11
Yesumbed Kurikuri Kara Kedmengkandoon
(Mt 6:5-13, 7:7-11)
1 Aron mamaa, Yesu kuu yembedmo kurikuri kamoon. Kwane, kurikuri kere dowan keroone, ye kedmengkandeen ye karub maambed ye yaa yedmoon, “Yariman, kurikuri kara kuu nub yaa kedmengkande, Yoonbed ye kedmengkandeendan yaa kedmengkandoon kwamune kui.” andoon.
2 Andoone, yembed yi yaa yedmendoon, “Kwane kurikuri keribka, kamune yedmime,
‘Ambe, ewaningko kuu karadmo ande kankoonuub.
Ebbed korok kere ooni yeman kuu munuk.
3 Aron mimim anembaranuub ye animan kuu bangkandembere.
4 Nub ambarakmi komo kamuwen kuu are nonondande,
amborom kuu kane kanembed nub yaa komo ambarakmiwen kuu are nonondanduwen kowe.
Kwane, nub ben ambarakmaniib dee andi ye kiwaan ari nongkobaab.’ andime.” andoon.
5-6 Kwanandekore, yembed yi yaa yedmoon, “Kuruwak weng kei. Karub maa yangkodmiyiib yaa amnoombed wene ye yaa yedmaneen, ‘Angkodmi, nangkodmi maa ne owod monoone animan ananuuwiibban kowe, om ayoobmim dungkum kere benbangkawe.’ andaneen.
7 Kumban ye angkodmi ambiwoom doroon kumbed inandaneen, ‘Ne yaa kwamaab. Ambongko kuu kebenekori karangmaan, kere ne dana awene kuu neyiib yaa dangiwen kowe, dembeni om kuu man kabdainban kii.’ andaneen.
8 “Ne yiib yaa yedmaan kuu, ye kuu yangkodmi kuned dembeni man kona andaanban, kumban yangkodmi monoon kuu arudkonoyiib ika kaamoboon kowe, dembene yemoon benbangkananeen.
9 “Kowe, nembed yiib yaa ke yedmendaan kei, God yaa kawe ande kaamone. Kaamonaneeb kuu kabdaneen. Onme. Onmaneeb kuu Godbed korokbebdaneene wedmaneeb. Ambongko yaa wangke. Wangkaneeb kuu Godbed eb yaa nandaneen.
10 Karub korem kanembed kaamonaneen kuu kandaneen, kanembed onmaneen kuu wedmaneen, kanembed ambongko yaa wangkaneen kuu ye yaa nandaneen.
11 “Ambeya, danambed okyiri oon kawe ande kaamobdaneen kuu komombed konaneeb? Niin arud niinbed konaneeb dee?
12 O, danambed on wini ande kaamobdaneen kuu kakbed konaneeb dee?
13 Kwane, yiib kuu arewadan kumban, yiib dana yaa munob bangkandi amun kuu benbangkandi kuu yiibkaad kowe, yiib Ambe Ewen ari doreen kuu yiib inamen burudandene, kane kanembed ye yaa kaamonaniib kuu ye Kingkin Karadmo kondaneen.” andoon.
Yesu Ye Aromkono Kuu God Yaambed
(Mt 12:22-29, 12:43-45, Mk 3:20-30)
14 Aron mamaa, Yesumbed weng waab ye karub yaa awad arewa kankoraroon. Kwane, awad arewa kuu angkanoone, weng waab ye karub kuu weng dakmoone, kadaareb kuu binangkiwen.
15 Kumban yenambed yedmiwen, “Ye kuu awad arewa yi korok darewoob yaromkono yaambed awad arewa karub yi niindem aom kuu benkiradmeen kii.” andiwen.
16 Kwane, karub yena kuu Yesu ye komboon wedmi ye dowad, “God yaambed dud korokboko wedmem.” ande kaamoneniwen.
17 Kumban Yesu kuu yimbed komo meeniwen kuu yekaadkeroon kowe, yembed yi yaa yedmoon, “Ambibkin mimodan andokbe yeka yeka kere yikanmo nangmiwen karen, korem kuu monmariwen karen. Kwane, ambib mimodan andokbe yeka yeka kere yikanmo nangmiwen karen, korem kuu dobaraibban, yowore dowan keriwen karen.
18 Kowe Seten awene andokbe yikanmo nangbaniib kuu yembed oonoon ye yumbon kuu komo kere aromkonoyiib dobaraneen? Yiibbed yedmimaib kuu ne kuu awad arewa yi korok Belsebul yaromkonombed awad arewa kuu ben kiradmimain andimaib kowe, kwane kaamonaan kui.
19 Kumban ne kuu Belsebul yaromkono yaambed awad arewa benkiradmimain karen kuu, angkon yiib karub kuu kane yaromkonombed benkiradmimaib? Kwamune kowe, yiib karubbed yiib yaa kuu anam ambarakmiib kii andaniib.
20 Kuned ne kuu God yaromkono anam yaambed awad arewa kuu ben kiradmiin kowe, Godbed korok kere oonimbon kuu yiib yaa muneen kii!
21 “Kwane, karub aromkonoman yambib yaa arud barang yemoon be oone dobaraneen kuu ye yiribman kuu yiminmo danganeen.
22 Kumban karub aromkono darewoob ye karubbed menene nangbe burudandaneen kuu mene arud barang yemoon yambib yaa ooni yeman nongkobooniib odamodiib kuu be wenekore ye angkodmia yaa bangkandaneen.
23 “Karub kanembed ne yaa ibmo kerindo kuu manmo keroon. Kanembed ne yoom wenori deme awinindo kuu boketawaroon kii.” andoon.
Awad Arewa Angkanoon Ye Karub
(Mt 12:43-45)
24 “Kwane, awad arewa karub niindem aombed anburaniib kuu bidambibkin koknoon okiibban angka yiidkimbon onmenmo yarembaraneenka, dobarande yiminban kere dowakeniibban keraneen kowe yekareb yedmaneen, ‘Nambib domonde manaan yaa ika wana.’ andaneen.
25 Kwane ika mene wedmaneene karub niindem aom kuu arenib nekwane yirimbonmo amun keriwen kowe,
26 kwane wene awad arewa ediib miin arewa anam ye arebbaniib benmananeen. Kwane yi korem kuu karub ye niindem kuyaom dobaraniib. Kwananiiwe, karub kuu anuk doboroon arebban, miin arewa anam keraneen.” andoon.
Kane Kane Kuu Amun Kerundoon?
27 Yesu kuu kwane kuye weng dakmeene, wonong maa kadaareb aombed ye yaa baande yedmeen, “Eb ena kuu Godbed amun kerundoon amborom kuu eb woonenu muk koween kowe.” andeen.
28 Kumban yembed yu yaa yedmoon, “Yii, maa, anam kuu kei. Kane kanembed God ye weng wengamberekorib anam andenib awiniwen kuu Godbed amun kerundoon kii.” andoon.
Dud Wedmandiweddan Ongkandoon
(Mt 12:39-42)
29 Kwane, nimakarub yena yemoon kuu kadaareb yaa kwane dabokniiwe, Yesumbed yedmoon, “Kibik doriibdan ye nimaya karuwa kuu ambarakmidan. Yi kuu dud korokbok ande kaamonimaib, kumban yi yaa kuu dud korokbaanban, Yona yaa kwanoon areb korokbaneen, kumbedmo.
30 Yona yaa kwanoon kuu Ninevadan yaa dud korokboon. Kwamune areb kuu Karub Ye Mingki kangkon kibik doriibdan yaa korokbaneen.
31 “Kwane Godbed wengyundaneen yaron ari kuu, ambab kuri ye kuinbed menenu ‘Kibik doriibdan kuu arewa anam kii.’ andanuun, amborom kuu yu kuu miin ambab kurimbed menenu Solomon ye kedmengkandi amun wengambarande muneen kowe. Kumban karub maa Solomon yaningko burudande miin darewoob yeman kuu ke monoon kei!
32 “Kwane, Godbed wengyundaneen yaron ari kuu, Ninevadanbed menenib ‘Kibik doriibdan kuu arewa anam kii.’ andaniib, amborom kuu yi kuu Yonambed amonombime ande kedmengkandoon yaambed amonombiwen kowe. Kumban karub maa Yona yaningko burudande miin darewoob yeman kuu ke monoon kei!” andoon.
Nambiri Kuu Komo Yeman?
(Mt 6:22-23)
33 “Nimakarub korem kuu lem yurekore kanwene biknimbon aom o meneki wongdem aom kowimokban. Kwani kuu koronde ye dobirimbon ari kowaane, kane kane awudirimaib kuu nambiri kuu wedmimaib.
34 “Yiib indob kuu yiib id kumundin ye nambiri kii. Yiib indob amun keraneen kuu yiib id kumundin kuu nambirimo keraneen. Kumban indob arewa keraneen kuu yiib id kumundin kuu kumunmo keraneen.
35 “Kowe kaadkerime! Kumunmo keraib.
36 Yiib id kumundin kuu nambirimo kere ma mirikniyiibban keraneen kuu yiib yaa kuu dianmo nambaraneen, nambiri darewoob areb yiib yaa nambaraneen.” andoon.
Yesumbed Butun Kamoon
37 Kwane, Yesu kuu dakme dowan keroone, Farisimanbed ye yoom animan anem ande yedmoon kowe, ye kuu wenene arak dia yaa diboroon.
38 Kumban, Farisiman kuu wedmoone, Yesu kuu Yuudan yi amowamob yaambed dingki ogindombed animan anandameen kowe binangkoon.
39 Kwanoone, Yariman Yesumbed ye yaa yedmoon, “Farisidan, yiib kuu kabusiib meneki wongdemiib kuu bunangkamo ogimaib areb. Kowe yiib niindem aom kuu nubka barang yemoon bem andi ye inameniib ambarakmi inameniib kumbed demboon kui.
40 Yiib kuu inameniibbandan kii! Bunangka ongmoon ye God kuu kwane niindem aom ongmoon kowe, yiib niindem aom kuu yekaad kii.
41 Kowe yiib kabus aomiib meneki aomiib komo dangoon kuu kamboknondan yaa bangkandime. Kwananiib kuu yiib kuu korem karadmo keraniib kii.
42 “Farisidan, yiib kuu kaadkerime, amborom kuu yiib mongkobon angkambed animan ari bokni yeman mimimiib andokbe wenore angko angkoyiib kere mimo God yaa konimaib kumban, yiib kuu wengyundi amun kamimokban kerenib God ye mimyob dowaken kuu yena yaa kondimokban kowe. Korem kee kwamaniib kumbed yimin keraniib.
43 “Farisidan, kaadkerime, amborom kuu yiib kuu kurikuri ambiwoom kuu karub aningkoman ye dibirimbon amun arimbed dibiriyiib animan berengkimbon aombed yenambed yiib yaa kubendiyiib kuu yiib kubi darewoob yeman, yena kuu yirimo.
44 “Yiib kaadkerime, amborom kuu yiib kuu bob konombon areb kumban nimakarub kuu yikaadban kumbed, animari dodkanmo dewenebimaib kowe.” andoon.
45 Kwanandoone, Yuudan yi amob kedmengkandi ye karub maambed yedmoon, “Kedmengkandi korok ee, weng kee dakmeeb kee nub yaa kwangkon damangkandewen kii.” andoon.
46 Kwane Yesumbed inandoon, “Amob kedmengkandidan, yiib kaadkerime, amborom kuu yiibbed nimakarub yaa amob yobdood yemoon ongmimaib kumban, yiib kuu yi yaa awandimokban.
47 “Yiib kaadkerime, amborom kuu yiib ambeyambed profesidan kuu kurin yiiwe dukniiwe yi bob konombon kuu yiibbed manimanandeb ongmiwen kowe.
48 Kwane, yiib ambeyambed komarewa kamiwen kuu yiibka anam amun ande korokbiib kui. Yimbed ambarakmiwen kuu yiibbed ibmo keriwen.
49 “Kwamunekob, God yeka ye meeni kangdom yaambed yedmoon, ‘Nembed profesidaniib apasodaniib yedmaniine yi yaa wananiib. Kwananiib kumban, yena kuu yaniiwe duknaniib, angkon yena kuu yaniiwe durud yewed kandaniib.’ andoon.
50 “Kwamunekob yiib kibik doriibdan kee dabab darewoob kandaniib. Yimin andowoon yirimbed mene kibikee, profesidan kuu yiiwe dukniwen kowe, yi dabab kumbed yiib kuu kandaniib.
51 Ibduruk kuu Abel ayiwen. Yeenbon kuu Sekaraiya kuu dingkan nengkimaib ye bot wuubimbon dore kurikuri boyambib darewoob dore wedyirimbed ayiwen kui. Eyokee, ne yiib yaa yedmaan kuu, kuye dowad kumbed kibik doriibdan yaa kuu dabab kondaneen.
52 “Amob kedmengkandidan, kaadkerime, amborom kuu yiibbed God yaa kaadkeri ye kiwaan kuu kanbikniwen kii, yiib kangkon kiwaan kee ari winindo kerenib nimakarub yena yi kiwaan wini kuu kebendiwen kii!” andoon.
53 Kwanekore, Yesu kuu domonde wanandamoone, Yuudan yi amob kedmengkandidaniib Farisidaniibbed manmo kerekorib, Yesu yaa kaamobi yobdood yemoon kaamobiwen,
54 amborom kuu Yesu kuu weng arewa maa yedmoko awinenem ande kamiwen kowe.