8
1 De lo ira ni cadxueen ni mazru sac ná dec Jesucrist ná bxozroo xtennɨ, laany ni azubny llayabaa lad naldí xte Dios ni rnabee.
2 Ruy anuuny de bxoz, laniudoo ni bzuub Dios, gati bɨnguɨchliuti.
3 Irate de bxozroo lo guɨchliuré xtsɨɨndeb ná renédeb de gun ne rguindeb de ladxaa zec tuby gun par Dios. Ziygacza Jesucrist ni ná bxozroo xtennɨ nuuza xi bdeedny Dios.
4 Ne belati zeczi zuguaa Jesucrist lo guɨchliu niclɨ quɨt niactiny bxoz, pur ni anuu de bxoz ni rené de gun lo Dios zec ni rnabee ley ni bsanné Dios Moisés.
5 Per irate ni run de bxoz lo guɨchliuré, naizdeni zec tuby blda, zec tuby seny xa ná de cos ni nuu llayabaa. Dunnɨ nánnɨ dec naizdeni tuby seny te pur chi zéed izuub Moisés yudoo, chiy raipy Dios laab: “Bguiaapac te gúnu irate zectisy ni abliuua liú quia dany Sinaí.”
6 Per mazru güen ná ni run Jesucrist laany ni abiáldny nány bxozroo xtennɨ, te pur mazru güen ná nez cuby ni bxalny par idxapnɨ nez par cun Dios. Ne pur nez cubyqui ax mazru güen ná de promes xte Dios par cun bniety.
7 Belati pur ley nialee nibányzaac bniety nez lo Dios, ax aquɨt rquiinti níiu tuby nez cuby.
8 Per Dios gunány dec quɨt cayunti bniety zec ni ná par ax guniiny:
Nare rniia dec teru idzɨny dxi ixala tuby nez cuby
par de bniety Israel ne de bniety Judá.
9 Per nez cubyqui quɨt nátiny zec ley ni bsannía de to xpɨngultɨ
chi guliiadeb Egipto.
Ne pur ni quɨt nicuadiagdeb xtiidxa
ningui gulelaazadeb, gunii Dios.
10 Ne ziyza guniiny:
Squé xquel abíian diidx gac cun de bniety chi idzɨny dxi:
Láani quiadeb isáana de ley xtena ne
láani lazdoodeb icuáani.
Chiy nare gaca Xtiosdeb,
ax laadeb gacdeb de xpɨnnia.
11 Dxiqui aquɨtru rquiinti iseed de bniety saani
niclɨza betsdeb par gumbeedeb Dios,
te pur iratedeb zumbee nare,
desdɨ mazru bichiin axtquɨ mazru guroo.
12 Chiy nare zuna perdón irate de mal ni abaandeb,
ne quɨt chúuti dxi chanelaaza de xtulddeb.
13 Chi gunii Dios ixalny nez cubyqui esquɨ pur aquɨtru illiúti nez gulal ni gúp bniety par cun laany, ne ni aquɨtru illiúqui ziub nitloni.