3
1 Pur ningui de sáan, laat ni anát xpɨny Dios, laat ni abcuabeeny par gactɨ de lliinny, gulchané cuend Jesucrist laany ni nány Bxozroo ni roldilaaznɨ, laany ni bxiaald Dios lo guɨchliu.
2 Te pur Jesucrist bzuubpacny xtiidx Dios ni bcuabee laany zec ni bzuubza Moisés xtiidx Dios nez lo de bniety Israel.
3 Per mazru riáld Jesucrist didxdoo que Moisés pur ni mazru sacny, zecquɨ tuby bniety ni rzuub yuu, mazru rzubyaadeb laab que yuu.
4 Irate yuu nuupac tuby ni rzuubni, per Dios baanny irate ni nuu.
5 Ne Moisés bzuubbɨ xtiidx Dios, baanbɨ sirvɨ lony chi bteedbɨ xtiidxny lo de bniety Israel par gudixteeb lodeb xa ná ni guedgac.
6 Per Jesucrist zec Lliin Dios ni nány, laany rnabeeny lo irate xpɨny Dios. Ne dunnɨy nan xpɨny Dios, belati chalaa izutipnén ni roldilaaznɨny sin quɨt choxaclaaztin axtquɨ dxi ni gueed Jesucrist stuby.
7 Pur ningui, zec ni rnii Spíritu Sant:
Belati rindiagtɨ xtiidx Dios andxiré,
8 quɨt sunadtit zec ni baany de ni quɨt nicuadiag xtiidxny
chi baandeb prueb laany deni guzuguaadeb nez lo yiubiz.
9 Ne ruy ná ni quɨt nicuadiagti de to xpɨngultɨ xtiidx Dios
masquɨ gunádeb de milagrɨ ni baanny nez lodeb iduibte cuarent iz nez lo yiubizqui.
10 Pur ningui, bdxichné Dios de bnietqui,
ax guniiny:
“Irɨny xgab ni rundeb
niclɨ quɨt rundeb pur gacbeedeb xa rcaaza gúndeb.”
11 Ziy xquel bchiichdeb Dios
ax baantipny xgab dec
aquɨt yiiutideb rut gapdeb guelrzilaaz xtenny.
12 Pur ningui, gulcualo laat de sáan, te par quɨt chúu tuby de saat dec purzi de xgab ni quɨt illiú xtenbɨ ni rcua chaldilaazbɨ, ax ibicáb lo xnez Dios ni rbeznabány.
13 Güenru llillite gul lɨdx ne gulduzaclaaz de saat laga nuuru tiamp, te quɨt chigald aquɨtru rcuadiagtɨ xtiidx Dios pur ni abaany duld gan laat.
14 Te pur belati anan xpɨny Crist, iduibtiampte ná par izutipnén ni roldilaaznɨny zec ni bioldilaaznɨny desde gulo.
15 Ne zec ni aguniia laat, lo xquiits Dios rnii:
Belati rindiagtɨ xtiidx Dios andxiré,
quɨt sunadtit zec ni baany de ni quɨt nicuadiag xtiidxny gulalqui.
16 Ne, ¿tudey quɨt nicuadiag xtiidx Dios masquɨ bindiagdeb ni guniiny? ¿Ta gati lagac de bniety Israel ni gulée Moisés nez Egiptoy?
17 Ne, ¿ta gati lagac laadebɨy bdxichné Dios cuarent iz pur ni baandeb duld, bsaclodeb laany ax ziendeb gutydeb nez lo yiubiz?
18 Ne, ¿ta gati lagac de bnietquiy raipy Dios dec abaantipny xgab quɨt yiiutideb rut gapdeb guelrzilaaz xtenny, pur ni quɨt nicuadiagdeb xtiidxny?
19 Ziy xquel racbeen dec quɨt niaptideb guelrzilaazqui pur ni quɨt güeldilaaztideb ni raipy Dios laadeb.