43
Wandugu Zake Usufu Wobweleganya Misili Hamoja na Benjamini
1 Nzala muisi ya Kanaani ikala mpamanho.
2 Avo viwamambukize kuja mandia gose gawagalile kulawa Misili, tataao kawalongela, “Bweleganyeni Misili mkatugulile kabili mandia.”
3 Ila Yuda kamulongela, “Ija imunhu katulongela mkuiduila yolonga, ‘Kamba hamwizile na mdodo wenu, hamchona kihanga changu kabili.’
4 Kamba uhamuleka Benjamini yachole na tweye Misili, tochola kukugulila mandia,
5 ila kamba uhamgomesa, na tweye hatuchola kwavija ija imunhu katulongela, kamba hatucholile na mdodo wetu, hatuchona kihanga chake kabili.”
6 Yakobo kalonga, “Habali mngalile mgayo uno mkumulongela ayo imunhu kamba muna mdodo iyagwe?”
7 Wamulongela, “Ija imunhu kakala yotuuzagiza ng'hani, tweye wenyego na mulango wetu, yolonga, ‘Tata wenu yang'hali mgima? Mweye muna mdodo iyagwe?’ Na tweye tumwidika gaja gayakalile youza. Tuhavimanyileze kamba kokwiza kulonga, ‘Mgaleni mdodo wenu hano’?”
8 Abaho Yuda kamulongela Yakobo tataake, “Muleke imwana hamoja na nie tuchole hima, giladi gweye na tweye na wanetu sambitufe nzala.
9 Nie mwenyego iyo zamana wa ugima wake. Kamba habwelile, unigoge nie. Kamba sim'bwezile kumwako na kumwika haulongozi wako, mbuli ino noipapa nie milongo yose.
10 Kamba tuhalekile kukawa, mkipigiti kino tuhabweleganye Misili mianza mibili.”
11 Yakobo tataao kawalongela, “Kamba mbuli zenyego vivo zili, basi tendeni vino, soleni vinhu vinogile va muisi ino vigeleni m'bahasha zenu mumgalile ija imunhu kamba nhunza, soleni zeli kidogo, uki kidogo, ubane, manemane, jozi, na kungu.
12 Vivija soleni hela mianza mibili ya zija zimcholile nazo haichanduso, kwavija molondigwa m'bweze zija zihela zim'bwezeligwe na kwikigwa mmilomo ya magunia genu, siku wakala wahonyele.
13 Msoleni na ndugu yenu mchole nayo hima ha ija imunhu.
14 Na Mulungu Mwene Mhiko yamtende ija imunhu yawonele mweye bazi, giladi yamulekese ndugu yenu Simioni na Benjamini wabwele hamoja na mweye. Ila kamba nihawagiza wanangu, basi.”
15 Avo waja iwandugu wasola zinhunza na mianza mibili ya zihela za ichanduso wachola Misili hamoja na Benjamini. Wavika Misili na kwima haulongozi wa Usufu.
16 Usufu viyamonile Benjamini ka hamoja na hewo, kamulongela mtumigwa wa ng'anda yake, “Wasole wanhu wano uwagale kung'anda yangu, chinja mng'onyo na uteleke mandia, kwavija wolondigwa kuja mandia hamoja na nie imisi ya lelo.”
17 Ija imtumigwa katenda kamba Usufu viyamulongele, kawasola waja iwanhu na kuwagala kung'anda ya Usufu.
18 Viwakalile wogaligwa kung'anda ya Usufu, wakala wodumba ng'hani, wakala wogelegeza wolonga, “Tugaligwa kuno sama ya zija zihela zibwezigwe mmagunia getu mwanza wa ichanduso. Wolonda watuvamhile, na kutuhuma na kututenda tuwe nyakadala na kuwasola mhunda zetu.”
19 Viwavikile halwivi lwa ing'anda ya Usufu, wamcholela ija imtumigwa wa ng'anda ya Usufu,
20 wamulongela, “Chonde, mndewa, tweye tukala twizile hano mwanza wa ichanduso kugula mandia.
21 Ila kilo vikingile twima na vitufungule magunia getu, kila munhu kavika hela yake kiasi kikija hamulomo wa gunia jake. Avo tuzibweza.
22 Vivija twiza na hela ziyagwe za kugula mandia. Hatummanyile yekile hela zetu mmagunia getu.”
23 Ija imtumigwa kawalongela, “Sambimdumbe, Mulungu wenu, Mulungu wa tataenu, kawagwelela hela mmagunia genu. Ila zija zihela zimgulile mandia haichanduso nie nizibokela.” Abaho kamulava Simioni na kumgala kuwakalile hewo.
24 Ija imtumigwa kawasola waja iwanhu na kuwengiza mng'anda ya Usufu, kawagwaa mazi ga kugela magulu gao na kuwagwelela mandia mhunda zao.
25 Wasasala nhunza zao sama ya Usufu vondayavike kipigiti cha imisi, kwavija wahulika kamba kokwiza kuja na hewo.
26 Usufu viyabwelile ukae, wamgwaa zija zinhunza ziwezile nazo mng'anda, wafugama mavindi, wainamila haulongozi wake mbaka hasi.
27 Kawalamsa abaho kawauza, “Tataenu im'vyele ng'hani imunilongele mpile? Yang'hali mgima?”
28 Wamulongela, “Tata wetu ayo yali mtumigwa wako yang'hali mgima na mpile.” Wafugama mavindi wainamila mbaka hasi haulongozi wake.
29 Abaho Usufu kamulola mdodo wake Benjamini, mwana wa mamaake, kauza, “Ino iyo mdodo wenu ikizuwanda imunilongele? Mulungu yakumoteze, mwanangu.”
30 Abaho Usufu kasegela hima kulawa haja kuno yokona chuhila, Usufu kalawa hanze na kuzahila hanhu ha kulilila. Kachola kugati dilibule munhu na kulila.
31 Viyamalile kunava kihanga chake, kalawa hanze na kaizuila sambiyalile, abaho kalonga, “Goleni gamandia.”
32 Waja wakalile wogola wamgolela Usufu yeiyeka hameza yake, na waja iwandugu zake wawagolela weiyeka hameza yao. Waja Iwamisili wakalile woja na Usufu wakala weiyeka hameza yao, kwavija Wamisili wakala hawaja hamoja na Waeblania sama ya ndagizi za nhamanila yao.
33 Waja iwandugu zake Usufu wakala wakalile mumnhongo kulingana na vija viwavumbuke, songela waichanduso kuvumbuka mbaka waikimambukizo, wokiilola na Usufu. Wakiilola wenyego kwa wenyego kuno wokanganya.
34 Mandia gakala gogoligwa kulawa hameza ya Usufu, ila Benjamini kakala yagoleligwe mianza mitano ya vija viwagoleligwe wayagwe. Avo watenda lusona, wang'wa hamoja na heyo kamba viwalondile wenyego.