12
(Mr. 2:23-28; Lc. 6:1-5)
1 Tuby dxi ni rzilaaz bniety, chi zeteed Jesús cun de xpɨnny de nez lo niaa rut nuu trigu, chiy guzulo rldiaan de xpɨnny ax guzulo raxdeb de do xte trigu par rquiindeb de triguqui.
2 Parzi chi guná de fariseu ni cayundeb, ax raipdeb Jesús:
—Bguiaabiu de xpɨnbiu caniábiu, adeb cayun ni quɨt riáld gúndeb dxi ni rzilaaz bniety.
3 Chiy cuaby Jesús:
—¿Ta gady guuldtɨ lo xquiits Dios ni baany David tuby güelt chi bldiaanbɨ cun de xcumpnierbɨ?
4 David biiub laniudoo xte Dios ax cuáab de guechtily ni abiacldee par bquinnébni de xcumpnierbɨ ne quɨtllɨ ná par iquiindebni, de bxozzi ná par iquiinni.
5 Ziyza, ¿ta gady guuldtɨ lo ley xte Moisés dec quɨt xi duldtiy run de bxoz laniudoo masquɨ quɨt rzilaazdeb dxi ni rzilaaz bniety?
6 Ne nare rniia laat dec nare ni zuguaníaa laat mazru saca que yudoo.
7 Belrulati racbeet xi zelo lo xquiits Dios rut rnii: “Ni rcaaza ná ilaslaaztɨ saa bniettɨ gati axtpacza chúu xi inɨɨdxtɨ nare zec tuby gun.” Belrulati racbeet de diidxquɨ ax quɨt icuaquiatit de ni niclɨ quɨt xi cayunti.
8 Ne nare Bniety ni bxiaald Dios napzaca guelrnabee par dxi ni rzilaaz bniety.
(Mr. 3:1-6; Lc. 6:6-11)
9 Chiyru zégac Jesús ax biiuny láani tuby yudoo ni ná nezqui.
10 Chiy laniudooqui zuguaa tuby bniety nguiu ni gubiz tuby lad naani. Ne cun de fariseu caguíilydeb nez xi icuaquiadeb Jesús ax gunabdiidxdeb laany:
—¿Ta zelee isiac bniety tuby bniety racxú dxi ni rzilaaz bniety?
11 Chiy cuaby Jesús lodeb:
—Belati laat naptɨ tuby llíily ne chiy yabmɨ láani bzia dxi ni rzilaaz bniety ax, ¿tatix quɨt cuéetmɨ dxiqui?
12 Ne anre, ¿ta gati sacru tuby bniety que tuby llíily? Pur ningui xíteete náti gún bniety ni ná güen dxi ni rzilaaz bniety.
13 Chiyru raipy Jesús bniety ni ná naani ziy:
—Bldí noo.
Ax bldí bnietqui naani ne hóracqui guczaac naab, biianni zecac stuby ladni.
14 Parzi chi bdiia de fariseu laniudooqui, ax guzulo cayueedeb diidx xa xquel gúndeb par quinxúdeb Jesús.
15 Per Jesús chi gucbeeny ziy ax zégacny ne zieny bniety guzanald laany. Chiy bsiacny irate de bniety ni racxú,
16 ax raipny laadeb dec quɨt chatɨɨchtideb diidx bsiacny laadeb.
17 Ziy xquel guc par guzub zec ni gunii profet Isaías, chi guniib:
18 Gulguiaa, bnietré ná ni abcuabiia par gúnbɨ sirvɨ luaa,
laab ni quesentiand rcaaza ne ni quesentiandza rzaclaaznía.
Ax sdeedab Spíritu Sant xtena
par quixteeb lo bniety guɨchliu xa ná guelrnabee xtena.
19 Ne quɨt tu tildnétib niclɨza quɨt xi cuxtiatib
ne niclɨ quɨt xi scandti gúnbɨ lad nez.
20 Ziyza quɨt xi gunnétib de bniety ni ná zecpacza tuby guixguia ni digaizy gaachy
pur ni quɨt gándeb xa riáld ibánydeb.
Niclɨza quɨt xi gunnétib de ni ná zecpacza tuby bieeny ni guuxtisy rac quiani pur ni quɨt relee gacbeedeb xa riáld ibánydeb,
zapbɨ paciency laadeb axtisy dxi ni abaanbɨ gan idzɨny dxi ni gac guelgurtisy zec ni riáld.
21 Ax bniety iranezte zapdeb speranz pur laab.
(Mr. 3:20-30; Lc. 11:14-23; 12:10)
22 De bniety güenédeb tuby bniety nguiu rut zuguaa Jesús, bnietqui ciagu ne gúp náb pur bɨndxab ni nuu láanbɨ. Chiyru bsiac Jesús laab ax guzulo rniib ne rianlozacbɨ.
23 Parzi irate de bniety quesentiand bdxalodeb ax guniideb:
—¿Ladxa laabɨy bniety ni ná par gueed lo xfamily to David?
24 Chi bindiag de fariseu ziy ax guniideb:
—Bnietquɨ rbéeb de bɨndxab láani de bniety pur lagac guelrnabee xte Beelzebú ni rnabee lo de bɨndxab.
25 Per Jesús cun nánnacny xa cayundeb xgab, ax raipny laadeb:
—Irate naciony o ciudaza rut ná bɨny tiop cuaa pur didxguidx, rlasaapacdeb ne ziyza rut ná tuby family tiop cuaa pur didxguidx, ziyza rlasaadeb.
26 Ziygaczaquɨy belati Satanás gúniy contrɨ lagac niy ax, ¿xólesa güelaaz guelrnabee xteniy?
27 Laat rniit dec nare rbiia bɨndxab láani lazdoo de bniety pur guelrnabee xte Beelzebú, per belati ziy, laat, ¿tú rdeed guelrnabee de xpɨntɨ par cuéedeb bɨndxab? Rguixtiia lot dec lagac laadeb rniideb dec laat rzacantɨ.
28 Te pur nare pur Spíritu Sant xte Dios rbiia bɨndxab láani lazdoo de bniety, niy zelo dec guelrnabee xte Dios azuguané laat.
29 ’Te pur, ¿xólesa yiiu ni yiiu liz tuby bniety ni quesentiand daan par cúaandeb xixtenbɨ belati quɨt ildiibxgadeb laab? Ziytisy par chalee cúaandeb xixtenbɨ.
30 ’Elquɨ ni quɨt nuu xlada, laab cayunbɨ contrɨ nare. Ne elquɨ ni quɨt racné nare, laab cayunbɨ mal nare.
31 ’Pur ningui, rniia laat: Dios zunny perdón de duld ne de diidx maltisy ni inii bniety, per quɨt gúntiny perdón de ni inii de mal diidx pur Spíritu Sant.
32 Axt par de ni inii mal diidx pur nare Bniety ni bxiaald Dios nuu perdón, per par de ni inii de mal diidx pur Spíritu Sant quɨtti perdón par laadeb niclɨ lo guɨchliuré niclɨza llayabaa.
(Lc. 6:43-45)
33 ’Laat nántɨ dec belati tuby bniety izub tuby yag ni rca frut zaac lonii ax frut zaac ná ni icáab, per belati laab izub tuby yag ni quɨt rcati frut zaac lonii ax ni quɨt nazaaczacqui icáab. Te pur cad tuby yag rumbee bnietni pur frut ni rca loni.
34 ¡Per laat zecpacza de béeld vivtɨ! ¿Xólesa iniit ni ná güen ne quesentiand mal nát? Te pur desdɨ láani lazdoo bniety rdiia ni rdiia ruu bniety.
35 Bniety ni ná güen rniib de diidx zaac te pur laani nuu láani lazdoob. Ne bniety ni ná mal ax rniizacbɨ de diidx mal te pur malqui nuu láani lazdoob.
36 Per nare rniia laat dec dxi ni gún Dios guelgurtisy xtenny, irate bniety ideed cuend laany pur irate de diidx ni quɨt illiú ni rdiia ruudeb.
37 Te pur lagacquɨ pur de xtiidx bniety yíany la riáldbɨ o la quɨt riáldbɨ castigu xte Dios.
(Mr. 8:12; Lc. 11:29-32)
38 Chiy tuby tiop de fariseu cun de maistrɨ ni nán ley raipdeb Jesús:
—Maistrɨ, rcaaznɨ iguiaan gúnbiu tuby milagrɨ.
39 Jesús ax cuaibny:
—Laat, de bɨny mal, quɨt xi reldilaaztit ax rnaabtɨ gúna tuby milagrɨ. Per quɨtru xi iniátit, quesoltisy zec ni gudeed profet gulal ni bdialá Jonás.
40 Te pur zec ni guu Jonás láani beldroo, chon dxi ne chon guxin, ziytiziacza nare Bniety ni bxiaald Dios, chon dxi ne chon guxin chuua láani baa.
41 Ne dxi ni ldull guɨchliu chi ideed de bniety cuend Dios, chi gún Dios juzguɨ de bniety ni nabány anre, chiy de bniety ni gulez guɨdx Nínive sbánydeb ax sniideb dec de bniety ni nabány anre riáld castigu xte Dios. Te pur de bniety Nínive bcuadiagdeb xtiidx Jonás chi raipbɨ laadeb dec ná par ibánydeb zec ni rcaaz Dios. Ne nare Jesús ni zuguané laat, mazru saca que Jonás.
42 Ziyza reina ni zá guɨdx ni lá Sabá sbányzacbɨ dxi ni ldull guɨchliu chi ideed de bniety cuend Dios, chiy laab sniib dec de bniety ni nabány anre riáld castigu xte Dios. Te pur laab quesentiand zit záb par bedcuadiagbɨ ni nán rey Salomón. Ne nare Jesús ni zuguané laat, mazru saca que Salomón.
(Lc. 11:24-26)
43 ’Chi rdiia tuby bɨndxab láani lazdoo tuby bniety, ax rcandzangui de nez rut nabiz rguíiliy rut izilaaziy. Ne chi quɨt rdxialiy rut izilaaziy ax runiy xgab
44 dec güenru yaicquiy rut bdiiay. Ne bel chi yaicquiy idxialiy lazdoo bnietqui zecpacza tuby yuu ni quɨt tu rbezti láanni, zecpacza tuby yuu ni ablub láanni ne ni anazaac.
45 Chiy ax azecáangui dzɨ gadz bɨndxab ni ná mazru mal que niy. Chiy iratedengui yiiudengui láani lazdoo bnietqui. Pur lúltmɨ, bnietqui mazru rnia ibánybɨ que gulo. Ziytiziac teed de bɨny mal ni ri lo guɨchliu anre.
(Mr. 3:31-35; Lc. 8:19-21)
46 Zeczi caniné Jesús de bniety chi bdzɨny xnan Jesús cun de betsny, rcaazdeb ininédeb laany. Per quɨt nialeeti níiudeb axt rut zuguaany
47 ax guu ni gudixtee lony:
—A xnanbiu cun de betsbiu zuguaa detsquɨ, rcaazdeb ininédeb laabiu.
48 Per Jesús cuaibny lo bniety ni gudixtee lony:
—¿Tú rac xnana ne tú rac de betsa?
49 Chiy ax rliunaany de xpɨnny guniigany:
—De bnietré rac xnana ne de betsa.
50 Te pur tutix bniety ni run zec ni rcaaz Xtada ni rbez llayabaa, laabɨy rac betsa, bzaana ne xnana.