7
Rayajc xmojs tijb suldad rom xin rniabee ree suldad
(Mt. 8:5‑13)
1 Chi gulox guneenë Jesús bejn ree, dxel zëman Capernaum.
2 Yagaj zojb tijb suldad Rom xin rniabee ree suldad. Yuꞌ tijb xmojsix xin rën daꞌtix, ragxuu mojs guin ma rulüüczi guiëtix.
3 Chi biguiejn suldad rniabee guin ruzaꞌt ree bejn Jesús, guxhaalix tioꞌp choon ree bén rniabee Israel lojman din chisajc reeman liaadx yayüjnman xmojsix.
4 Abiꞌ bidxin reeman loj Jesús guzajc reeman liaadx, rëb reeman:
―Gagnësiil suldad rniabee guin,
5 din rënx bén duladx ree, në yan por laax gojc dux yadoo ree.
6 Dxel binë Jesús laa reeman. Per chi ma cadxin reeman gajxh lidxix, guxhaal tioꞌp choon ree xmiwix loj Jesús biguiedx reex lojman:
―Dad, ad chuꞌl xgab, din ad rayaltan chuꞌl lënü lidxan,
7 zeel ad bayaxtan nial quijb naj nidgadilan lüj. Per con gunee diizd lod zaꞌl din yayajc da mojsan.
8 Din ziꞌc naj yuꞌ ree bén rniabee naj, ziangajc naj yuꞌ ree da suldadan xin rniabeen. Chi rën loj tijb reex: “Wej”, rejx. Chi rën loj zatijbix: “Guda”, riꞌtix. Abiꞌ chi rën loj da mojsan: Been ni guin, rüjngajquixan.
9 Chi biguiejn Jesús zian, dád badxa lojman ni rëb suldad guin, abiꞌ badxiꞌ lojman loj gra ree bén zinal laaman, rëbaman:
―Diidxliczi rnin, niꞌqui Israel ad wadxaaglojtan tijb bén rliladx daꞌt Dios ziꞌc rliladx xin guin Dios.
10 Chi badxin ree xin guxhaal suldad rniabee guin lidxix, baguiaa reex ma bayajc mojs guin.
Rasban Jesús xiꞌn tijb béngunaa bizëjb
11 Chi gudëd gojc zian, wej Jesús tijb luguiedx la Naín binë ree xbejnman, në zien ree ben ren.
12 Chi bidxinman gajxh roꞌ guiedx guin, baguiaaman ziquieꞌch reeman tijb xingüt, tijbzi laax na̱j xiꞌn xniaax, najman bén bizëjb. Zien daꞌt ree bénluguiedx guin zinal laaman.
13 Chi baguiaa Dad Jesús laaman, bayaman laaman, dxel rëbaman lojman:
―Ad roonl.
14 Abiꞌ bibig Jesús baquiꞌman xcaj xingüt guin, dxel guzudxe ree bén zinë laax. Zianz rëbaman lojx:
―Xiꞌn, naj rni lojl: ¡Bixche!
15 Dxel gureli xin guin, guzuloj caneex, zianz bayü Jesús laax loj xniaax.
16 Chi baguiaa reeman zian, graczi reeman bidxeb guzuloj cuzaꞌt reeman Dios zagdxe, rëb reeman:
―Du loj ree ma gules Dios tijb bén zojbloj, bén rudëë xtiidx Dios loj ree bejn.
Rëb tëë reeman:
―Ma biꞌt Dios din gagnë ree xbejnman.
17 Abiꞌ guidib niz Judea në ree guiedx rigaꞌ niz yagaj gogbee ree bejn ni been Jesús.
Bigneenë ree xbejn Waj Jesús
(Mt. 11:2‑19)
18 Gogbee Waj gra ree ni cayüjn Jesús, guial bagojn ree xbejnman laaman. Abiꞌ guneeman tioꞌp reeman,
19 dxel guxhaalaman laa reeman loj Jesús din chignabdiidx reeman bal laacaman na̱j Cristo bén na̱j diidx guiꞌt, bén cabëz reeman, o cwëz reeman ben ren ya.
20 Abiꞌ bibig reeman, guneenë reeman laaman, rëb reeman lojman:
―Waj bén ruroobnijs bejn ree guxhaal dunujn lojl zudganabdiidxan bal lüjcan na̱j Cristo bén na̱j diidx guiꞌt, bén caylëjzan o yalëjzan ben ren ya.
21 Hor ziigajc bayüjn Jesús zien daꞌt ree bénragxuu, në ree bén rdoob, nëtëë ree bén yuꞌ xindxab luxdoo, baxhal tëëman loj ree bénlutiaꞌp.
22 Dxel badxiꞌ Jesús xtiidx ree bén guxhaal Waj, rëbaman:
―Gol chej, gol chiguiedx loj Waj ni cuguiaadi në ni caguiejndi. Gol güjdx lojman guial ma ruguiaa ree bénlutiaꞌp, ma rajc rza ree bencoj, ma rayajc tëë ree bén goc guialguijdx la lepra, ma riguiejn ree bén nacwaꞌt, guiáad ree bengüt ma baban reeman, abiꞌ ree bénprob ma caguiejn reeman xtiidxzaꞌc Dios.
23 ¡Xiquilbaa ree bén ad zucwëëzt chililadx naj!
24 Chi baza ree bén guxhaal Waj, guzuloj Jesús caneeman xcwent Waj loj ree bejn, rëbaman:
―¿Chu naladxidi na̱j bén biquiaadi loj yujbidx? ¿Naladxidi ya najman ziꞌc tijb biqui runiib bi?
25 ¿O chu biquiaadi? ¿Tijb bén najcw lajd zagdxe ya? Lëjt ragbee guial bén rajcw ree lajd zagdxe, në ree bén naban zagdxe, lën palas zojb reeman.
26 ¿Chu biquiaadi? ¿Tijb bén rudëë xtiidx Dios loj ree bejn ya? Per diidxliczi rnin lojdi, biquiaadi tijb bén mazri zojbloj guial loj tijb bén rudëë xtiidx Dios loj ree bejn.
27 Wajn na̱j bén ruzaꞌt xtiidx Dios, lod rëb:
Naj rxhial tijb bén ned lojl,
bén güünchaaw xnejzil.
28 Rnin lëjt, loj graczi ree bénguidxliuj ad wayut bén rudëë xtiidx Dios loj ree bejn, bén mazri zojbloj guial loj Waj. Per majsi zian, bén ad zojblojt loj xguialrniabee Dios, laaman mazri zojbloj guial loj Waj.
29 Gra ree bejn, në ree bén ruquijx impuest bén baroobnijs Waj, chi biguiejn reeman ni rëb Jesús bigniaꞌ reeman guial rüjn Dios ziꞌc rayal.
30 Per ree bénfarisew con ree mextr rajc ley ad cwëjbt reeman nuroobnijs Waj laa reeman, zian ad guyënt reeman ni rën Dios par laa reeman.
31 Rëb tëë Jesús:
―¿Xhienaag ganin lëjt na̱j ree bén rigaꞌ loj guidxliuj guie yan? ¿Chu na̱j ziꞌc laa reeman?
32 Laa reeman na̱j ziꞌc ree xindoo rguijt niz galay luguiedx, abiꞌ rbixdiaj reex rëb loj lasaꞌ reex: “Bacwejdxan par nuyaꞌdi, per ad bayaꞌtidi, badoolan ni naya ree, per ad biintidi.”
33 Din biꞌt Waj bén baroobnijs bejn ree, ad rawtaman ad rëꞌ tëëtaman vin, abiꞌ rëbidi xindxab yuꞌ luxdooman.
34 Yan biꞌt Bén guxhaal Dios, rawaman rëꞌ tëëman vin, abiꞌ rëbidi guial dád nalaman ruladxaman guiëꞌman, ruchajg tëëman béndol ree con ree bén ruquijx impuest.
35 Per xguialrigniaꞌ Dios, rguienan por ree xbejnman.
Rej Jesús lidx tijb bénfarisew la Simón
36 Tijb bénfarisew rëb loj Jesús din chitaw Jesús guin lidxaman. Abiꞌ bidxinman lidxaman gurejman xan mex.
37 Dxel tijb béngunaa dxuudx zojb gajc luguiedx guin. Chi gogbeeman cayaw Jesús lidx bénfarisew guin, bidxinnëman tijb lumejt yuꞌ perfum.
38 Dxel roonman gurejman lod nuzuj guiaꞌ Jesús, guzuloj caxhieꞌ nijs carii lojman guiaꞌ Jesús. Abiꞌ cucwiidxnë guidxguijcaman laan, cayawaman xid guiaꞌman curoob tëëman laan perfum guin.
39 Chi baguiaa bénfarisew guin zian, beenman xgab: “Balgui zian wali bén guin najman bén rudëë xtiidx Dios loj ree bejn, zagbeeman chunin cuquiꞌ laaman xhie tëë naag naban béngunaa guin, najman bendxuudx.”
40 Dxel rëb Jesús loj bénfarisew guin:
―Simón, yuꞌ tijb ni ganin lüj.
Badxiꞌ bénfarisew guinan rëbaman:
―Gunan, mextr.
41 Abiꞌ rëb Jesús lojman:
―Tijb bén rudëëd milia rguiꞌn ree bejn, ral tioꞌp ree bejn lojman. Tijbaman nuzëëb gaaygayuu denario, zatijbaman nuzëëb tüꞌpchiin.
42 Grop reeman ad beent gan naguijx lojman, per bén badëëd milia guin rëbaman loj reeman guial ad zaguijxt reeman ni nuzëëb reeman. Yan guna, ¿chu loj grop reeman mazt guiën laaman?
43 Badxiꞌ Simón laan, rëbaman:
―Par naj, bén bazëëb mazri zroꞌ guin.
Dxel rëb Jesús:
―Waliquil.
44 Zianz baguiaa Jesús loj béngunaa guin, abiꞌ rëbaman loj Simón:
―¿Ruguiaal béngunaa guie ya? Chi guyuꞌn lidxil ad baneetil nijs niëd guiaꞌn. Guiáad laaman gudiibaman guiaꞌn con nijs brii lojman, abiꞌ bacwiidxaman laan con guidxguijcaman.
45 Ad gudawtil naj xid, guiáad laaman diizd chi guyuꞌn ad rbëzt rawaman xid guiaꞌn.
46 Achet sejt badxeꞌl guican, per laaman ma badxeꞌman perfum guiaꞌn.
47 Zeel rnin lüj, gra ree xtolaman ma gojc perdon guial rën daꞌtaman naj. Per bén yuꞌ taꞌnz xtol abiꞌ rajcaman perdon, taꞌnz rënman naj.
48 Dxel rëb Jesús loj béngunaa guin:
―Ma na̱j gra xtolil perdon.
49 Guiáad ree bén zojbnëman yagaj guzuloj canabdiidx loj lasaꞌ reeman, rëb reeman:
―¿Chu bén guin zeel xt në ree dol rüjnman perdon?
50 Per rëb Jesús loj béngunaa guin:
―Ma najl perdon guial rliladxil naj, baguiaj zagdxe ad ruril xgab.