2
Biguiajt xSprijt Dios diizd xanyabaa
1 Chi bidxin dxej gojl lanij la Pentecostés, gra ree bén rliladx Jesucrist badoꞌp tijbzi luar.
2 Dxejlczi gojc naquieꞌ xanyabaa ziꞌc bidoxh xt bayu bi lënü lod rigaꞌ reeman,
3 abiꞌ gulentie ziꞌc bajl dobëz ree, biguiajt reen guijc tijb gaj reeman.
4 Zianz guyu xSprijt Dios luxdoo graczi reeman, dxel guzuloj canee reeman diidx ren ree ziꞌc cusnee Sprijt guin laa reeman.
5 Lën ree dxej zii zaꞌ zien ree bén Israel Jerusalén, baza reeman gra ladczi din cwedx guiniab reeman Dios.
6 Chi biguiejn reeman cayajc naquieꞌ, badoꞌp reeman persi biquiaa reeman. Dxel chi biguiejn reeman rniee gra ree bén rliladx Jesús xtiidx tijb gaj reeman, ad badxejlt xgab nüjn reeman.
7 Dád badxa loj reeman xt niꞌquid badxejlt xhie nüjn reeman, abiꞌ gunabdiidx loj lasaꞌ reeman rëb reeman:
―¿Nid bén Galilea gra ree bén canee guin ya?
8 ¿Chexc zeel raguiejn ree rniee reeman dux tiidx ree?
9 Du loj ree noꞌch ree bén zëëd guiedx rigaꞌ ree niz Partia, Media, Elam, Mesopotamia, Judea, Capadocia, Ponto, Asia Menor,
10 bén zëëd tëë ree guiedx rigaꞌ ree niz Frigia, Panfilia, Egipto, në ree guiedx nulen Libia ni rigaꞌ ree gajxh Cirene, në ree bén zëëd Rom, yuꞌ reeman gojl Israel per naban reeman Rom, yuꞌ tëë reeman na̱j quijb ben Rom per rliladx reeman ni rliladx ree bén Israel.
11 Në ree bén zëëd niz Creta nëtëë ree bén zëëd guiedx rigaꞌ ree niz Arabia noꞌch du loj ree. ¡Per dugraczi ree caycaagdiajg con dux tiidx ree nizaꞌcdxoon rüjn Dios!
12 Graczi reeman badxa daꞌt loj xt niꞌquid badxejlt xgab nüjn reeman, abiꞌ guzuloj canabdiidx loj lasaꞌ reeman rëb reeman:
―¿Xhie rën guiëb gra ni guie?
13 Per garol reeman bazeꞌ laa reeman, rëb reeman:
―Rëꞌ reeman.
Ni rëb Bëd loj ree bejn
14 Dxel guzuli Bëd con zachibtib ree apóstoles guin, guneeman rejs rëbaman:
―Lëjt bén Judea në graczi ree bén zojb Jerusalén, gol bacaagdiajg gol bigniaꞌ tëë ni ganin.
15 Ad rëꞌt ree bén guin ziꞌc naladxidi, din qui gojlri raca gaa rsil.
16 Guie cayajc cumplid ni gunee bén brii laj Joel, bén badëë xtiidx Dios loj ree bejn, chi rëbaman:
17 Na Dios,
guidxin dxej gaxhal da Sprijtan luxdoo gra ree bejn,
abiꞌ xiꞌndi xinguiaaw con biingunaa gudëëd reex da diidxan,
zien ree ni gulüüloj loj ree xinguiag,
guiáad ree bengol zien ree ni guinieꞌxchaal reeman.
18 Dxej zii ree gaxhal da Sprijtan luxdoo ree bén rüjn da dxiinan,
xinguiaaw ree në ree béngunaa,
abiꞌ gudëëd reeman da diidxan.
19 Gulün sen ree xanyabaa ni yadxa lojdi,
guiáad loj guidxliuj gulün sen ree
ziꞌc rejn në bajl nëtëë goꞌxh.
20 Guicajy loj gubijdx, guiáad bëëw yayajcan ziꞌc rejn.
Chi ma gojc zian, dxel guidxin quijb dxej guin,
dxej zaꞌcdxoon guiꞌt Dios bén rniabee,
dxej guiguien guidib xbianiman.
21 Abiꞌ graczi ree bén cwedx guiniab laaman
güünman laa reeman perdon.
22 Rëb tëë Bëd loj reeman:
―Yan, gol bacaagdiajg ni ganin lëjt bén Israel: Lëjt ragbee guial Jesús bén Nazaret najman bén guxhaal Dios, been tëëman milagr ree në ree ni radxa loj ree bejn ziꞌc sen din gagbeedi guial Dios guxhaal laaman.
23 Diizd gocli mal nüjn Dios xgab guial zian güünnëdi Jesús, gunaazidi laaman bayüdi laaman loj ree benmal, din gugüjt reeman laaman loj crüjz.
24 Per basban Dios laaman stijb, babëëman laaman loj guialgüjt, din ad gojct nutëë guialgüjt guin laaman.
25 Chi gunee rey Davi xcwent Jesús, rëbaman:
Zianczi baguian dux Dad ree Dios zaꞌnëman naj.
Zaꞌman da ladbeen, achetczi zajc guchejb naj.
26 Zeel yuꞌ luxdon nix, ruzat tëën Dios zagdxe.
majsi guiëtan ad rdxebtan,
27 din ad zusaꞌntil naj lën baa,
ad zatiëjbtil xhin xcuerp xiꞌnl bén naya nali.
28 Balüül naj nejz runee guialnaban,
chuꞌ tëë luxdon zagdxe guial guibannël naj.
29 Basnuu gunee Bëd, rëbaman:
―Ganin loj gradi compniar, diidxliczi dux béngulal ree Davi güjtaman biguieꞌch tëëman, abiꞌ laa xbaaman sta raguiaa ree yan.
30 Per gojcaman bén badëë xtiidx Dios loj ree bejn, abiꞌ gogbeeman been Dios promejs guial loj xdiaaman grii Cristo bén nabee.
31 Rulüü ma cuguiaaman gra ni gac, rëbaman guial yaban Cristo loj ree bengüt, ad zayaꞌntaman lën baa ad zaxin tëët xcuerpaman.
32 Yan ma basban Dios Jesús, dugran nayajc testiw guial walican babanman.
33 Zia tëëman xanyabaa zisobaman xladbee Dios, persi badëë xSprijt Dios lojman ziꞌc ma rëbaman, yan ma guxhaal Jesús Sprijt guin loj guidxliuj, por laaman cayajc ni cuguiaadi caguiejn tëëdi.
34 Ad Davitan zia xanyabaa, din laagajcaman rëb:
Rëb dux Dad ree Dios loj bén rniabee naj:
“Gurej da ladbeen,
35 xt gabecan xin rdxeꞌch ree lüj guiaꞌl.”
36 ’Gradi bén Israel gol gogbee guial Jesús bén bacaadi loj crüjz, Dios bacaabee laaman din gacaman Dad, bén nabee dunuj ree.
Bachajg zien ree bejn bén rliladx ree Jesús
37 Chi biguiejn ree bén rigaꞌ yagaj ni rëb Bëd, dád guyu naya luxdoo reeman. Abiꞌ gunabdiidx reeman lojman në loj los demazri ree apóstoles guin, rëb reeman:
―Dad, gol guna, ¿xhie rayal yaguieenan?
38 Dxel rëb Bëd loj reeman:
―Gol bayagbee xtolidi, gol badxiꞌ tëë lojdi loj Dios, gol gurobnijs por xguialrniabee Jesucrist din gac xtolidi perdon, zian chuꞌ xSprijtaman luxdoodi.
39 Din promejs guin na̱j par lëjt në par ree xiꞌndi në par gra ree bén rigaꞌ zijt, par gra ree bén cwe Dios par laaman.
40 Con ree diidx guie në mazri ree diidx ren guneenë Bëd laa reeman, rëbaman:
―¡Gol bariica loj ree bén rüjn ni mal!
41 Zian gojc, graczi bén bazoob diidx ni rëbaman gurobnijs. Dxej zii gajc bachajg cost choon mil bejn bén rliladx ree Jesús.
42 Graczi reeman binal ni balüü ree xi apóstoles Jesús laa reeman, gubajnnë lasaꞌ reeman zagdxe, gurejdx gunab reeman Dios abiꞌ radoꞌp reeman persi raw reeman guiadxtil tijbzi ziꞌc gunabee Jesucrist güün reeman.
Ze gubajn ree bén bililadx Jesús yaloj
43 Graczi ree bejn radxa daꞌt loj milagr në los demazri ree ni been ree apóstoles guin.
44 Graczi ree bén bililadx Jesucrist gubajnnë lasaꞌ zagdxe, rguiꞌs tëë ni rajp reeman loj lasaꞌ reeman.
45 Rutoꞌ xguidxliuj reeman në gra ni rajp reeman, persi rguiꞌs reeman milia guin loj lasaꞌ reeman ziꞌctzi na̱j ni riaadx tijb gaj reeman.
46 Guixie guixie radoꞌp reeman lën yadooroꞌ Jerusalén, dxel raguiaj reeman lidx xcompniar reeman rtaw reeman, dád nix yuꞌ luxdoo reeman rën tëë lasaꞌ reeman,
47 ruzaꞌt reeman Dios zagdxe, guiáad gra bejn guyën laa reeman. Guixie guixie ragnë Dios din gacxhiej mazri bén rliladx Jesucrist, persi gojc xtol reeman perdon.