42
Wakulu Zake Usufu Wochola Misili Kugula Mandia
1 Yakobo viyahulike kamba kuna mandia Misili, kawalongela wanage, “Habali mgendelela kuilola?
2 Nihulika kamba kuna mandia muisi ya Misili, gendeni mkagule giladi sambitudanganhike.”
3 Avo waja iwakulu zake Usufu longo dimwe wachola Misili kugula mandia.
4 Ila Yakobo halondile Benjamini mdodo wake Usufu yachole na wayage, kwavija kadumba mbuli zihile zodaha kumvika.
5 Avo wana wa Yakobo wakala mmwanza wa awo wacholile kugula vakuja kwavija vivija nzala ingila muisi ya Kanaani.
6 Usufu kakala mkulu wa isi ya Misili, na heyo iyo yakalile yoguza vakuja ha wanhu wose wa isi ija. Avo wakulu zake Usufu viwavikile, wafugama mavindi wainamila mbaka hasi.
7 Usufu viyawawene wakulu zake, kawatanga ila kaitenda kamba hawatangile, kawauza mkukalika, yowalongela, “Mweye molawa kwahi?”
Wamwidika, “Tweye tolawa Kanaani, twiza kugula mandia.”
8 Usufu kawatanga wakulu zake, ila hewo hawamtangile.
9 Abaho kaikumbukila nzozi yake iyawalotile hewo na kuwalongela, “Mweye mwa visepi, mwiza hano kulola hanhu halekile kwimilizwa muisi yetu.”
10 Wamulongela, “Si vivo, mndewa wangu, watumigwa zako twiza hano kugula mandia.
11 Tweye tose twa wana wa munhu imwe, watumigwa zako hatuli wavwizi. Tweye hatuli visepi.”
12 Usufu kawalongela, “Si vivo, mwiza hano kulola hanhu halekile kwimilizwa muisi yetu.”
13 Wamulongela, “Watumigwa zako tukala longo dimwe na wabili, wana wa munhu imwe yokala muisi ya Kanaani, ija ikizuwanda kasigala na tataetu, na imwe kadanganhika.”
14 Usufu kawalongela, “Kamba viniwalongele, mweye mwa visepi!
15 Vino vivo vondatuwanamate, noiduila ha Falao, hamchola kumwenu mbaka kizuwanda wenu yavike hano.
16 Mtumeni imwe mmwanza wenu yachole kumuwinza kizuwanda wenu. Mweye msigale towagela mkifungo giladi mbuli zenu zumulonga tuzigeze tone kamba molonga kweli ama sio. Kamba si kweli avo noiduila mditwaga da Falao kamba, kweli mweye mwa visepi.”
17 Na kawagela mkifungo wose hamoja mmazua madatu.
18 Mdizua da ikadatu, Usufu kawalongela, “Muhatenda gondaniwalongele, mowa na ugima kwavija nie nomdumba Mulungu.
19 Kamba mweye hamuli wavwizi, imwe mmwanza wenu nayakale mkifungo muja mumkalile mweye, na mweye msigale gendeni mkasole vakuja mkawagalile wanhu wa mng'anda yenu awo wene nzala,
20 na nigalileni kizuwanda wenu hano, giladi yoneke kamba hamnivwizile, na mkutenda avo hamdanganhika.”
Watogola kutenda avo.
21 Wakiilongela, “Kweli tolanhigwa sama ya mdodo wetu. Tumona viyakalile yogela bazi, viyakalile yotuyalalila tumonele bazi, ila tweye hatumtegeleze, kino kicho kilamso mgayo uno wiza kumwetu.”
22 Lubeni kawalongela, “Nie siwalongele kamba sambimumtendele gehile imwana? Ila hamunitegeleze! Sambi topata maliho ga mulopa wake.”
23 Hawavitangile kamba Usufu kakala yowahulika avija viyakalile yolonga nao kubitila mtapita.
24 Usufu kainega na hewo na kusonga kulila, abaho kabweleganya na kulonga nao kabili. Kamsola Simioni na kumfunga hameso gao.
Wakulu Zake Usufu Wobweleganya Kanaani
25 Usufu kawalagiza watumigwa zake wagamemeze vakuja magunia gao, na wawabwezele hela zao mmagunia gao, na wawagwelele mhamba. Na gano gose watendeligwa.
26 Avo waja iwakulu zake Usufu wakweleza vakuja vao mmhunda zao na kuchola.
27 Kilo viingile wema, imwe mmwanza wao kafungula gunia jake yasole mandia yamgwelele mhunda wake, kona hela zake hamulomo wa gunia jake.
28 Kawalongela wandugu zake, “Hela zangu zibwela azino hano mdigunia jangu.” Mioyo yao ibogoyoka wakiihindukila kuno wogudema, wolonga, “Kinhu chaki kino Mulungu kiyatutendele?”
29 Viwavikile ha Yakobo tataao muisi ya Kanaani, wamulongela gose gawalawilile. Wamulongela,
30 “Munhu imwe yali mkulu wa isi yose ya Misili katulonga mkutukalikila na katutenda kamba vija tweye tukala tucholile kuisepa isi yao.
31 Ila tweye tumulongela, ‘Tweye hatuli wavwizi, tweye sio visepi.
32 Tweye tukala wanhu longo dimwe na wabili wana wa tata imwe, imwe mmwanza wetu kadanganhika na ikizuwanda kasigala na tataetu ako Kanaani.’
33 Abaho ija imkulu wa isi katulongela, ‘Vino vivo vondanimtangeni kamba mweye mwa wanhu mulibule wavwizi. Nilekeleni imwe wa ndugu zenu hano na msole mandia mchole mkawagalile wanhu wa mng'anda yenu awo wene nzala.
34 Ila nigalileni kizuwanda wenu giladi nivitange kamba mweye sio visepi ila mwa wanhu mulibule uvwizi. Abaho nowabwezela ndugu yenu, na mweye modaha kutenda uchuluzi muisi ino.’ ”
35 Viwakalile wobakula magunia gao, kila munhu kavika kibweta chake cha hela. Hewo na tataao viwaviwene ivibweta va hela, wadumba.
36 Yakobo tataao kawalongela, “Molonda niwagize wanangu wose? Usufu kapotela, Simioni kapotela, na sambi molonda kumsola Benjamini. Kila kinhu chochola mbali na vija vinilonda nie!”
37 Abaho Lubeni kamulongela tataake, “Kamba sim'bwezile Benjamini kumwako, basi wakome wanangu wano wabili, mwike mmakono gangu nie na nie nom'bweza kumwako.”
38 Ila Yakobo kalonga, “Mwanangu hadaha kuchola na mweye, mkulu wake kadanganhika na heyo iyo yeiyeka yasigale. Kamba gaham'vika gehile mnzila, na uvyele uno unilinao, mong'homa na giogio.”