8
Béngunaa been ree Jesús yudar
1 Chi gudëd gojc zian, wej Jesús gra ree guiedx naroob në ree guiedx dobëz bicojnman biglüü tëëman xhienaag na̱j xguialrniabee Dios. Në guidxiptioꞌp ree apóstoles binëman,
2 nëtëë tioꞌp choon ree béngunaa, bén babëëman xindxab luxdoo, në ree bén bayüjnman guialguijdx ni rajc reeman. Loj reeman noꞌch María Magdalena, bén babëë Jesús gajdx xindxab luxdoo.
3 Në Xuan, lacheel Cuza, Cuza guin goc bén nulen xchiin Herodes. Në Susan nëtëë zien ree béngunaa ren, been reeman yudar Jesús con ni rajp reeman.
Xcwent bén rtieꞌch bin
(Mt. 13:1‑9; Mr. 4:1‑9)
4 Zien ree bejn brii loj ree guiedx ziquiaa reeman Jesús. Chi bidoꞌp ree benzien, beman tijb cwent loj reeman rëbaman:
5 ―Tijb bejn zëman zigtieꞌchaman bin. Chi catieꞌchaman laan, taꞌnan biajb lunejz abiꞌ balëë ree bejn guijcan gudaw tëë ree biguijn laan.
6 Zataꞌnan biajb loj ree guiaj, chi gulejn reen gubidx reen guial ad yuꞌ xcojpt loj ree guiaj guin.
7 Zataꞌnan biajb loj ree yaquiëjch. Abiꞌ chi guniꞌs reen tijbzi, banidloj yaquiëjch guin laa reen.
8 Zataꞌnan biajb loj yujzaꞌc abiꞌ dád gojcan, cwa xt tibgayuu bin loj tijbgajn.
Chi gulox gunee Jesús zian, dxel guneeman rejs rëbaman:
―Bén rën gucaagdiajg, gol bacaagdiajg.
Chexc zeel rulüü Jesús con cwent ree
(Mt. 13:10‑17; Mr. 4:10‑12)
9 Dxel gunabdiidx ree xbejn Jesús lojman, rëb reeman:
―¿Xhie rën guiëb cwent guin?
10 Badxiꞌ Jesús laan rëbaman:
―Lëjt, Dios ma basaꞌn lëjt din chigniaꞌdi xhienaag na̱j xguialrniabeeman. Per loj gra reeman rünan ziꞌc cwent din majsi rani loj reeman, per ad zuguiaat reeman, majsi riguiejn reeman, per ad zigniaꞌt reeman.
Rusigniaꞌ Jesús xcwent bén rtieꞌch bin
(Mt. 13:18‑23; Mr. 4:13‑20)
11 ’Ni ne rën guiëb xcwent bén rtieꞌch bin: Bin guin na̱j ziꞌc xtiidx Dios,
12 guiáad bin biajb runejz na̱j ziꞌc ree bén riguiejn xtiidx Dios; per rdxin gajc xindxab rquiedix laan luxdoo reeman chitëë chililadx reeman laan abiꞌ gac reeman perdon.
13 Guiáad bin biajb loj ree guiaj, na̱j ziꞌc ree bén riguiejn xtiidx Dios, abiꞌ dád nix ru luxdoo reeman riguiejn reeman laan, per guial na̱j reeman ziꞌc cwaan ni ad yuꞌt liuj, rliladx reeman laan tibladëd abiꞌ chi rzagdiaj reeman laa rusaꞌn gajc reeman ni rliladx reeman.
14 Guiáadza bin biajb loj ree yaquiëjch, na̱j ziꞌc ree bén riguiejn xtiidx Dios; per ru reeman xgab por gra ree guialnazaꞌc rigaꞌ loj guidxliuj guie rüjn tëë reeman ni rëntzi reeman, abiꞌ zianz rucwëëz rucaagdiajg reeman xtiidx Dios ad rüjn tëët reeman ni rënman.
15 Guiáad bin biajb loj yujzaꞌc, laan na̱j ziꞌc ree bén rucaagdiajg xtiidx Dios, rucaagdiajg reeman laan con guidib luxdoo reeman zaꞌdxiꞌch tëë reeman loj xnejzaman, zianczi rüjn reeman ni rënman.
Achet ni naguieꞌch yuꞌ
(Mr. 4:21‑25)
16 ’Achut bén ruzeꞌc tijb guij dxel rutaꞌcwaman laan, ad rudxeꞌ tëëtaman laan xan lon, ruzujman laan ya din gusnin loj ree bén chuꞌ lënü.
17 Achet ni naguieꞌch yuꞌ ni ad zaguient ad yuꞌ tëët ni ralan ni ad zagbeet bejn, zadxin dxej gagbee bejn laan.
18 ’Zeel gol bacaagdiajg zagdxe, bén ma rigniaꞌ gusnuu chigniaꞌman mazri, per bén ad rigniaꞌt, xt taꞌn ni naladxaman rigniaꞌman ad zigniaꞌtraman.
Xniaa Jesús con ree bijchaman
(Mt. 12:46‑50; Mr. 3:31‑35)
19 Xniaa Jesús con ree bijchaman bidxin reeman lod zaꞌman, per ad gojct nibig reeman lojman guial dád zien bejn rigaꞌ.
20 Abiꞌ yuꞌ bén bagojn Jesús rëbaman:
―Laa xniaal con ree bijchil zaꞌ luleꞌ guin rën reeman guinieenë reeman lüj.
21 Badxiꞌ Jesús laan rëbaman:
―Bén rucaagdiajg ree xtiidx Dios rüjn tëë reeman ziꞌc rënman, laa reeman na̱j da nan laa tëë reeman na̱j da bichan.
Racwëëz Jesús bidoxh
(Mt. 8:23‑27; Mr. 4:35‑41)
22 Tijb dxej guyu Jesús loj barcw con ree xbejnman, abiꞌ rëbaman loj reeman:
―Yoꞌ ree zatiblad roꞌ nijs guin.
Zianz zë reeman.
23 Laꞌtgaj cadëd reeman loj nijs guin, goodyëjs Jesús. Dxel guzuloj cabiꞌ bidoxh loj nijs guin, abiꞌ cadxa nijs loj barcw guin, ma cazëëbczi barcw guin xan nijs.
24 Dxel bacwëën reeman Jesús, rëb reeman:
―¡Mextr! ¡Mextr! ¡Ma cayzëëb ree xan nijs!
Abiꞌ bixche Jesús gunabeeman bacwëëz bidoxh guin në xtüjp nijs guin, zianz gulëjz reen dxel bayajcdxe.
25 Abiꞌ rëbaman loj reeman:
―¿Conza xguialrliladxidi?
Per laa reeman dád bidxeb reeman badxa tëë loj reeman, abiꞌ canabdiidx loj lasaꞌ reeman rëb reeman:
―¿Chu bén guin zeel rniabeeman bi në nijs, abiꞌ ruzoob reen xtiidxaman?
Rayüjn Jesús tijb xin yuꞌ xindxab luxdoo
(Mt. 8:28‑34; Mr. 5:1‑20)
26 Dxel badxin Jesús con ree xbejnman xdajn ree bén Gadara, ni rigaꞌ zatiblad roꞌ nijs Galilea.
27 Chi barii Jesús loj barcw guin, bibig tijb xin luguiedx guin lojman. Ma gojc xchej daꞌt yuꞌ xindxab luxdoox. Ad rajcwt xabix, ad nabantix lënü, ganaxzi roꞌ ree baa nabanx.
28 Chi baguiaax Jesús bazuxibix lojman, guneex rejs rëbix:
―¿Xhie rënl con naj, Jesús, Xiꞌn Dios yuꞌ xanyabaa? Rniaaban lojl ad gusagzil naj.
29 Rëbix zian guial ma canabee Jesús din yarii xindxab guin luxdoox. Ma gojc xchej naaz xindxab guin laax. Abiꞌ ma guxhii ree bejn yaax në guiaꞌx con caden chitëë ban chex, per rutüguiaꞌgajquix caden guin abiꞌ rulaagdxa xindxab guin laax niz lod achut bejn zojb.
30 Gunabdiidx Jesús lojx rëbaman:
―¿Chu lal?
Badxiꞌxan rëbix:
―Legión lan.
Rëbix zian guial zien daꞌt ree xindxab yuꞌ luxdoox.
31 Rëb ree xindxab guin loj Jesús chitëë guixhiaalaman laa reex gabijl.
32 Dajn guin rigaꞌ zien ree cüch cayaw reeb. Zeel rëb ree xindxab guin lojman din gudëëman mod chuꞌ reex lën ree cüch guin, dxel cwëjbaman.
33 Zianz barii reex luxdoox bayu reex lën ree cüch guin, abiꞌ guzuloj cuxüün reeb zianz bitidiaꞌ reeb roꞌ balaꞌ xt loj nijs, lod guꞌ reeb nijs abiꞌ güjt reeb.
34 Chi baguiaa ree bén cayajp ree cüch guin ni goc, baxüün reeman bicojn reeman bejn ree luguiedx në ree dajn.
35 Dxel wej reeman biquiaa reeman ni goc. Chi bidxin reeman lod zaꞌ Jesús, baguiaa reeman xin barii xindxab guin ree luxdoo, zojbix guiaꞌman ma najcw xabix, ma badëdguienx abiꞌ bidxeb reeman.
36 Guiáad ree bén baguiaa ni goc, be reeman diidx loj reeman xhienaag bayajquix.
37 Graczi ree bén zojb Gadara gunab loj Jesús din yazaman yagaj guial dád rdxeb reeman. Dxel bayëꞌpaman loj tijb barcw, ziataman.
38 Guiáad xin barii xindxab guin ree luxdoo rëbix lojman din chinalix laaman, per ad cwëjbtaman, rëbaman lojx:
39 ―Baguiaj lidxil, biguiedx graczi ni been Dios por lüj.
Dxel ziax luguiedx guin abiꞌ bex diidx loj gra ree bejn ni been Jesús por laax.
Rayajc xiꞌn Jairo në béngunaa bagaal xab Jesús
(Mt. 9:18‑26; Mr. 5:21‑43)
40 Chi badxin Jesús zatiblad roꞌ nijs guin, dád rabaa gra ree bén zaꞌ yagaj guial badxinman din mal cabëz reeman laaman.
41 Dxel bidxin bén la Jairo, laaman rniabee lën tijb xyadoo ree bén Israel. Bazuxibaman loj Jesús, rëbaman lojman din cheman lidxaman,
42 guial yuꞌ tijb xiꞌnman biin chiptioꞌp ijz, ma guiëtczim. Chi zë Jesús dád zien ree bejn zinal laaman xt rixaꞌt reeman laaman.
43 Abiꞌ tijb béngunaa noꞌch loj reeman, ma gojc chiptioꞌp ijz ragxuuman ryajbaman rejn. Ma banijtaman graczi ni rajpaman guial wejman loj ree doctor, per niꞌqui tijbaman ad gojct nayüjn laaman.
44 Bibigaman niz xijch Jesús abiꞌ bagaalaman guiaꞌ xabaman. Loj hor ziigajc bayajcaman.
45 Dxel gunabdiidx Jesús rëbaman:
―¿Chu baquiꞌ naj?
Abiꞌ graczi reeman rëb guial ad laat reeman baquiꞌ laaman. Zianz rëb Bëd loj Jesús:
―Mextr, graczi ree bejn xt rixaꞌt reeman lüj cucadxaa tëë reeman lüj, abiꞌ rniabdiidxil chu baquiꞌ lüj.
46 Per rëb Jesús zatijb:
―Yuꞌ chu baquiꞌ naj din gogbeen yuꞌ tijb bén ma bayajc con da guialrniabeen.
47 Chi gogbee béngunaa guin guial ma gogbee gajc Jesús ni beenman, guidib rnijman bigzuxibaman loj Jesús. Dxel rëbaman lojman guidibloj ree bén guin chexc zeel baquiꞌman xabaman abiꞌ loj hor guin gajc bayajcaman.
48 Dxel rëb Jesús lojman:
―Xiꞌn, ma bayajquil guial bililadxil naj, baguiaj zagdxe.
49 Sta caneenë Jesús béngunaa guin, chi bidxin tijb bén guza lidx Jairo, bén rniabee lën xyadoo ree bén Israel, rëbaman loj Jairo:
―Mal güjt xiꞌnl, ad ruslenril Mextr guin.
50 Per chi biguiejn Jesús zian, rëbaman loj Jairo:
―Ad rdxebil, bililadxzi, zayajcqui xiꞌnl.
51 Chi bidxin reeman lidxaman, ad cwëjbt Jesús niu ree ben ren, Bëdzi con Waj, con Jacob, con ree xdad xniaa bindo guin.
52 Graczi ree bén rigaꞌ yagaj cayoon, yuꞌnaya tëë reeman por laam. Per rëb Jesús loj reeman:
―Ad roondi, ad güjttim, nagaꞌyëjszim.
53 Graczi reeman bazeꞌ laaman guial ma ragbee reeman güjtim.
54 Dxel gunaaz Jesús yaam, guneeman rejs, rëbaman:
―Bindoo, bixche.
55 Loj hor ziigajc babanm, bixchem. Dxel gunabee Jesús badëëd reeman ni gudawim.
56 Dád badxa loj ree xdadim, per rëb Jesús loj reeman achu loj guiëb reeman ni goc.