa na venuanaluga wata 'wa na venuafouviga vala 'wa nogai igodina 'ada Toveimea 'akonadi i da vila-vaitugani. Fai voke tamu tomogo i vekaliemi yana lau'age 'eba nua'ewa 'wainega, 'alo tamu aitoi i vonemi i vo, Yaubada i voneku Iesu 'akonadi i mai.’ ”'Alo voke tamu tomogo i vonemi i vo, Faulo yana lubulubu a 'iseni i kilumiga Iesu 'akonadi i vilai i mai.”
3 Siwe kebu. Vekalinidi kebu 'wa na ve'awamogitanedi.
Kebu 'ana fata 'aiatanina i na souyeni, nagami nani 'ailuga i na souyedi. Tamu, tomotoga fuedi Yaubada i na vegavieni wata tamu, Yaubada 'ana Tovedumwe'ai'ai i na souyeni, kumanina faifaina 'akonadi Yaubada i veimea 'eba ve'a'ava 'waineye i na luku 'ai-'ala'alase i na wafaotoga. Naninidi nagami i na souyedi, mulieta Iesu i na vila-vaitugani.
4 Tovedumwe'ai'ainina taunina i na awa'ai'aia we'e kumanidiavo tomotoga i awave-yaubada 'waidie wata yadi 'eba 'odu 'ifwaidi i na awavesakoyedi. We'e yana sakona i na vebwaika-'afo'afo i na luku Yaubada yana Vanuga 'Eba Velu'ui 'waineye i na miabui i na vo, Yau 'asa'aiana kumaniku Yaubada.”
5 Siwe 'wa na nuani yaku vona, basenadi taiadi ta miamia naninidi faifaidi a ve 'waimie.
6-7 Tutuya de'e kebu 'ana fata Tovedumwe'ai'ainina i na souyeni fai tamu nani toketokena i veve'etobodeni, we'e 'omi naninina 'akonadi 'wa 'asetai. Tutuya de'e Tovedumwe'ai'ainina yana toketokena sakoina i sousouyeni, givagivayega 'akonadi i folofolova fwayefwayeye, siwe naninidi sakoiotogidi kebu 'adi fata i na souyedi, nagami tove'etoboda i na tovibala mulieta tutuyanina Yaubada nuanuana, i na tauyeni nika 'ana Tovedumwe'ai'ai i na souyeni.
8 I na maiga siwe Toveimea Iesu i na vila-vaitugani, 'awayagugulinega i na luvewafai, we'e yana mageta mataududulina 'wainega i na ve'alalekoai, kebu wata i na miamia.
9 Mulieta Iesu i na mai, nagami Yaubada 'ana Tovedumwe'ai'ai Seitani yana toketokenayega 'eba nuavogana wata 'eba nua'ewa i na 'i'idewadi bega tomotoga fuedi i na vekaliedi.
10 Tomotoganidi wafaotoga 'ana 'edeamo i nunagoiga, nuadi i na 'ewadi yana vekalinidi sakoidi tulina tulina 'waidiega, fai Yaubada 'ana 'aseta mogitana i baila kebu nuanuadi i na ve'awamogitanedi 'alo i na nuakalikaliedi bega Yaubada i na 'ita'ita'iedi.
11 Fai i baila, Yaubada yadi nuanua i 'a'anivelenedi bega Tovedumwe'ai'ainina yana vekalinidi i na vevetumaganedi.
12 Fai kebu nuanuadi Yaubada 'ana 'aseta mogitana i na vetumaganeni, nuanuadi ma yadi sosoana i na sakosakona-vebogi, Yaubada i na veimea 'adi vematavuloga i na veluagai.
Egavo Yaubada i venua'ivinediga, wata i na 'ita'ita'iedi
13 Emavo, 'omi 'aila'animi Toveimea Iesu i nuakalikaliemi. I lubwainema faifaimi 'a na vevekaiwa Yaubada 'waineye, fai 'eba velamu 'waineye i venua'ivinemi bega i 'ita'ita'iemi. Ami 'ita'ita'inina 'wa veluagai fai 'Anu'anununa i agemi bega 'omi yana tomotoga magemagetami, wata 'wa vetumagana Yaubada 'ana 'aseta mogitana 'waineye.
14 Tutuyanina Iesu Valana 'Atumaina 'a lu'ageyeni 'waimie, Yaubada i vagavaimi i 'ita'ita'iemi bega 'awaie 'ada Toveimea Iesu Keliso yana 'ai'aiwabu magemagetana i na velemi.
15 Emavo, begaidi i lubwainemi 'wa na tovotovoi fa'alina wata ve Iesu faifaina 'wa na nunuave'avinidi, venidi lau'ageyega wata lubulubuyega a vonemi.
16-17 Yaubada Tamada ma yana nuakalikali i na vevesauluva 'atumaina 'waideye, venuafoufa'ala 'eno'eno-vagaina i veleda vetumagana taiadi bega ta 'asetai mogitana 'awaie ta na luku Iesu Keliso 'waineye. 'A vevelu'ui faifaimi, nuanuama 'ada Toveimea Iesu Keliso tauniotogina wata Yaubada Tamada i na kiavetoketokemi nuafoumi i na vatu bega kebu 'wa na kololo vita 'waidie. I na 'i'ivaisemi ma yami toketokena 'wa na folofolova wata 'wa na veveifufu nani 'atumaidi faifaidi.